Adlezenn 5 - Bibl Koad 21: Ar Bibl e Brezhoneg evit ar Vretoned

Pennad 5 An dek gourc'hemenn

¹ Moizez a zastumas holl Israel hag a lavaras: Selaou, Israel, ar reolennoù hag ar barnedigezhioù a zisklêrian hiziv d'ho tivskouarn. O deskit, o mirit ha grit diouto.

² An AOTROU hon Doue en deus graet ganeomp un emglev en Horeb.

³ N'eo ket gant hon tadoù en deus graet an AOTROU an emglev-se, met ganeomp-ni a zo amañ hiziv, bev holl.

⁴ An AOTROU a gomzas ouzhoc'h dremm ouzh dremm war ar menez, a-greiz an tan.

⁵ En em zerc'hel a raen neuze etre an AOTROU ha c'hwi evit kemenn deoc'h komz an AOTROU, aon ho poa bet rak an tan ha ne oac'h ket pignet war ar menez. Lavarout a reas:

⁶ Me eo an AOTROU da Zoue, en deus tennet ac'hanout eus bro Ejipt, eus an ti sklavelezh.

⁷ Ne'z po ket doueoù all dirazon.

⁸ Ne ri ket dit na skeudenn gizellet, na taolennadur eus an traoù a zo d'an nec'h en neñvoù, a zo d'an traoñ war an douar, hag a zo en doureier dindan an douar;

⁹ ne stoui ket dirazo ha ne serviji ket anezho, rak me eo an AOTROU da Zoue, un Doue gwarizius a gastiz direizhder an tadoù war ar vugale betek an trede hag ar pevare rumm eus ar re a gasa ac'hanon,

¹⁰ hag a ra trugarez betek ar milvet rumm d'ar re a gar ac'hanon hag a vir va gourc'hemennoù.

¹¹ Ne gemeri ket anv an AOTROU da Zoue en aner, rak an AOTROU ne zalc'ho ket evit didamall an hini en devo kemeret e anv en aner.

¹² Mir deiz ar sabad evit e santelaat, evel m'en deus gourc'hemennet dit an AOTROU da Zoue;

¹³ labourat a ri c'hwec'h devezh hag e ri da holl oberoù,

¹⁴ met ar seizhvet deiz eo sabad an AOTROU da Zoue; ne ri labour ebet, na te, na da vab, na da verc'h, na da servijer, na da vatezh, na da ejen, na da azen, nag hini ebet eus da loened, na da ziavaeziad a zo e-barzh da zorojoù, evit ma tiskuizho da servijer ha da vatezh.

¹⁵ Dalc'h soñj ez out bet sklav e bro Ejipt, hag en deus lakaet ac'hanout da vont kuit ac'hane an AOTROU da Zoue dre un dorn kreñv hag ur vrec'h astennet, setu perak en deus gourc'hemennet dit an AOTROU da Zoue mirout deiz ar sabad.

¹⁶ Enor da dad ha da vamm, evel m'en deus gourc'hemennet dit an AOTROU da Zoue, evit ma vo hiraet da zeizioù ha ma vi eürus war an douar a ro dit an AOTROU da Zoue.

¹⁷ Ne vuntri ket.

¹⁸ Ne ri ket a avoultriezh.

¹⁹ Ne laeri ket.

²⁰ Ne lavari ket a falstesteni a-enep da nesañ.

²¹ Ne c'hoantai ket gwreg da nesañ, ne avii ket ti da nesañ, nag e bark, nag e servijer, nag e vatezh, nag e ejen, nag e azen, na tra ebet a vefe da'z nesañ.

²² An AOTROU a lavaras ar c'homzoù-se d'an holl vodadenn war ar menez a-greiz an tan, ar c'houmoul hag an deñvalijenn, dre ur vouezh kreñv, ha netra ouzhpenn. Hag e skrivas anezho war ziv daolenn vaen a roas din.

²³ Pa hoc'h eus klevet ar vouezh a-greiz an dic'houloù, ar menez o teviñ gant tantezioù, tostaet oc'h ouzhin gant ho pennoù a veuriadoù hag hoc'h henaourien,

²⁴ o lavarout: Setu, an AOTROU hon Doue en deus diskouezet deomp e c'hloar hag e vraster, klevet hon eus e vouezh a-greiz an tan, gwelet hon eus hiziv penaos e c'hell Doue komz ouzh un den, hag e chom bev an den-se.

²⁵ Ha bremañ, perak e varvfemp? Rak an tan bras-se a guzumo ac'hanomp! Mar klevomp c'hoazh mouezh an AOTROU hon Doue, e varvimp.

²⁶ Piv eo an den hag en defe klevet mouezh an Doue bev o komz a-greiz an tan, hag a vefe chomet bev?

²⁷ Tosta, te, ha selaou kement a lavaro an AOTROU hon Doue, ha goude e tegasi deomp kement en devo lavaret an AOTROU hon Doue, ha ni a selaouo ha ni a raio diouzh-se.

²⁸ An AOTROU a glevas trouz ho komzoù pa hoc'h eus lavaret anezho. An AOTROU a lavaras din: Klevet em eus trouz komzoù ar bobl pa o deus lavaret anezho, mat eo ar pezh o deus lavaret.

²⁹ Ra o devo atav an hevelep kalon evit va doujañ hag evit mirout va gourc'hemennoù, hag e vint eürus, int hag o mibien, da viken.

³⁰ Kae ha lavar dezho: Distroit d'ho teltennoù,

³¹ met te a chomo amañ ganin, hag e lavarin dit an holl c'hourc'hemennoù, reolennoù ha barnedigezhioù a zeski dezho evit ma raint diouto er vro a roan dezho da hêrezh.

³² Mirit ar pezh en deus gourc'hemennet an AOTROU ho Toue deoc'h ha grit dioutañ, ne zistroiot nag a-zehou nag a-gleiz.

³³ Kerzhout a reot en holl hent en deus gourc'hemennet an AOTROU ho Toue, evit ma vevot, ma vint eürus ha ma vo hiraet ho teizioù war an douar a berc'hennot.