Provérbios 12 - Kaxinawá Bíblia (BR)

¹ Tsuãra nemati betxipaikĩ txibainã, habiawẽri unanepati hãtxa betxipairiaikiki. Hakia tsuara nemakĩ yusĩbiabu danãmisburã, unaĩsmapa bestiki.

² Huni duapa pepabuwẽ taeshũ Senhor Deusũ hatu duawakubaĩmiski. Hakia yusĩti pe shinãma parananãkĩ txakabu besti yui dakeisbumarã, Senhor Deusũ danãkĩ hatu kupishanikiki.

³ Hunibũ txakabuwamisburã, ha txakabunã, hawẽ hatu mestẽwãtirumaki, hiwe txibu hayama keskarã. Hakia huni pepabu hatũ hiwea mestẽwãti hi tapũ uke merãhaira beshea keskabuki, tsuã hatu betsetirumarã.

⁴ Aĩbu unanepa pepatũ hawẽ bene duawakĩ shanẽ ibuhaira keska wa hawẽ taea kẽtiruki. Hakia hawẽ aĩ txakabutũ hawẽ bene duawakĩ merabewama hawẽ hiwea txakabuwamakĩ nuitapawamiski, ana hatu shinãtima wamakinã.

⁵ Huni pepabũ hawara pepa besti akatsi ikĩ ha besti shinãkubaĩmisbuki. Hakia txakabubu parananã bestikatsi shinãkubaĩmisbuki.

⁶ Huni txakabubũ hãtxarã, hanushũ hatu tenãti birũ keskabuki. Hakia huni pepaburã, hawẽ hãtxa pepawẽ taea hamapai txakabu anua piskutirubuki.

⁷ Huni txakabubũ kanekubaini hawẽ hiwea beshtekei mawamisbuki. Hakia pepabu hatũ hiwearã, unanuma hiweyukubaĩmisbuki.

⁸ Tsuãra pe shinãkĩ hawaira tapĩhairanikarã, haburã, hatu kẽwãkubaĩmisbuki. Hakia tsuara tatima unaĩsmaparã, hawa hatu kẽwãma danãkubaĩmisbuki.

⁹ Tsuara kẽwãma danãbiaibũ hawẽ tsumapã merabewakĩ dayashuna haskai pe hiwetirubuki. Hakia tsuara kẽwãbiakubaĩmisbu hawẽ piti itxapa hayamakẽ pematiruki.

¹⁰ Huni pepabũ hatũ inabuwẽ nuikĩ hatukiri shinãkĩ pe mekekubaĩmisbuki. Hakia huni txakabuburã, hamapai tibiwẽ hawa nuiama hakiri shinaĩsbumaki.

¹¹ Huni dayakaparã, hatũ bai anu mibã piti hamẽ imiski. Hakia unaĩsmapatũ hawa daya pepa akamarã, hawa piti itxapa hayatirubumaki.

¹² Huni txakabubũ hawara txakabu betxipaikĩ shinãmisburã, hisĩ keskawẽ neshea hani pashatirubumaki. Hamẽ huni pepaburã, hi tapũ txaipa haya keska hatũ shinã pepawẽ kushipakĩ pepawakubaini mestenepa hiweabuki.

¹³ Huni txakabubũ txanitxakamisbuwẽ taea ibubis hatũ txakabuwẽ beshekea hani pashatibubumaki. Hakia huni pepabu txakabu anua kaĩbaini pashamisbuki.

¹⁴ Haska huni tibi hãtxamisbu bishãkanikiki, pe inũ txakabu yuimisbu tibiwenã. Hanua haska akubaini dayakubaĩmisbu haskawẽ hatu pakarã, txakabu kasmai pepa bishãkanikiki.

¹⁵ Yusiã nĩkaisma unaĩsmapaburã, dasibi hawara akubainai: “Ẽ pe hiweaki”, ishũ shinãkubaĩmisbuki. Hakia huni unanepabunã, huni betsã hatu merabewakĩ pe yusiaĩbu nĩka pewakubaĩmisbuki.

¹⁶ Huni unaĩsmapabu hawaira sinatakĩ hawa huneama shabakabi hatu uĩmamisbuki. Hakia unanepabu hatu yuaĩ hatuki kashebiabu nĩkabiakĩ hatu dabaĩsbumaki.

¹⁷ Huni pepabũ hawara ikaibu uĩ pewatã txanima hãtxa besti yuimisbuki. Hakia huni txakabũ hawara uĩ pewamabia txanitxaka bestikĩ yuikubaĩmisbuki.

¹⁸ Huni betsa hawa shinãma hatu hãtxa txakabu yuikinã, nupewẽ hatu txatxikĩ akawamisbuki, hawa merabewamarã. Hakia unanepabũ hatu yusĩkinã, hatu merabewamisbuki, dau pepa sheama keska wakinã.

¹⁹ Tsuabũra txanima hãtxa besti yuimisburã, hiwei ikibi ishãkanikiki. Hakia tsuabura txanitxakamisburã, hawẽ hiwea hawaira keyushanikiki.

²⁰ Huni txakabũ shinaĩ yubakairã, txanitxakai parananãmisbuki. Hakia tsuabura unanuma hiweshũ merabewakĩ hatu yusiaĩbu nĩkai benimamisbuki.

²¹ Huni pepatũ hawa txakabuwaismakẽ txakabũ nuitapa watirumahairaki. Hakia huni txakabũ dasibi txakabu betsa betsapa amis betsa wama dasibi haki dasi wabaĩ Deusũ hatu kupia nuitapamisbuki.

²² Habu txanitxakamisbu betxipaiama Senhor Deusũ hatu danãmiski. Hakia tsuabura hawa txanitxama yui pewakubainaibu hatu uĩ hatuwẽ Senhor Deus benimahairamiski.

²³ Tapĩhairanika ibubis kẽkĩ hawara shinãkĩ unaĩ shabakabi hawaira hatu tashnimashuĩsmaki. Hamẽ unaĩsmapabũ hawa shinãma hawara hãtxa pema yuibaũmisbuki.

²⁴ Dayakapã daya pe tapĩtã hatu yunushanikiki. Hakia habu txikishburã, huni betsã tsuma washũ hatu dayamamisbuki.

²⁵ Tsuãra hawara bika tenehairai huĩti nishmai punu nukamisbuki. Hakia tsuãra hãtxa pepawẽ bika teneaibu merabewakĩ hatu benimawatirubuki.

²⁶ Huni pepabũ habu ha dapi hiweabu hatu haibuwakĩ hatu yusĩkĩ pewakubaĩmisbuki. Hakia huni txakabubu hiwe txakai bai txakabu txibaĩ benumisbuki.

²⁷ Huni txikish piaya kashunã, hawa tsakaisbumaki. Hakia huni dayakapa hiwearã, hamapai itxapa bitã hayamisbuki.

²⁸ Yunuti pepa kushipa ha baiwẽ kairã, hawẽ hiweti hayaki. Hakia unaĩsmapabu hiwei peisbuma hatũ hiwea benui mawa bestimisbuki.