Jeremiaz 52 - Bibl Koad 21: Ar Bibl e Brezhoneg evit ar Vretoned

Pennad 52

¹ Ur bloaz warn-ugent e oa Sedesia pa zeuas da roue, hag e renas unnek vloaz e Jeruzalem. E vamm a oa anvet Hamutal merc'h Jeremiaz, eus Libna.

² Ober a reas ar pezh a zo fall dirak daoulagad an AOTROU, evel m'en doa graet Jojakim.

³ En abeg da gounnar an AOTROU a-enep Jeruzalem hag a-enep Juda e c'hoarvezas ma tistaolas anezho diwar e zremm. Ha Sedesia en em savas a-enep roue Babilon.

⁴ D'an navet bloaz eus e ren, d'an dekvet miz, d'an dekvet eus ar miz, e teuas Nebukadnezar roue Babilon gant e holl arme a-enep Jeruzalem, hag e kampjont a-enep dezhi, hag e savjont tosennoù en-dro dezhi.

⁵ Ha kêr a voe sezizet betek an unnekvet bloaz eus ar roue Sedesia.

⁶ D'ar pevare miz, d'an navet eus ar miz, e voe rust an naonegezh e kêr, ha ne oa ken a vara enni evit pobl ar vro.

⁷ Neuze un toull-freuz a voe graet da gêr, hag an holl dud a vrezel a dec'has hag a yeas er-maez eus kêr, da noz, dre hent an nor etre an div voger e-kichen liorzh ar roue, e-pad ma oa ar Galdeiz en-dro da gêr, hag ez ejont etrezek ar blaenenn.

⁸ Met arme ar Galdeiz a redas war-lerc'h ar roue hag e tapjont Sedesia e plaenennoù Jeriko. Hag e holl arme a stlabezas pell digantañ.

⁹ Kemer a rejont eta ar roue, hag e lakajont anezhañ da bignat etrezek roue Babilon e Ribla, e bro Hamad, e-lec'h ma voe barnet.

¹⁰ Roue Babilon a reas lazhañ mibien Sedesia dirak e zaoulagad, hag e reas lazhañ ivez holl bennoù Juda e Ribla.

¹¹ Neuze e reas broudañ e zaoulagad da Sedesia, hag ec'h ereas anezhañ gant chadennoù arem. Ha roue Babilon en kasas da Vabilon, hag en lakaas en toull-bac'h betek deiz e varv.

¹² D'an dekvet eus ar pempvet miz, en naontekvet bloaz eus Nebukadnezar roue Babilon, Nebuzaradan penn ar warded ha servijer roue Babilon a zeuas e-barzh Jeruzalem.

¹³ Deviñ a reas ti an AOTROU, ti ar roue hag holl diez Jeruzalem. An holl diez bras a voe devet dre an tan.

¹⁴ Hag holl arme ar Galdeiz, a oa gant penn ar warded, a ziskaras an holl vogerioù a oa en-dro da Jeruzalem.

¹⁵ Nebuzaradan penn ar warded a harluas hiniennoù eus an dud paourañ, an nemorant a oa chomet e kêr, ar re a oa en em rentet da roue Babilon, hag an nemorant eus an engroez.

¹⁶ Koulskoude Nebuzaradan penn ar warded a lezas hiniennoù a-douez ar re baourañ eus ar vro, evel gwinierien ha labourerien-douar.

¹⁷ Hag ar Galdeiz a lakaas a-dammoù ar c'holonennoù arem a oa e ti an AOTROU, ar sichennoù hag ar mor arem a oa e ti an AOTROU, hag e kasjont an holl arem ganto da Vabilon.

¹⁸ Kemer a rejont ivez ar c'haoterioù, ar palioù, ar mougerigoù, an hanafoù, al loaioù, hag an holl listri arem implijet evit ar servij.

¹⁹ Penn ar warded a gasas ivez gantañ ar c'hirinoù, an ezañsoueroù, an hanafoù, ar c'haoterioù, ar c'hantolorioù, al loaioù, ar c'hiboù, ar pezh a oa en aour hag ar pezh a oa en arc'hant.

²⁰ Diwar-benn an div golonenn, ar mor, hag an daouzek ejen arem a servije da sichennoù, en doa graet ar roue Salomon evit ti an AOTROU, ne oa ket anavezet pouez arem an holl draoù-se.

²¹ Diwar-benn ar c'holonennoù, uhelder pep kolonenn a oa triwec'h ilinad, hag ur gordenn a zaouzek ilinad a rae he zro; he zevder a oa pevar biz, hag e oa kleuz.

²² Bez' e oa dreist un dogenn arem. Uhelder an dogenn a oa pemp ilinad, war an dogenn e oa ur roued ha greunadez tro-dro, holl en arem. An eil kolonenn gant he greunadez a oa heñvel.

²³ Hag e oa c'hwezek greunadezenn ha pevar-ugent war bep tu, hag an holl c'hreunadez war ar roued tro-dro a oa kant.

²⁴ Penn ar warded a gemeras an aberzhour-meur Seraja, an eil-aberzhour Sofonia, ha tri diwaller an treuzoù.

²⁵ Hag eus kêr e kemeras ur spazhad a oa karget eus an dud a vrezel, ha seizh den eus ar re a wele dremm ar roue hag en em gave e kêr, ha penn-skrib an arme a engouestle pobl ar vro, ha tri-ugent den a-douez pobl ar vro en em gave e kêr.

²⁶ Nebuzaradan penn ar warded a dapas anezho hag o c'hasas da roue Babilon da Ribla.

²⁷ Roue Babilon a skoas warno hag o lazhas e Ribla, e bro Hamad. Evel-se Juda a voe kaset er-maez eus e vro.

²⁸ Setu ar bobl a voe harluet gant Nebukadnezar: D'ar seizhvet bloaz, tri mil tri Yuzev warn-ugent,

²⁹ d'an triwec'hvet bloaz eus Nebukadnezar, eizh kant daou zen ha tregont,

³⁰ d'an trede bloaz warn-ugent eus Nebukadnezar, Nebuzaradan penn ar warded a harluas seizh kant pemp Yuzev ha daou-ugent. An holl dud-se a voe eta pevar mil c'hwec'h kant.

³¹ D'ar seizhvet bloaz ha tregont eus harlu Jojakin roue Juda, d'an daouzekvet miz, d'ar pempvet warn-ugent eus ar miz, Evilmerodak roue Babilon, er bloaz ma teuas da roue, a adsavas penn Jojakin roue Juda, hag a dennas anezhañ eus an toull-bac'h.

³² Komz a reas outañ gant madelezh, hag e lakaas e dron a-us da dron ar rouaned a oa gantañ e Babilon.

³³ Goude ma voe cheñchet e zilhad prizonier dezhañ, e tebras dalc'hmat dirazañ e-pad holl amzer e vuhez.

³⁴ Peadra e vuhez pemdeziek a voe roet dezhañ a-berzh roue Babilon, bemdez, betek deiz e varv, e-pad holl amzer e vuhez.