2 Samuel 24 - Bibl Koad 21: Ar Bibl e Brezhoneg evit ar Vretoned

Pennad 24

¹ Kounnar an AOTROU a voe entanet c'hoazh a-enep Israel, hag e vountas David a-enep dezho en ur lavarout: Kae, gra an niveradeg eus Israel hag eus Juda.

² Hag ar roue a lavaras da Joab penn an arme, a oa en e gichen: Kae, kerzh dre holl veuriadoù Israel, adalek Dan betek Beer-Sheba, gra an niveradeg eus ar bobl, evit ma ouezin niver ar bobl.

³ Joab a respontas d'ar roue: Ra fello d'an AOTROU da Zoue kreskiñ e bobl kement, ha kant gwech kement ha ma'z eo bremañ, ha ra welo daoulagad ar roue va aotrou kement-se! Met perak e kemer ar roue va aotrou plijadur en dra-se?

⁴ Koulskoude komz ar roue a c'hounezas war Joab ha war bennoù an arme. Ha Joab ha pennoù an arme a yeas a-zirak ar roue evit ober an niveradeg eus pobl Israel.

⁵ Treuziñ a rejont eta ar Jordan hag e kampjont en Aroer, a-zehou d'ar gêr a zo e-kreiz traonienn Gad ha war-zu Jaezer.

⁶ Hag e teujont e Galaad hag er vro izeloc'h eget Hodshi. Goude e teujont da Zan-Jaan hag en-dro da Sidon.

⁷ Dont a rejont ivez da greñvlec’h Tir hag en holl gêrioù an Hevianed hag ar Gananeiz, hag ec'h echujont dre greisteiz Juda e Beer-Sheba.

⁸ Evel-se ec'h ergerzhjont an holl vro, hag e tistrojont da Jeruzalem a-benn nav miz hag ugent deiz.

⁹ Joab a roas d'ar roue roll niveradeg ar bobl. Bez' e oa en Israel eizh kant mil den a vrezel o tennañ ar c'hleze, hag e Juda pemp kant mil den.

¹⁰ Met David a voe tamallet en e galon goude m'en doa niveret ar bobl, hag e lavaras David d'an AOTROU: Graet em eus ur pec'hed bras oc'h ober an dra-se, ha bremañ, o AOTROU, pardon me az ped direizhder da servijer, rak graet em eus evel un diskiant!

¹¹ Pa savas David diouzh ar beure, komz an AOTROU a voe disklêriet d'ar profed Gad, gwelour David, o lavarout:

¹² Kae ha lavar da Zavid: Evel-henn e komz an AOTROU: Tri zra a ginnigan dit, dibab unan anezho, hag e rin hervezañ.

¹³ Gad a zeuas eta da gavout David hag en roas da anavezout dezhañ o lavarout: Petra a fell dit e c'hoarvezfe ganit, pe seizh vloaz a naonegezh ez pro, pe tri miz o tec'hout dirak da enebourien hag int da redek war da lerc'h, pe tri devezh a vosenn ez pro? Bremañ dit da brederiañ ha da welout ar pezh am eus da respont d'an hini en deus va c'haset.

¹⁴ David a respontas da C'had: Me a zo en un enkrez bras. Ra gouezhin bremañ etre daouarn an AOTROU, rak e drugarezioù a zo bras, ha ma ne gouezhin ket etre daouarn an dud.

¹⁵ Hag an AOTROU a gasas ar vosenn war Israel, adalek ar mintin betek an amzer merket, hag e varvas er bobl adalek Dan betek Beer-Sheba dek mil den ha tri-ugent.

¹⁶ Met pa astennas an ael e zorn war Jeruzalem evit he distrujañ, an AOTROU en doe keuz eus an droug-se, hag e lavaras d'an ael a zistruje ar bobl: A-walc'h! Tenn bremañ da zorn! Ael an AOTROU en em zalc'he e-kichen leur Arauna ar Jebuzad.

¹⁷ David, o welout an ael a skoe war ar bobl, a gomzas ouzh an AOTROU hag a lavaras: Setu, me am eus pec'het ha graet gwall-fall, met an deñved-mañ, petra o deus graet? Ra vo da zorn warnon, me az ped, ha war di va zad.

¹⁸ Hag en deiz-se e teuas Gad da gavout David hag e lavaras dezhañ: Pign ha sav un aoter d'an AOTROU war leur Arauna ar Jebuzad.

¹⁹ David a bignas eta hervez komz Gad, evel m'en doa gourc'hemennet an AOTROU.

²⁰ Arauna a sellas hag a welas ar roue hag e servijerien o tont d'e gavout. Arauna a yeas er-maez hag a stouas dirak David, e zremm d'an douar.

²¹ Arauna a lavaras: Perak e teu ar roue va aotrou da gavout e servijer? David a respontas: Da brenañ da leur, evit sevel amañ un aoter d'an AOTROU, ma harzo ar gouli-mañ e-touez ar bobl.

²² Arauna a lavaras da Zavid: Ra gemero ar roue va aotrou, ha ra ginnigo ar pezh a gavo mat. Setu aze an ejened evit al loskaberzh, hag ar c'hirri gant stern an ejened evel koad.

²³ O roue, Arauna o ro holl d'ar roue! Hag Arauna a lavaras d'ar roue: An AOTROU da Zoue, da vezañ a-du ganit!

²⁴ Met ar roue a lavaras da Arauna: Nann, fellout a ra din o frenañ diganit evit ur priz, ha ne ginnigin ket d'an AOTROU va Doue loskaberzhoù na goustont netra din. Evel-se e prenas David al leur hag an ejened evit hanter-kant sikl arc'hant.

²⁵ Ha David a savas eno un aoter d'an AOTROU, hag e kinnigas loskaberzhoù hag aberzhoù a drugarekadennoù, hag an AOTROU a voe peoc'haet e-keñver ar vro, hag ar gouli a baouezas en Israel.