Jozue 13 - Bibl Koad 21: Ar Bibl e Brezhoneg evit ar Vretoned

Pennad 13 Lodennañ bro Ganaan

¹ Jozue a oa kozh hag oadet bras. An AOTROU a lavaras dezhañ: Te a zo kozh hag oadet bras, hag e chom ur vro bras-meurbet da berc'hennañ.

² Setu amañ ar vro a chom: holl zouaroù ar Filistined, hag ar C'heshurianed;

³ adalek ar Shihor a red a-dal d'an Ejipt betek harz Ekron war-zu an hanternoz, kontet evel Kananeat ez eus pemp penn-bras ar Filistined: hini Gaza, hini Asdod, hini Askalon, hini Gath hag hini Ekron; an Aviz

⁴ war-zu ar c'hreisteiz, hag holl vro ar Gananeiz, ha Meara a zo d'ar Sidoniz, betek Afek ha betek harz an Amoreaned;

⁵ bro ar C'hibliz hag al Liban holl war-zu ar sav-heol, adalek Baal-Gad e traoñ Menez Hermon betek digor Hamad,

⁶ hag holl annezidi ar menez, adalek al Liban betek Misrefod-Maim, hag an holl Sidoniz. Me o c'haso kuit dirak mibien Israel. Laka hepken kement-se evel hêrezh da Israel, evel ma em eus gourc'hemennet dit,

⁷ ha lodenn bremañ ar vro-se en hêrezh d'an nav meuriad ha da hanter-veuriad Manase.

⁸ An hanter all, ar Rubeniz hag ar C'hadiz o deus bet o hêrezh, en deus roet Moizez dezho en tu all d'ar Jordan er sav-heol, evel m'en deus roet dezho Moizez servijer an AOTROU ,

⁹ adalek Aroer a zo war ribl froud an Arnon, hag ar gêr a zo e-kreiz ar froud, ha plaenenn Medeba betek Dibon,

¹⁰ hag holl gêrioù Sihon roue an Amoreaned a rene en Hesbon betek harz mibien Ammon,

¹¹ ha Galaad, ha douaroù ar C'heshurianed hag ar Vaakatianed, hag holl Venez Hermon, ha Basan en e bezh betek Salka,

¹² hag holl rouantelezh Og e Basan a rene en Ashtarod hag en Edrei, un nemorant eus ar Refaim. Moizez a bilas anezho hag o c'hasas kuit.

¹³ Hogen mibien Israel ne gasas ket kuit ar C'heshurianed hag ar Vaakatianed, met ar C'heshurianed hag ar Vaakatianed a zo chomet e-kreiz Israel betek hiziv.

¹⁴ Ha ne voe ket roet a hêrezh da veuriad Levi; ar profoù graet dre an tan d'an AOTROU Doue Israel a voe e hêrezh, evel m'en doa lavaret dezhañ.

¹⁵ Moizez a roas ul lodenn da veuriad mibien Ruben hervez o ziegezhioù.

¹⁶ O douaroù a voe adalek Aroer a zo war ribl froud an Arnon, hag ar gêr a zo e-kreiz ar froud, hag ar blaenenn e-kichen Medeba,

¹⁷ hag Hesbon hag hec'h holl gêrioù war ar blaenenn, Dibon, Bamod-Baal, Bet-Baal-Meon,

¹⁸ Jahaz, Kedemod, Mefaad,

¹⁹ Kirjataim, Sibma, Zered-Hashahar war venez an draonienn,

²⁰ Bet-Peor, krec'hioù ar Pisga, Bet-Jeshimod,

²¹ hag holl gêrioù ar blaenenn, hag holl rouantelezh Sihon roue an Amoreaned a rene en Hesbon; Moizez a bilas anezhañ gant priñsed Madian, Evi, Rekem, Zur, Hur ha Reba, a oa e dalc'h Sihon hag a oa o chom er vro.

²² Mibien Israel a lazhas gant barvenn ar c'hleze Balaam mab Beor, an divinour, e-touez ar re a voe lakaet d'ar marv ganto.

²³ Harz mibien Ruben a voe ar Jordan hag e harz. Hennezh e voe hêrezh mibien Ruben hervez o ziegezhioù, ar c'hêrioù-se hag o c'hêriadennoù.

²⁴ Moizez a roas ul lodenn da veuriad Gad, da vibien Gad, hervez o ziegezhioù.

²⁵ O douaroù a voe Jaezer, hag holl gêrioù Galaad, hag hanter vro mibien Ammon betek Aroer a zo a-dal da Rabba,

²⁶ hag adalek Hesbon betek Ramad-Mizpe ha Betonim, hag adalek Mahanaim betek harz Debir,

²⁷ hag en draonienn, Bet-Haram, Bet-Nimra, Sukkod, Zafon, nemorant rouantelezh Sihon roue Hesbon, ar Jordan a oa an harz betek penn Mor Kinnered en tu all d'ar Jordan, war-zu ar sav-heol.

²⁸ Hennezh e voe hêrezh mibien Gad hervez o ziegezhioù, ar c'hêrioù-se hag o c'hêriadennoù.

²⁹ Moizez a roas ul lodenn da hanter-veuriad Manase, da hanter-skourr mibien Manase, hervez o ziegezhioù.

³⁰ O douaroù a voe adalek Mahanaim ar Basan en e bezh, hag holl rouantelezh Og roue Basan, hag holl c'hêriadennoù Jair a zo e Basan, tri-ugent kêr.

³¹ Un hanter eus Galaad, Ashtarod hag Edrei, kêrioù rouantelezh Og e Basan, a voe da vibien Makir mab Manase, d'un hanter eus mibien Makir hervez o ziegezhioù.

³² Hennezh e voe an hêrezh a lodennas Moizez e plaenennoù Moab, en tu all d'ar Jordan, a-dal da Jeriko, war-zu ar sav-heol.

³³ Moizez ne roas ket a hêrezh da veuriad Levi, an AOTROU Doue Israel a voe o hêrezh, evel m'en doa lavaret dezho.