1 Samuel 16 - Bibl Koad 21: Ar Bibl e Brezhoneg evit ar Vretoned

Pennad 16

¹ An AOTROU a lavaras da Samuel: Betek pegeit e ri kañv da Saül, pa em eus e daolet kuit evel roue war Israel? Leugn da gorn gant eoul ha kae. Me a gaso ac'hanout da gavout Jese eus Betlehem, rak gwelet em eus unan e vibien evel roue evidon.

² Samuel a lavaras: Penaos ez in? Saül a glevo, hag am lazho. An AOTROU a lavaras: Kemer a ri ganit un annoar, hag e lavari: Deuet on da aberzhiñ d'an AOTROU .

³ Hag e pedi Jese d'an aberzh, hag e roin dit da anavezout ar pezh az po d'ober, hag ec'h olevi evidon an hini a lavarin dit.

⁴ Samuel a reas evel m'en doa lavaret an AOTROU , hag e teuas da Vetlehem. Henaourien kêr a zeredas spouronet dirazañ en ur lavarout: Hag e teuez evit hor mad?

⁵ Hag e respontas: Evit ho mad. Deuet on da aberzhiñ d'an AOTROU . En em santelait, ha deuit ganin d'an aberzh. Hag e reas da Jese ha d'e vibien en em santelaat, hag o fedas d'an aberzh.

⁶ Hag evel ma'z aent, e welas Eliab, hag e lavaras ennañ e-unan: A-dra-sur olevad an AOTROU a zo dirazañ.

⁷ Met an AOTROU a lavaras da Samuel: Na laka ket evezh ouzh e zremm nag ouzh uhelder e vent, rak taolet em eus kuit anezhañ. An AOTROU ne wel ket evel ma wel an den. An den a sell ouzh diavaez an dud, met an AOTROU a sell ouzh ar galon.

⁸ Jese a c'halvas Abinadab, a lakaas da dremen dirak Samuel, a lavaras: An AOTROU n'en deus ket e zibabet.

⁹ Jese a lakaas Shamma da dremen, hag e lavaras: An AOTROU n'en deus ket e zibabet.

¹⁰ Jese a lakaas e seizh mab da dremen dirak Samuel, ha Samuel a lavaras da Jese: An AOTROU n'en deus ket o dibabet.

¹¹ Ha Samuel a lavaras da Jese: Ar re-se eo da holl vibien? Hag e respontas: Menel a ra c'hoazh ar yaouankañ, met emañ o vêsa an deñved. Samuel a lavaras da Jese: Kas d'e gerc'hat, ned aimp ket ouzh taol ken na vo erru amañ.

¹² Kas a reas eta d'e gerc'hat. Melegan e oa, gant daoulagad kaer hag un dremm vrav. An AOTROU a lavaras da Samuel: Sav hag olev-eñ, rak eñ eo.

¹³ Neuze Samuel a gemeras ar c'horn eoul hag a olevas anezhañ e-touez e vreudeur. Hag adalek an deiz-se e krogas Spered an AOTROU en David. Ha Samuel a savas hag a yeas da Rama.

¹⁴ Spered an AOTROU en em dennas eus Saül, hag ur spered fall a-berzh an AOTROU a drubuilhas anezhañ.

¹⁵ Servijerien Saül a lavaras dezhañ: Setu, ur spered fall a-berzh Doue a drubuilh ac'hanout.

¹⁶ Ra gomzo an aotrou; da servijerien, a zo dirazout, a glasko un den a ouezo c'hoari gant an delenn. Pa zeuio warnout ar spered fall a-berzh Doue, e c'hoario gant e zorn, hag e vi diboaniet.

¹⁷ Saül a lavaras d'e servijerien: Kavit din eta un den a oar c'hoari mat, ha degasit-eñ din.

¹⁸ Unan eus e servijerien a respontas o lavarout: Setu, gwelet em eus ur mab da Jese eus Betlehem, hag a oar c'hoari; un den kalonek ha nerzhus, ur brezelour eo, a gomz mat, un den kaer, hag an AOTROU a zo gantañ.

¹⁹ Saül a gasas kannaded da Jese, da lavarout: Kas din David da vab hag a zo gant an deñved.

²⁰ Jese a gemeras un azen, a sammas gant bara, ul lestrad gwin, ur menn-gavr laezh, hag o c'hasas da Saül, dre Zavid e vab.

²¹ David a zeuas da gavout Saül, hag en em zalc'has dirazañ. Ha Saül a garas anezhañ, hag e teuas an hini a zoug e armoù.

²² Saül a gasas da lavarout da Jese: Da bediñ a ran, ma chomo David em servij, rak kavet en deus trugarez dirak va daoulagad.

²³ Pa veze war Saül ar spered fall a-berzh Doue, David a gemere an delenn, hag e c'hoarie warni gant e zorn, ha Saül a veze diboaniet hag aesaet, rak ar spered fall en em denne dioutañ.