Êxodo 10 - Kaxinawá Bíblia (BR)

Shini atimapa dami wakĩ pawanikiaki, na hãtxarã

^1-2 Txipu Senhor Deusũ Moisés ana yuikĩ: —Hamebi hiwemis ẽ ea Senhor Deusrã, mã ekiri shinãkubaĩshanũbũ hawẽ hatu datekĩ e imati dami betsa betsapa ẽ kushipawẽ hatũ mai pakeanushũ Egito nawabu ẽ hatu mesewani matũ bakebu inũ matunabu pahairakubainaibu uinishũ mã hatu yuipakekubaĩshanũbũ na hawẽ hatu datekĩ dami betsa betsapa wakĩ Faraónẽ huĩti kushi wakĩ hawẽ merabewanika shanẽ ibubu ẽ hatu huĩti kushi wariashinaki. Haskawẽ taea ana Faraó anu bushũ eska ea yuishũtãwẽ— aka

³ Moisés inũ Arão Faraó anu bushũ Senhor Deusũ hãtxa yuishũkĩ: —Hebreubũ mekenika yushĩ Senhor Deusũ eska mia ana yuikiki. Nĩkawe: “Hatiã ana huĩti kushiama niti itã mĩ ea nĩkashanai, ea bebunua babuirã? Haska ẽ mia yuiai keska enabũ hau ea kẽwaĩ bunũbũ ana hatu nemayamawe.

⁴ Nĩkamas mĩ ana hatu nemaya meshukiri mĩ mai hirabi anu shini mirimahaira ẽ yunushanaii.

⁵ Minabũ hau mai uĩyamanũbũ shini niri ibirã mai dasibi bepushãkanikiki. Matũ bai anu yunu betsa betsapa barush ui ikĩ ha teshe washina pikĩ matũ mibã hi tibiri pikĩ keyushãkanikiki.

⁶ Shini tatashki iki hikibaĩ mĩ hiwe hawẽrua betsa betsapa anu inũ mĩ merabewanika shanẽ ibubũ hiwe inũ minabũ hiwe tibi anuri hiki matashãkanikiki. Nenu hiwei taenibu anua shini beshanai keska mĩ epabu inũ mĩ hutxibũ haska uiãma ikubiranibu na mã hiweatiã haska tashnishanikiki— akĩ Moisĩ yuibia Faraónẽ ana nĩkamahairakẽ hãtxa watã dabekebaini Moisés inũ Arão kaĩbainaibũ

⁷ hawaira hawẽ merabewanika shanẽ ibubũ Faraó yuikĩ: —Ha hunĩ nuku nuitapawakĩ nuku itxakawakubainairã, hatiã nuku heneshanimẽkaĩ? Hau hatũ mekenika yushĩ Senhor Deus kẽwãtanũbũ hatu nitxĩriwe. Nukunabu mawai keyutirubuki. Nukũ inabu inũ nukũ mibã sharabu ma nuku yamawãkĩ ma keyuaburã, mĩ uiãmamẽ?— akabu

⁸ hawẽ tsumabũ hãtxa hatu nĩkatã hau ana hatu itanũbũ, iwanã, yunua beabu Faraónẽ Moisés inũ Arão yuikĩ: —Matũ mekenika yushĩ Senhor Deus kẽwaĩ buritãkãwẽ. Mĩ hatu iyuriamarã, tsuabu mĩ hatu iyuimẽkaĩ ea yuikãwẽ— hatu wa

⁹ Moisĩ kemakĩ: —Hawẽ kẽwãti piti pikĩ besikĩ nukũ mekenika yushĩ Senhor Deus nũ kẽkayabiwakatsi ikaiwẽ taeshũ nukũ bake mishtĩbu inũ, nukũ anibubu inũ, yushabubu inũ, nukũ huni bakebu inũ, aĩbu bakebu, inũ nukũ txashuwã inũ, nukũ ina awa dasibi beabaĩkĩ nũ hatu iyu keyukatsis ikaii— aka

^10-11 sinatakĩ shabakabi Faraónẽ hatu yuikĩ: —Uĩrakãwẽ. Ekiri mã txakabu hatu shinãmanũ ika ikai hau ea ana dayashũyamanũbũ ea hatu henemabaĩkĩ matũ mekenika yushĩbetã matunabu mã hatu pasha wanũ ika ikaii, ea hatu unãti wamakinã. Mã haskabaĩtirubumaki. Matũ mekenika yushĩ mã kẽwãkatsi ikairã, huni ewabus mã hatu iyutirubuki. Buritãkãwẽ— hatu watã habũ Faraó txikishwaibu hau hatu nitxinũbũ hawẽ tsumabu Faraónẽ hatu yunua Moisés inũ Arão nitxĩshunabu

¹² kaĩbainaibu Senhor Deusũ Moisés ana yuikĩ: —Egito mai hirabi anu shini bekĩ hawara barush ui ikĩ tenãkĩ teshewashina hau habũ pikĩ keyunũbũ mĩ mekẽ sanãbaũwẽ— aka

¹³ Moisés hawẽ mestẽti sanãbaunaya bari huaikiria Senhor Deusũ niwe shũku imabirana bariri inũ meshu merã niwe shũku ishiãyã hanua pena betsatiã niwẽ shini mirima iwea

¹⁴ Egito mai hirabi shinĩ atximakĩ keyubaunaya hati mĩ tanatiruma bei, hati uĩpaunibuma bei hati ana uiãma ishanaibu na habiatiã besti bekĩ

¹⁵ mai bepukĩ keyuaibũ haska washũ mĩ mai uĩtirumakẽ hawara barush ui ikĩ tenãma ikima pikĩ keyukĩ Egito mai hirabi anu yunu pei inũ hi pei pikĩ yamawaibũ

^16-17 datehairakĩ Moisés inũ Arão hau hawaira itanũbũ hawẽ tsumabu Faraónẽ hatu yunua bushũ hatu iweabu Faraónẽ hatu yuikĩ: —Matũ hãtxa nĩkama inũ matũ mekenika yushĩ Senhor Deus itxai ẽ txakabushinaki. Ẽ matu yukai ẽ hakiri txakabushina ea buashũtã hau shini txakabu ea nemashunũ ea kushipa yukashũkãwẽ— hatu wa

¹⁸ hawẽ hãtxa nĩkatã Faraónẽ hiwe anua kaĩkaini kashũ Faraókiri Moisĩ Senhor Deus kushipa yukashuna

¹⁹ bari hikiaikiria Senhor Deusũ niwe kushipa maewa niwe bekĩ shũku imaya shini mirimahaira niwẽ bukĩ Ianẽwã Tashipa merã hatu dasibi pukukĩ hasakĩ keyukẽ Egito mai hirabi anu shini ana hayamahairakẽ

²⁰ Senhor Deusũ Faraó huĩti kushi wakẽ Israelĩ enabũ kẽwaĩ bupanãbũ Faraónẽ hatu ana bashiaya

Meshuwẽ hatu kupinikiaki, na hãtxarã

²¹ hanushũ Senhor Deusũ ana Moisés yuikĩ: —Hau ana mapubaũkĩ hamapai sharabu uĩyamanũbũ Egito mai hirabi anu hau meshui keyunũ mĩ mekẽ naiuri sanãwẽ— aka

^22-23 naiuri hawẽ mekẽ Moisĩ sanãyã hanu Egito nawabu hiwebaunabu anu meshu tẽ ikaitũ hatu atxishina yame ikibi ishĩshũ shaba dabe inũ besti bari hayamakẽ haska washũ ha dapi hiweabu ana uĩtirubuma inũ hawa ana haskatã maputirubumakẽ hakia hanu Israelĩ enabu hiwebaunabu anu besti bari peshei txashakẽ

²⁴ hanushũ Faraónẽ Moisés inũ Arão hau hatu itanũbũ hawẽ tsumabu yunua bushũ hatu iweabu Faraónẽ hatu yuikĩ: —Matũ mekenika yushĩ Senhor Deus kẽwaĩ butãkãwẽ. Dasibi minabube inũ matũ bake dasibiya bukĩ hakia matũ txashuwã inũ matũ ina awa bashibaĩtãkãwẽ— hatu wa

²⁵ hakia Moisĩ kemakĩ yuikĩ: —Nukũ nũ aki kairã, haskamaki. Miã mĩ nuku shinãshuna mĩ shinanẽ nukũ inabu nũ bashibaĩtirubumaki, nukũ inabu nukũ mekenika yushĩ Senhor Deus inãkĩ tesẽtã nũ menu keyushuni kairã.

²⁶ Haratura yuinaka pepa ikis nũ katubaĩtirubumawẽ taeshũ dasibi nukũ inabu nũ hatu iyuaii. Haraturawẽ nukũ mekenika yushĩ Senhor Deus nũ kẽwãshanai inũ hanu niti itã hanishũra nũ ashanai anu nũ unãriamawẽ taeshũ nenu nukũ inabu bestitxai nũ henebaĩtirumahairaki— akaya

²⁷ ana hanushũ Senhor Deusũ Faraó huĩti kushi wa Israelĩ enabũ Senhor Deus kẽwaĩ bupanãbũ hatu nematã

²⁸ hanushũ ana Moisés nitxĩkĩ: —Eanua kaĩrikaĩwẽ. Natiã mĩ ea anu ana hutirumaki. Ana hawẽtsaĩs huyamashãwẽ. Mