Gálatas 3 - Kaxinawá Bíblia (BR)

Haratu yusĩa pemẽ? na hãtxarã

¹ Galácia anua unaĩsmapa tatimabuũ, tsuã matu dauĩmẽkaĩ, parã paepa wakinã? Jesus Cristõ matu pepawanũ ika cruzkia matu mawashunikiri ẽ matu unãmakubaĩbiaya huni betsabũ hatũ yusĩa bena matu yusĩkĩ parãkubaĩkanikiki.

² Haskakẽ na besti matu yukanũ: Haskarawẽ taeshũ Deusũ Yushĩ Pepa mã binimẽ, Moisés keneni txibãkĩraka? Ẽ yusĩa Jesuskiri ikũwãkĩraka?

³ Unaĩsmapahairabuũ, haskakĩ Deusũ Yushĩ Pepa bikĩ taewabiayama hakimatã ana pepanũ, iwanã, hunibũ beya mã txibãkubaĩkanaii, kanekĩ txakabuwairã.

⁴ Hamẽ Deusũ kuxipa mã binimẽ? Mã haskayarã, ẽ harakiri xinãtimaki.

⁵ Deusũ hawẽ Yushĩ Pepa matu inãshũ hawara dami itimaska hawẽ kuxipawẽ hunibũ atirubuma matu amakubaĩmisrã, haratu txibãkĩ matu amamismẽ? Moisés keneni mã txibãmiswẽ taeshũraka? Haskamahairaki. Uĩrakãwẽ. Deusũ hãtxa nĩkakĩ mã ikũwaĩwẽ taeshũ besti hawẽ kuxipawẽ matu amamiski.

Abraão pepakĩ ikũwaiã Deusũ: Huni pepaki, anikiaki, na hãtxarã

⁶ Ẽ shenipabu inikiri matu yuinũ nĩkakãwẽ. Abraãonẽ Deus nĩkatã ikũwaĩwẽ taeshũ Abraãokiri hãtxakĩ Deusũ yuikĩ: “Huni pepaki”, aniki.

⁷ Haskakẽ tsuabũra Deus ikũwãkĩ Jesus txibãmisbu Abraãonẽ bababu kayabibuki.

⁸ Hanua judeubuma dikabibũ hatũ xinã betsa watã hatũ txakabu henetã Jesus ikũwãshanaibuwẽ taeshũ Deusũ unãkĩ hawẽ hãtxa yuishunika Deusũ Yushĩ Pepatũ Abraão kenemashũkĩ yuikĩ: “Deus mĩ ikũwaĩwẽ taeshũ yura shukua tibibu dasibibũ hawẽ bake ikũwaĩbu hiwekuĩmakĩ Deusũ miwẽ taeshũ hatu duawashanikiki”, aniki.

⁹ Haskakẽ Abraãonẽ ikũwãyã Deusũ duawani keska wakĩ tsuabũra hawẽ bake ikũwaĩbu Deusũ duawariamiski, hiwekuĩmakinã.

¹⁰ Hanushũ Deusũ hãtxakiri hawenabu Moisés yuikĩ: “Hawẽ yunuti inũ hawẽ nemati ẽ matu keneshunai tsuabũra dasibi txibãhairabumakẽ Deusũ hatu yupukĩ pe hiwemama ishanikiki”, haska watã hatu keneshuniwẽ taea txibãmabia hatũmebi pepapaikĩ hawẽ yunuti inũ hawẽ nemati txibãpaikĩ pewabumakẽ Deus hatuki sinatamakĩ yupushanikiki.

¹¹ Haska inũ: “Ikũwaĩ pepabu hiwekuĩshãkanikiki”, iwanã, Deusũ hawẽ hãtxa yuishunika kenemaniwẽ taeshũ hawẽ yunuti inũ hawẽ nemati besti txibãkĩ Deus daewatirubumaki, nũ unãnã.

¹² Hawẽ yunuti inũ hawẽ nemati Deusũ Moisés inãni txibaĩnã, hawẽ hiwea kayabi Deus anua bitimaki. Hakia Moisés yuikinã: “Tsuãra Deusũ yunuti inũ hawẽ nemati txibãkubaini ha yusĩa hãtxawẽ kaneama hawẽ hiweshanikiki.”

¹³ Deusũ hawẽ yunuti inũ hawẽ nemati yunukinã, hawẽ yupukunãkatsi aniki. Hatũ nukũ txakabuwẽ nuku yupubiaya Cristõ nuku meshpamanũ ika nukũ txakabu kupiti bi nuku mawashuniki. Haskai kaikiri bebũkiri Moisés yuikĩ: “Tsuara hatũ txakabuwẽ taeshũ tenãkĩ hiki netãbu mawaya Deus hawẽ nuiama yupumiski”, iniki.

¹⁴ Haskawẽ taeshũ haska Deusũ Abraão duawakĩ pepa yubani Jesus Cristowẽ taeshũ judeubumãri mã ikũwãyã Deusũ Abraão yubaniwẽ taeshũ hawẽ Yushĩ Pepa Deusũ ma matu inãni dasibi mã ma hayaki.

