Bakaanelabu 8 - Jola-Kasa

¹ Muñeˈe Sóol lafanfañ min kumukumuu Ecen. Li baj li hunakahu unhu hanolahu, jálaaten jáamak li Ejanguwayi yata Yeelusalem. Káyinenumuu li Yéesu feh li kuyiisoo kujow boot li etaamayi yata Súde li yata Samali, jow saŋo Kufootalaku.

Sóol li álaaten ejanguwayi

² Kánayine káyinene li Ateemit li kubil kuŋa’ Ecen kujow kuhok, ban li kul̥okool ŋáa’.

³ Bale Sóol, li alako kakajen ejanguwayi. Li anaak anoken li siluufasu ajow ájokumul ló kánayinaabuku li kanaalaabuku káyinenumuu li Yéesu, ajow akul̥.

Fílib li awaale Hulimahu Hásuumaahu li etaamayi yata Samali

⁴ Muñeˈe bukanabuku káyinenumuu kan kuyiisumuu, li kunaak kujow li sísukasu feh min kuwaale Hulimahu Hásuumaahu.

⁵ Fílib akila li ajow boot li ésukayi yáamakayi yata Samali, ajow awaale mata Afakenaawu bukanabuku kakin dómuu.

⁶ Búsukabu foof bo feh li bukaan sifintuyiil li kulimaku kan Fílib alakoyiilumuu elobayi, nan kujantenoolumuu ban li kujuk búhiisenumabu bájaahalenimuu ban alakomuu kakaanaku.

⁷ Mata bukan kameeŋe kan uyinum wajakut újufoweene kufaafak. Uyinumawu wajakutumuu ulakomuu li úfu’ li buko, li ukaaw butiya. Bukan kameeŋe kabobowe li kakaje, li kufak foof.

⁸ Muñeˈe li baj ésuumahukow yáamak li ésukayi inyu.

Simoŋ ájangafayindaawu

⁹ Muñeˈe li baj ánayine akee an kunaake koon Simoŋ alako no li ésukayi inyu. Simoŋ li anaak akaan jángafayinde min áji kata Samali li kusego. Li anaak aan akila an áamak.

¹⁰ Bukanabuku feh kata ésukayi inyu, kítum li katitabuku boot yok li káamakabuku, li kuŋa’ sifintuyiil feh kukaan li akila. Li kunaak koon: — Anáyinaawu ummu akila ammuu sembaasu sata Ateemit. Sembaasu saaneyimuu «Sembaasu sáamakasu.»

¹¹ Bukanabuku li kukaan sifintuyiil feh li Simoŋ, mata fiyowe ŋáa’ nan áami li kakaaniil kusego li jángafayindaayi yoola.

¹² Bale nan kúyinenumuu li Hulimahu Hásuumaahu han Fílib awaaleyiilumuu mata Jáyiiyaju jata Ateemit, li kajawaku kata Yéesu Kilisita, kánayinaabuku li kanaalaabuku li kujow kúbatiiseyiil.

¹³ Simoŋ humumool foof li áyinen, li kúbatiisewool. Nan kúbatiisewoolumuu kuban, akatut kanaboo li Fílib. Búhiisenumabu bájaahalenimuu li bakaanelabu bájaahalenimuu ŋáa’ ban Fílib anaake akaanumuu hákilool, li bukaanool asego ŋáa’.

Fiyeel buko li Saŋ li kujow boot Samali

¹⁴ Muñeˈe kufootalaku li kujam kaanaku kata Samali kuyayyab Hulimahu hata Ateemit, li kuboñiil Fiyeel buko li Saŋ.

¹⁵ Nan kúliiŋumuu Samali, li kul̥aw boot li kúyinenumuu mantee li kuyab Buyinumabu Banabaabu.

¹⁶ Mata Buyinumabu Banabaabu bo báwalowuloloot bulako li buko. Li kajawaku kata Amaaŋenawu Yéesu bale kúbatiisewumi.

¹⁷ Muñeˈe Fiyeel buko li Saŋ li kuŋa’ kuŋeniil kuwalen li buko, li kuyab Buyinumabu Banabaabu.

¹⁸ Muñeˈe Simoŋ li ajuk kaanaku Ateemit lasensen Buyinumabu Banabaabu káyinenumuu, nan kufootalaku kuŋa’muu kuŋeniil kuwalen li buko, li áfulenul sídalam asen Fiyeel buko li Saŋ;

¹⁹ ban li aaniil: — Injé foof jisenom sembaasu unsu, bájum iwalenumuu kuŋenom li an, li ayab Buyinumabu Banabaabu.

²⁰ Bale Fiyeel li aanool: — Ujow uniilo li Sídalamasu sooli ló, emmuu luyinooyinoo li oon kájiyaku kata Ateemit li sídalam kúbajumeyi.

