JEREMIA 2 - BUKUIT NE TILIIL Sireet ne Dutero Kanon

Koesyo Israel kogas iit Kamuktaindet ne Toroor

¹ Ki nyoonjo ng'olyootap Kamuktaindet ne Toroor, koleenjo,

² “Ui, ititenji Jerusalem, ileenji, mwaei Kamuktaindet ne Toroor: ‘Abwaatin agobo myeeindap ming'inateng'ung', chamyetap katunisyeng'ung', ko uu ye ki isubwo eng' surkwen, eng' emet ne ki ma kegolei.’

³ Ki itabanat Israel agobo Kamuktaindet ne Toroor, tongoanigap ruratennyi. Tugul che amei ineendet kiityin ng'oogisto, nyoonjin yaityet icheek,” mwaei Kamuktaindet ne Toroor.

Tengektap Israel

⁴ Ogas ng'olyootap Kamuktaindet ne Toroor, ee kootap Jakobo, ak ortinwek tugul che po kootap Israel.

⁵ Mwaei Kamuktaindet ne Toroor kole: “Nee kiit ne ma po iman ne kinyoorcha kwanisyekwok, kot kolooitena, ak koba kosubot kamuktaik che ma tilei kiy, ak kagoek icheek puch?

⁶ Ama teebegei icheek kole, ‘Mi ano Kamuktaindet ne Toroor ne ki imutwech kemong'u eng' emetap Misiri, ne ki indoiywech kebun surkwen, kebun emet ne surkwen ak ne po keriingonik, kebun emetap kemeut ak imenindo ne oo, kebun emet ne ma punei chii, ole ma menyei chii?’

⁷ Ki amutwak obwa emet ne chaang' amitwogik, si kobiit oam logoekyik ak myeeindonyi; ago kingo it emonooto, ong'wanit emennyu, ak oyai porotennyu koek kiit ne kiwechei.

⁸ Ma teep tisiik kole, mi ano Kamuktaindet ne Toroor?” Ma naa icheek che tinyei ng'atuutik. Ki ingelelja pounik ak icheek, ak ki maotensee maotik Baal, ak kobendatee tuguuk che ma ki nyoorunee kelunet.

⁹ Mwaei Kamuktaindet ne Toroor, “Ta arwookseiwok anyun, agot lagogap lagokwok arwooksechini.

¹⁰ Oba olande ngeguusyegap Kitim ak ogeer, oyookte piik koba Kedar kooro komyee; kogeer ngo ki kobiit kiy ne uu noo.

¹¹ Tos ki kowal `pororyo kamuktaikyik, agot ngo ma kamuktain? Ago ki kowal piikyuk toroornatennywa agobo kiit ne ma koonu kelunet.

¹² Okwong'ye agobo niito, ee okweek kipsengwet, oaragense ak ogany koiyeak korotiik kot,” mwaei Kamuktaindet ne Toroor.

¹³ Ki koyai piikyuk yaitwogik aeng': ki kometo anee ne aa kondametutap peek che saptos, ak kobaljigei keriingonik, keriingonik che ki koterogis, che ma imuuchi kotebee peek.

Kiit ne pitunee kayaneetap Israel ne ma nyolu

¹⁴ Tos otwogin Israel? Tos ineendet ko otwogin ne ki kisikyi kaa? Amu nee anyun si keluul?

¹⁵ Kigoborisenji `ng'etuunyik ineendet, ak komororso miising'. Kigong'em emennyi koek karaatya, ki kebeel nganasookyik, ak ma komenyei chii.

¹⁶ Kogeny, chooto mi Nop ak Tapanes, ko ki kotui meting'ung' parak.

¹⁷ Tos ki ma icheeng'jige niito, amu ki imete Kamuktaindet ne Toroor Kamuktaindeng'ung', ye ki imutin eng' ooreet?

¹⁸ Tos nee anyun ne inyooru ye wendi Misiri, iee peegap Nail? Anan nee ne inyooru ye wendi Assyria, iee peegap Euprates?

¹⁹ Pirin yaityeng'ung', ak kogerin kong' mastaeng'ung'. Nai ak iguiye ile kiit ne ya ak ko ng'waan, eng' imete Kamuktaindet ne Toroor Kamuktaindeng'ung', ametinye kaiyweisyet ne iywea, mwaei Kiptaiyat, Kamuktaindet ne Toroor ne po lugoosyek.

