1 Rouaned 15 - Bibl Koad 21: Ar Bibl e Brezhoneg evit ar Vretoned

Pennad 15

¹ En triwec'hvet bloaz eus ar roue Jeroboam mab Nebad, e teuas Abijam da roue war Juda.

² Ren a reas tri bloaz e Jeruzalem. E vamm a oa anvet Maaka merc'h Abisalom.

³ Kerzhout a reas en holl bec'hedoù en doa graet e dad a-raok dezhañ, hag e galon ne voe ket eeun e-keñver an AOTROU e Zoue, evel ma oa bet kalon David e dad.

⁴ Met abalamour da Zavid, an AOTROU e Zoue a roas ul lamp dezhañ e Jeruzalem, en ur sevel e vab war e lerc'h hag en ur lezel Jeruzalem da badout,

⁵ dre m'en doa graet David ar pezh a zo reizh dirak daoulagad an AOTROU, hag e-pad e holl vuhez ne zistroas ket eus kement en doa gourc'hemennet, nemet en afer Uri an Hitit.

⁶ Ha brezel a voe etre Roboam ha Jeroboam, e-pad holl amzer o buhez.

⁷ Diwar-benn nemorant oberoù Abijam ha kement a reas, kement-se ha n'eo ket skrivet e levr danevelloù rouaned Juda? Ha brezel a voe etre Abijam ha Jeroboam.

⁸ Hag Abijam a c'hourvezas gant e dadoù, hag e voe sebeliet e kêr David. Hag Asa e vab a renas en e lec'h.

⁹ En ugentvet bloaz eus Jeroboam roue Israel, e teuas Asa da roue war Juda.

¹⁰ Ren a reas ur bloaz ha daou-ugent e Jeruzalem. E vamm a oa anvet Maaka merc'h Abisalom.

¹¹ Asa a reas ar pezh a zo reizh dirak daoulagad an AOTROU, evel David e dad.

¹² Lemel a reas eus ar vro ar baotred oc'h en em reiñ d'ar gasterezh, hag e lamas an holl idoloù o doa graet e dadoù.

¹³ Ha zoken e lamas digant e vamm Maaka he lesanv a rouanez, dre m'he doa graet un idol evit Ashera. Asa a ziskaras hec'h idol, hag en devas e-kichen froud Kedron.

¹⁴ Met an uhellec'hioù ne voent ket lamet. Koulskoude kalon Asa a voe eeun e-keñver an AOTROU e-pad e holl zeizioù.

¹⁵ Lakaat a reas e ti an AOTROU an traoù a oa bet santelaet gant e dad hag ar pezh en doa santelaet e-unan, arc'hant, aour ha listri.

¹⁶ Ha brezel a voe etre Asa ha Baesha roue Israel, e-pad holl amzer o buhez.

¹⁷ Baesha roue Israel a bignas a-enep Juda, hag e savas Rama, evit herzel ouzh an dud da zont pe da vont etrezek Asa roue Juda.

¹⁸ Asa a gemeras an holl arc'hant hag aour chomet e teñzorioù ti an AOTROU hag e teñzorioù ti ar roue, hag a roas anezho d'e servijerien. Hag ar roue Asa o c'hasas da Ven-Hadad mab Tabrimon, mab Hezjon, roue Siria a oa o chom e Damask, en ur lavarout:

¹⁹ Bez' ez eus un emglev etre te ha me, evel etre va zad ha da hini. Setu e kasan dit ur prof arc'hant hag aour, kae, torr da emglev gant Baesha roue Israel, evit ma pellaio diouzhin.

²⁰ Ben-Hadad a selaouas ouzh ar roue Asa, hag e kasas pennoù e arme a-enep kêrioù Israel. Hag e skojont war Ijon, Dan, Abel-Bed-Maaka, Kinnerod a-bezh, hag holl vro Neftali.

²¹ Adalek ma ouezas-se Baesha, e paouezas da sevel Rama hag e chomas e Tirza

²² Neuze ar roue Asa a reas embann dre Juda a-bezh m'o defe gwitibunan da gas ar vein hag ar c'hoad eus Rama, a lakae Baesha da sevel. Ar roue Asa e savas ganto Geba e Benjamin ha Mizpa.

²³ Diwar-benn nemorant oberoù Asa, e holl gurioù ha kement a reas, ar c'hêrioù a savas, kement-se ha n'eo ket skrivet e levr danevelloù rouaned Juda? Hag en amzer e gozhni e voe klañv e dreid.

²⁴ Hag Asa a c'hourvezas gant e dadoù, hag e voe sebeliet gant e dadoù e kêr David e dad. Ha Jozafad e vab a renas en e lec'h.

²⁵ En eilvet bloaz eus Asa roue Juda, e teuas Nadab mab Jeroboam da roue war Israel. Ren a reas daou vloaz war Israel.

²⁶ Ober a reas ar pezh a zo fall dirak daoulagad an AOTROU, hag e kerzhas en hent e dad, hag er pec'hedoù en doa lakaet Israel da bec'hiñ drezo.

²⁷ Baesha mab Akija, eus ti Isakar, en em savas en e enep, ha Baesha a skoas warnañ e Gibbeton, a oa d'ar Filistined, e-pad ma sezize Gibbeton Nadab hag holl Israel.

²⁸ Baesha a lakaas anezhañ d'ar marv en trede bloaz eus Asa roue Juda. Hag e renas en e lec'h.

²⁹ Kerkent ha ma voe roue, e skoas war holl di Jeroboam, ha ne lezas ene ebet da Jeroboam hep e zistrujañ, hervez ar gomz en doa an AOTROU disklêriet dre e servijer Akija eus Silo,

³⁰ en abeg da bec'hedoù Jeroboam, en deus pec'het ha lakaet Israel da bec'hiñ, o kounnariñ an AOTROU Doue Israel.

³¹ Diwar-benn nemorant oberoù Nadab ha kement a reas, kement-se ha n'eo ket skrivet e levr danevelloù rouaned Israel?

³² Ha brezel a voe etre Asa ha Baesha roue Israel, e-pad holl amzer o buhez.

³³ En trede bloaz eus Asa roue Juda, e teuas Baesha mab Akija da roue war holl Israel e Tirza, hag e renas pevar bloaz warn-ugent.

³⁴ Ober a reas ar pezh a zo fall dirak daoulagad an AOTROU, hag e kerzhas en hent Jeroboam, hag er pec'hedoù en doa lakaet Israel da bec'hiñ drezo.