²¹ Ulet ló li bulokabu bóololi, ban ubajut to kakaañen kanookan, mata buyinumabu booli bucolut hákil Ateemit.

²² Ukat bo kayinoolaku kooli kajakutumuu, min ul̥aw Amaaŋenawu mantee li ayili, li abonketi kayinoolaku kan ookumuu li buyinumi.

²³ Mata lijuke kaanaku kásiibo kajakut li bújakaati looke li buyinumi, ban kahoofoolaku kuhaŋihaŋ sembe.

²⁴ Simoŋ li aan Fiyeel buko li Saŋ: — Bukuluul humumuul jil̥aw Amaaŋenawu boot lí ínje, jakum bil wahoowah li wahawu wan jilobumuu ubajom.

²⁵ Nan Fiyeel buko li Saŋ kubanumuu elobayi yata ésukayi mata wahawu wan kuhaasumuu li Yéesu, li kawaaleyaku kata hulimahu hata Amaaŋenawu, li kulaañ buko kúl̥uba boot Yeelusalem. Nan kulakomuu elaañayi, li kuwaale Hulimahu Hásuumaahu li básuk bameeŋe bata Samali.

Fílib buko li alokaawu ata Ecofi

²⁶ Fúlum tó, amalakaawu li aan Fílib: — Uyito ujow ujooŋoo kúñum, uŋa’ bútinabu bájowummuu Yeelusalem boot li ésukayi yata Gaasa. Bútinabu umbu an ájowumeliit li bo.

²⁷ Fílib li ayaan ayito ajow. Nan alakomuu ejowayi, li ajuk ánayine akee áfulumulo li etaamayi yata Ecofi. Anáyinaawu ummu lakankaan an áamak li káyiiyaku kata Kandas, ammuu aseekenawu ata jáyiiyaju jata Ecofi. Anáyinaawu ummu an kusenumuu ebajayi yata Kandas aaken, okila babile kamanen Ateemit Yeelusalem.

²⁸ Muñeˈe li alako elaañ bóot, mabahe li esaaletayi yoola min alako kajanga éliibalayi yata afulofetawu.

²⁹ Buyinumabu Banabaabu li boon Fílib: — Ujow ukooj esaaletayi inya min unab li yo.

³⁰ Fílib li atey ajow akooj esaaletayi, li ajam ánayinaawu li kajangaaku kata éliibalayi yata afulofetawu Esay. Li agel̥l̥enool aanool: — Lúnaanume kulimaku kan ujangawemuu li ko?

³¹ Anáyinaawu li aanool: — Buu leete ínaanum ko an bakittenutom ko? Nan alobumuu loon muñaˈa aban, li aan Fílib aŋitowul li esaaletayi abil abah akoojool.

³² Muñeˈe Hulimahu hata Ateemit han alakomuu kajangaaku ho hommuu unhe: «Lanokoonokoo loon húgalalaan han kóomi li kájowetum boot jamuk, loon ágalalaan akumbowe hákil kammuu li kámiit hó. Alobut hulimoohulim.

³³ Kusuwenoosuwen, ban bajut an asenool bakooŋ. Ayi aate ayili alob mata bubukoolumool? Mata kúbubbuj buloŋabu boola li etaam.»

³⁴ Anáyinaawu áfummulomuu Ecofi li agel̥l̥en Fílib aanool: — Liyaaki, ubonket uhebom ayimaa afulofetawu alobe li okila? Mantee akila humumool, mantee akee ábuto?

³⁵ Muñeˈe Fílib li aŋa’ hulimahu, min ájowum li Bakiicelabu bata Hulimahu hata Ateemit tan ánayinaawu alakomuu kajangaaku, min awaalewool Hulimahu Hásuumaahu halobumuu mata Yéesu.

³⁶ Emmuu ejowayi kulakowe li bútinabu, li kúliiŋ tikee tin baje mal. Anáyinaawu ata Ecofi li aan Fílib: — Mal mummu! Waa woote úhilom íbatiisewumi? [

³⁷ Fílib li aanool: — Uyínenumuu li buyinumi feh, luyilo úbatiiseyi. Anáyinaawu li aanool: — Líyinene een Yéesu Kilisita ammuu Añiilawu ata Ateemit.]

³⁸ Muñeˈe li akaan esaaletayi eyiten. Fílib li ánayinaawu li kuwalo li malamu foofiil kúl̥uba, min Fílib ábatiisewool.

³⁹ Nan kúfululumuu li malamu, Buyinumabu bata Amaaŋenawu li buteb Fílib buwujetum. Anáyinaawu ata Ecofi alaañut ajuk Fílib. Li ajow bútinool li ésuumansuum ló.

⁴⁰ Muñeˈe Fílib li ajuk aan li ésukayi yaaneyimuu Asot laam. Fúlum tó, li añaahoo li sísukasu min anaak awaale Hulimahu Hásuumaahu tanootan, boot yok nan áliiŋumuu Sesaale.