Gálatas 6 - Kaxinawá Bíblia (BR)

Merabenãkũkaĩtikiaki, na hãtxarã

¹ Ẽ betsabu inũ ẽ puibuũ, nukunabũ hamapai txakabuwakĩ kaneaibu uĩtã matũ mã ikũwaĩwẽ taeshũ pewakĩ hatu merabewakĩ hãtxa pepawẽ unãshubira hatu yusĩkubaĩkãwẽ. Hakia matũri txakabuwakĩ mã kaneyamanũbũ, Deusũ Yushĩ Pepatũ matu mekeaya ibubis mekeriakubaĩkãwẽ.

² Haska inũ, matunabũ shãkama iabiranaibu mã hatu merabewamis keska wakĩ tsuabũra hawara bika teneaibu inũ tsuabũra kaneaibu hatu merabewariakubaĩkãwẽ. Hatu haska wai haska Cristõ nuku yusĩkubaini keska ashũkĩ hawẽ hãtxa mã meneshũshanaii.

³ Haskakẽ tsuãra hatu merabewamis xinaĩ hawẽ pepakiri hãtxamisburã, kanei keĩ ibubis parananãmisbuki.

⁴ Hakia hatiritũ kẽkĩ kanekatsi ikama pepa akubaĩmis unãkĩ yuikĩ: “Ẽ pepaki”, iwanã, yura betsa binumanũ ishũ xinãtimaki.

⁵ Hakia tsuãra habũ bika betsa betsapa mã tenebiairã, has xinãma tenekubaĩkãwẽ. Habiaskas nũ haya Deusũ unaĩkiki.

⁶ Haska inũ, tsuabũra matũ yusĩnã Deusũ hãtxa matu yusĩaĩbu mã habu nĩkaibũ matũ hawara mã haya, piti inũ mabu inũ peirã, ha pashkatã matũ yusĩnã huni hatu inãkubaĩkãwẽ, merabewakinã.

⁷ Haskakẽ txanima hãtxa matu yuinũ nĩkairakãwẽ. Hamapai wakĩ Deus nũ parãtirumaki. Hawara nũ amiswẽ taeshũ Deusũ kaneama nuku kupishanikiki.

⁸ Tsuabũra ibubis txakabu xinãkĩ kanemisbu Jesus ana huaitiã Deusũ kupikĩ mawatxakamakĩ hatu isĩ tenemahairashanikiki. Hakia tsuabũra Deusũ Yushĩ Pepa nĩkakĩ kanebiatã hawẽ yusĩa txibãkĩ heneabumakẽ Jesus ana huaitiã Deusũ hatu hiwekuĩmashanikiki, ikibi imakinã.

⁹ Haskakẽ pepakũkaĩkĩ heneyamanãkãwẽ. Hatiara Deusũ hanu kupiaitiã merabenãkĩ pepawakubaĩkĩ nũ heneamakẽ Deusũ duawakĩ pepawẽri nuku kupishanikiki.

¹⁰ Haskawẽ taeshũ hawara nũ hayawẽ dasibi nukubetã ikũwaĩbu nuitapaibu hatu merabewakubainãkãwẽ, ha katxu betsaburi ikũwãriabuma hatu merabewariakinã.

Hawẽ henekĩ hãtxa hatu kenekĩ keyushunikiaki, na hãtxarã

¹¹ Hawẽ keneti mebĩtã ibubis matu keneshũkĩ kene ewapabuwẽri ẽ akai uĩkãwẽ.

¹² Hi cruzkia mawakĩ nukũ txakabu Cristõ buaniki, haska hari hãtxakatsi ikama ha yusĩnanaĩ parananaĩbũ hau judeubũ hatu dakewakĩ danãkĩ hatu bika tenemayamanũbũ ishũ hau hatukiri pe xinãnũbũ, iwanã, nĩkamas maturi hina kubitxi meshtekatsis ikanikiki. Hatu uĩrakãwẽ.

¹³ Haska inũ, Moisés nemati inũ hawẽ yunuti habũ txibãkĩ keyuamabia matũ hina kubitxi nĩkamas matu bitã matuwẽ taea besti ibubis kẽkatsis ikanikiki.

^14-15 Hanua tsuabũra hau Deusũ ea duawanũ, iwanã, hatũ hina kubitxi meshtekinã hamẽ akanikiki. Haska inũ, tsuabũra meshteama hamẽri ikanikiki. Hakia nukurã, Deus duawanũ ika xinã betsa watã besti Deus nũ benimawakubainaii. Jesus ea mawashuniwẽ taeshũ xinã benawatã: “Mabu itxapa besti binũ”, iwanã, ana ẽ xinãmakẽ txakabũ ea ana atxiamariki. Haskakẽ keãma nukũ Shanẽ Ibu Jesus Cristo hi cruzkia mawashũ hawara ea ashunikiri besti yuikubaĩkĩ Deus ẽ kẽwaiĩ. Ẽ hawauma iniwẽ taea ẽ hawa kẽtirumaki. Hakia Jesuswẽ taea besti ẽ kẽtiruki.

¹⁶ Haska ẽ matu yuiai keska xinã betsa watã Jesus besti ikũwaĩ mã hawẽ dasibi hiweaibu txanima mã Deusunabu kayabiki. Hanua Deus matuwẽ nuikĩ hau unãnuma matu hiwemariakubainũwẽ.

¹⁷ Jesuski dasinishũ hakiri ẽ yusĩkubainaya ea itxakawakĩ detekĩ ea baka keshtuwakeakenibuwẽ taeshũ ẽ yusĩa ea yuãkĩ ana ea bikawayamakãwẽ.

¹⁸ Ẽ betsabu inũ ẽ puibuũ, nukũ Shanẽ Ibu Jesus Cristõ hau matu duawakubainũwẽ. Hatiski, ẽ hãtxarã. Paulo