Haska Deusũ Moisés yununi inũ Abraão yubani Paulõ haska hatu yuinikiaki, na hãtxarã

¹⁵ Ẽ betsabu inũ ẽ puibuũ, haska yurabu yubakai xinaĩ hãtxamisbu keska matu yuinũ nĩkairakãwẽ. Yurabu yubakanametã xinãma tsuã henetiruma inũ tsuã betsa watirumaki.

¹⁶ Na haska ẽ shenipabu Abraão Deusũ yubakinã, hawẽ baba bestitxaikiri aniki. Hakiri kenekĩ hawẽ bababu itxapakiri yubakai hãtxama hakia ha haska hawẽ baba bestitxaikiri yui yubakairã, Jesus Cristokiri iniki, nukubũ ha nũ ikũwãshanũbũ nuku anu hushanai yubakinã.

¹⁷ Hanua ma ana 430 bari kaya hawẽ yusĩa Moisés yuibia dasibi Deusũ Abraão bebũkiri yubani maewamakĩ txipu Moisés hawa betsa wamama iniki. Haskakẽ hawara Deusũ Abraão yubani hawa betsa wama ashũkubaĩshanikiki.

¹⁸ Haska inũ, Moisés yusĩa txibaĩ nũ pepaya hawara Deusũ Abraão yubani mã hawama ikeanaii. Natianã, haskamaki. Deusũ Abraão yubanirã, tsuã betsa watirumaki.

¹⁹ Haskakẽ haska Deusũ hãtxa Moisés yununirã, matu yuinũ nĩkakãwẽ. Kanekĩ haska habũ txakabu waibukiri hau shabakabi unãnũbũ Deusũ hawẽ yunuti inũ hawẽ nemati Deusũ hawẽ nai tsumabu Moisés yuimakubainiki. Haska bebũkiri Abraão hawẽ baba betsakiri Deusũ yubani huriamakẽ hau Moisés yusĩa txibãkubainũbũ yurabu hatu yusĩkubainibuki. Deusũ nai tsumabũ hawẽ yunuti Moisés yuimabiakubaĩshanai

²⁰ ha dukũ Deus Abraãobe yubakakĩ ibubis Deus bestitũ anikiaki, tsua hãtxashunamarã.

Deusũ Moisés yusĩnirã, Cristowẽ taea nuku ana hawẽ mekeamakiaki, na hãtxarã

²¹ Ha dukũ Abraão Deusũ yubani inũ ana ha katxu Moisés yusĩmanirã, haska ha dukũ Abraão yuini Deusũ betsa wakĩ nematirumẽ? Haskamaki. Deus daewakĩ hawẽ nemati inũ hawẽ yunuti hãtxa pe txibãkubaĩkĩ tsuabũra hiwekuĩa bikeãkanaii.

²² Deusũ hãtxa Moisés keneni uĩkĩ dasibibũ txakabuwakubainaibukiri ibubis unãbiai pe hiwetirubumakẽ haska Deusũ hatu yubani Jesus Cristo ikũwãmisbũ besti hiwea kayabi bishãkanikiki.

²³ Nũ ha ikũwãshanai huriamakẽ Deusũ Moisés yusĩa keneniwẽ hawẽ nuku bitxikĩ akawashũ nuku tea wayuniki, hawẽ taeshũ Jesus Cristo manakakĩ nũ hawẽ unãti wayunũbunã.

²⁴ Haska inũ, Cristokiri unãkĩ ikũwãkĩ nũ txibaĩbu nukũ txakabu buatã hau pepabu keska Deusũ nuku washanũ, iwanã, hawẽ yunuti inũ hawẽ nematiwẽ nuku mekeyukubainiki.

²⁵ Hakia natiã nũ Jesus ikũwaĩbu habias yunuti inũ nematiwẽ nuku ana tsumamakẽ

²⁶ dasibi mã Jesus Cristo ikũwaĩ mã ma Deusũ bakebukẽ hatũ besti matu mekekubainikiki.

²⁷ Haska inũ, mã Cristo ikũwãkĩ hatu unãti wamanũ ikaya matu naximabu mã tari sawemis keska wakĩ Cristoki dasikĩ mã ma tari sawekĩ akawaniki.

²⁸ Haskai mã yura bestitxai keskaki. Judeubu kasmai judeubuma inũ, tsumayabu kasmai tsumabuuma inũ, hunibu kasmai aĩbuaibu xinãma hakia mã Jesus Cristo ikũwaĩbu besti dasibi mã yura bestitxai keska mã haki dasia xinãkubaĩkãwẽ.

²⁹ Mã Cristonaburã, habia mã Abraãonẽ bababu dikabiwẽ taea haska Deusũ Abraão yubaniwẽ maturi hawenabui mã hiwea kayabi hayariashanaii.