Bakaanelabu 3 - Jola-Kasa

Fiyeel buko li Saŋ li kufaken ánayine abobowe

¹ Li líiŋ hunak hakee, Fiyeel buko li Saŋ li kujow boot kal̥awaku kakaaneyimuu li Eluufayi yata Ateemit, ewaatuwayi éhaajutayi baŋeje, banakabu bakel̥e.

² Muñeˈe li baj ánayine akee abobowe, anaake abah akooj kámbiilaku kata Eluufayi yata Ateemit kan koonemuu «Kámbii Kajake.» Anáyinaawu ummu kábilum nan abukimuu labobowe. Hunakoohunak li kútebul ánayinaawu abobomuu kujow kuwalen tin kámbiilaku, bánum li ayili al̥aw sídalam bukanabuku kanokenemuu li Eluufayi yata Ateemit.

³ Nan ánayinaawu abobomuu ajukumuu Fiyeel buko li Saŋ, buko balakowe li kunoken li Eluufayi yata Ateemit, li al̥awiil sídalam.

⁴ Fiyeel buko li Saŋ li kujukelool ban Fiyeel li aanool: — Ujúkeloli.

⁵ Anáyinaawu li aŋa’ sifintuwool feh akaan li buko. Mata lanaanaak ayinoo li aan fan kusenool wah ukee.

⁶ Muñeˈe Fiyeel li aanool: — Ibajut ehaaliis, ibajut éwulus iseni. Bale wahawu wan ibajumuu, liseni wo: li kajaw kata Yéesu Kilisita ata Nasalet, uyito ujow!

⁷ Nan Fiyeel alobumuu ánayinaawu abobomuu loon muñaˈa aban, li átukool li kaŋen kúli boot min akaanool ayito. Kootaku kata ánayinaawu abobomuu li kuyaan kulit boot li siwagasu soola ló.

⁸ Anáyinaawu abobomuu li ayaan ayitowul to háak, li átoŋ ajow. Li anab li Fiyeel buko Saŋ kunoken li Eluufayi yata Ateemit, mo lafunfumoolemaa ban li anaak asal Ateemit.

⁹ Esúkayi feh li ejukool akila li ejowayi li kasalaku kata Ateemit.

¹⁰ Nan ésukayi ejukumuu ánayinaawu, li ehaas yoon akila ammuu ánayinaawu abobomuu, anaake abahumuu tin kámbiilaku kata Eluufayi yata Ateemit kaaneyimuu «Kámbii Kajake» min anaak al̥aw wah. Muñeˈe ekole yáamak li ejokiil, li kasego káamak mata wahawu wabajoolumuu úji.

Fiyeel li alob li ésukayi li Eluufayi yata Ateemit

¹¹ Muñeˈe emmuu ánayinaawu aboboweenumuu akatoolut li Fiyeel buko li Saŋ, ésukayi feh li esego, min éteyoolul boot tin kulakomuu li kañumaku kata siyiilasu saaneyimuu «Siyiil sata Salomoŋ.»

¹² Nan Fiyeel ajukumuu loon muñaˈa, li aan ésukayi: — Kutuyom kata Isilayeel, wáa újiye li jisego mata kafakaku kan ánayinaawu ummu afakumuu? Wáa újiye li jinaak jíjukeloli loon muñaˈa, loon eenimuu li sémbewoli jífakenume ánayinaawu ummu? Mantee foof loon eenimuu mata kátuulaku kan áloli jítuulumuu Ateemit, jíkaanume ánayinaawu ummu ajow?

¹³ Ateemitawu ata Abulaham, Isaak li Sakob, ammuu Ateemitawu ata situubawolaal sihaan, láhihhiis máyiineniyamu mata Yéesu ammuu alokaawu oola. Bukuluul humumuul jibetumuu Yéesu li kuŋen kata kunaahaanaku kata ésukayi, ban li jihoyool hákil Filat afañeenumuu min akatenool.

¹⁴ Li jihoy Yéesu ammuu an anabe li an acole, min jilob Filat min ákatenuluul an amuke bukan.

¹⁵ Muñowu jimukumuu anawu akilumuu buloŋabu. Bale Ateemit li ayitenumulool li eketayi, ban alolaal feh lumaataale.

¹⁶ Muñeˈe bukuluul jijuke ánayinaawu ummu. Jihaasool. Sembaasu sata kajawaku kata Yéesu sifakenoolumuu, mata áloli jíyinenyinen li akila. Káyinenaku unku kan áloli jibajumuu li Yéesu, kó kújimuu ánayinaawu ummu li afak hákiluul feh.

¹⁷ «Bale muñeˈe, kutuyom, lihaase een káhaasaati kújiwuulumuu li jikaan Yéesu loon jikaanoolumuu, bukuluul li kunahaanaku kooluul.

¹⁸ Bale Ateemit lalollob ákibben li utum wata kufulofetaku fan álaam. Wahawu unwu lakaanumuu min ubaj.

¹⁹ Muñeˈe kama jibet búsol baloŋelabu booluul buhaanabu, min jílaañul boot bata Ateemit, bájum li abonket uhoofoolawu wooluul.

²⁰ Jikaan momuu, Amaaŋenawu Ateemit fan asenuluul taŋ yata kayool̥o, ban fan aboñuluul Afakenaawu an afimmuu min al̥useene boot li bukuluul, ammuu Yéesu.

²¹ Bale muñeˈe, Yéesu boot min afan alako li emitayi. Fan alako ló boot yok nan Ateemit ammuu alaañen wahawu feh uwunkulo, loon Ateemit humumool alobumuu kábilum nakee, li utum wata kufulofetaku, kammuu bukan kanabe.

²² Li mal̥egenamu, Móyiis lansaan: “Amaaŋenawu Ateemit ooluul fan áboñuluul afulofet loon ínje. Anawu ummu, fan alako akee li kutuyuul. Jijanten wahawu feh wan ammuu li alobuul.

²³ Anoowan li bukuluul aatutumuu ajanten afulofetawu ummu, fan áfunni li ésukayi yata Ateemit, min amuki.”

²⁴ «Ban foof kunakaku unke kan oomaamee li ko, kufulofetaku feh, kulollob mata ko kusemmenoo, kítum li Samiyeel boot yok kabilumuu búsolool.

²⁵ Kulimaku unke kan Ateemit alobumuu kakaan, lalollob ko boot li bukuluul jammuu bañiilabu bata kufulofetaku. Bukuluul foof jommuu bañiilabu bata húfaalumahu han Ateemit ajokoomuu li situubawuul sihaan, nan ammuu Abulaham: “Li kuñooli léetummuu ísooniyen utoŋawu feh wata etaamayi.”

²⁶ «Bukuluul jijandumuu jíji Ateemit li áboñul alokaawu oola Yéesu, boot min áfulen anoowan li bukuluul li makaanelool majakut, min lako kásooniyen boot li bukuluul.»