Máciya 3 - Jola-Kasa

Kawaaleyaku kata Saŋ Batiis

¹ Li baj simit, ánayine akee an koone Saŋ Batiis li abil alako li kayiinaayaku kata etaamayi yata Súde, min anaak awaale bo aan:

² — Jikat kahoofoo, min jítiiwo jiŋa’ buloŋ buwunkul, mata Jáyiiyaju jata Ateemit jíkoojulo!

³ Esay ammuu afulofet, lalollob mata Saŋ aan: — Laale hulimahu hata anawu abaŋulowemuu li kayiinaayaku aan: «Jíhosul bútinabu boot li Amaaŋenawu! Jikaanool útin wacole!»

⁴ Búkokowabu bata Saŋ, buhal eñonkom búkaanumi. Ban li anaak akoko kanaal kata kabaŋ li hukenjool. Saŋ bakos li múkum lanaake atiñ.

⁵ Muñeˈe bukanabuku kakinumuu li ésukayi yata Yeelusalem, li kata etaamayi yata Súde feh, li kakinumuu feh kukooj katunkaku kan koonemuu Suuludeŋ, li kujow boot bata Saŋ.

⁶ Nan kuŋejumuu, li kuheb uhoofoolawu wooliil hákil ésukayi feh, min Saŋ ábatiiseyiil li katunkaku kaaneyimuu Suuludeŋ.

⁷ Nan Saŋ ajukumuu Kufaaliisiyeŋ li Kusaduusiyeŋ kameeŋe li kubil boot min ábatiiseyiil, li aaniil: — Sil̥aal̥akase! Ayimaa ahebuluul buu jóomi li jikaan min jifak li katekaku kaanomuu li ebil kata etindihuuñayi yata Ateemit?

⁸ Muñeˈe kama jikaan majake, min jíhiis kaanaku jibabbaj buloŋ buwunkul.

⁹ Ban jakum jibuntoolo min joon: «Abulaham ammuu átuubawoli ahaan.» Mata fan ilobuul kaanaku, Ateemit layilo áfulenumul li kuyitikaku unku bañiil bata Abulaham!

¹⁰ Jíkaanum, hufiikumahu hukaani huban tin huhaalahu hata unuunukenawu feh boot kafalen. Kama bunuunuken banooban baatutumuu bubaj ebukoolum yajake, fan bufaleni beten li sambun.

¹¹ Injé, li mal̥egenamu, li mal li bátiisewumuul boot káhiis kaanaku jibeebet búsol uhoofoolawu wooluul, min jiŋa’ buloŋ buwunkul. Bale anawu ammuu li abil búsolom, lahaŋom sembe. Itookut min ífulen sidallaasu soola. Akila fan ábatiisewuul li Buyinumabu Banabaabu, li sambun.

¹² Káweyumaku koola kunku li kaŋenool. Fan awuu ekaakayi yoola ejow éfu’ kis, min aheefen edenfeteŋayi, ban li awuu yo ahahen li bulaŋen. Bale búhulabu fan ásu’ bó li sambun sáhokoweliit.

Saŋ li ábatiise Yéesu

¹³ Muñeˈe nan Saŋ alakomuu kábatiisaaku kata bukanabuku, Yéesu li abilumul li etaamayi yata Gálile, abil atook Saŋ tin katunkaku kaaneyimuu Suuludeŋ, bájum Saŋ li ábatiisewool.

¹⁴ Bale Saŋ li afan aanool a’aa’, aban li akit aan Yéesu: — Kama buu nokoole awu li ubil boot mín ínje íbatiiseyi, ban awu ooteenumuu úbatiisewom?

¹⁵ Bale Yéesu li aan Saŋ: — Awu ufan ukat bo min úbatiisewom, mata muñaˈa lóotimuu ukaanaal min nab loon Ateemit afañumuu. Mal̥egen Saŋ li akat bo min ábatiise Yéesu.

¹⁶ Yéesu li ayaan áfulul li malamu nan Saŋ ábatiisewoolumuu aban. Muñeˈe emitayi li ébabulo. Yéesu li ajuk Buyinumabu bata Ateemit li búwalowul li kambu kata éleebaan bubil bulako li akila.

¹⁷ Esúkayi li ejam hulim háfulumulo li emitayi haane: «Laalu añoolom an íboolimuu ŋáa’. Buyinumom feh li akila likaan bo.»