Ma itoroori `Israel Kamuktaindet ne Toroor

²⁰ Amu ki airii choging'ung' eng' peetuusyek che po keny, ak ang'etii anooguk ak ki imwa ile, “Maotin,” amu ki ing'uruuge eng' tulweet age tugul ne kooi ak eng' keetit age tugul ne tuon, iyae kugoinatet.

²¹ Ago kiga amiinin inyee ko uu keetitap sabibuk ne lewenot, keswoot ne po iman. Kilya anyun si iwalage iegu keetit ne ya ne mangen?

²² Amu agot ngiunegei munyat, ak iboisyee sabunit ne oo, ko taagu kora yaityeng'ung' eng' tainnyu, mwaei Kiptaiyat Kamuktaindet ne Toroor.

²³ Imuktoi ano anyun ile, “Ma aa murwoon, ma asup Baalik”? Keer oreng'ung' eng' atebweet, nai kiit ne kaiyai. Ii moitap tambeesyet ne chepchep ne isubi ortinwekyik,

²⁴ oloitigeet ne ingen surkwen, ne tabei koristo eng' magennyi. Ng'oo ne imuuchi koweekta eng' ye mi, eng' peetuusyekyik? Mang'etos icheek tugul che cheeng'ei ineendet. Nyooru `icheek ineendet eng' arawennyi.

²⁵ Amat kobetyi kweiyot keeldong'ung', anan koam melelda moktang'ung'. Ago ki imwa ile, ma tilei kiy kamang'unet. Amu ki acham toek ak asubi icheek.

Nyoljin pireet Israel

²⁶ Ko uu ye ililani choriindet ko kaginyoor, ko uu nooto ililani kootap Israel. Ililoni icheeget, laitorinikwak ak pounikwak, tisiikwak ak maotikwak,

²⁷ che leenjin subenet, “Ii abba.” Ak koleenji koita, “Ki isicha.” Amu ki kotuktocha patai, ama tokyagei. Ago mwaei eng' peetuutap nyalildanywa kole “Ng'eet ak isarwech!”

²⁸ Mi ano kanamonik, che ki iyachigei? Ingong'eetyo icheek, ngot komuuchi kosaruun eng' peetuusyegap nyalildang'ung'. Amu ko uu ole tee koitetap nganasoguk, ko uu nooto kanamoniguk, ee Judah.

²⁹ Amu nee si ogaigaa? Ki ongelelja okweek tugul, mwaei Kamuktaindet ne Toroor.

³⁰ Ki abir lagokwok puch, ma cham icheeget katigonet. Kigobar rotweng'ung' po chok maotikwok, ko uu ng'etundo ne ng'emisyei.

³¹ Ee ibini, ogas ng'olyootap Kamuktaindet ne Toroor! Tos ki aegu emetap melewet ne oo eng' Israel? Amu nee anyun si komwa piikyuk kole, “Ki kityaachech, ma kebwane kogeny ole imi?”

³² Tos imuuchi chepto koutye tuguukyik che po lelesta? Anan koutye murereet ngoroikyik? Ago kigoutyeno piikyuk eng' peetuusyek che ma iitoksei?

³³ Ichoptoi ano oreng'ung' si icheeng' chamyet! Amu nee, si ko ki ineet, kwonyiik che yaacheen ortinweguk.

³⁴ Kogeny, ko miitei ngoroiguk, korotiigap kibananook che ma tinyei tengek. Ma inyoorchi icheek ole ki kobutok. Ago eng' chuuto tugul,

³⁵ imwae ile, “Ma tinyei tengek; kigoistoenagei iman nereegekyik.” Keero, arwoogun, amu imwae ile, “Tom ayai tengek.”

³⁶ Amu nee si iombenote, iwalawali pandang'ung'? Kigoonin ililan agobo Misiri, ko uu ye ki kigoonin ililan agobo Assyria.

³⁷ Imandoe ineendet agine, inamoti meting'ung'. Amu ki koeesyo Kamuktaindet ne Toroor kamang'unosyekwok, ak meboree chooto.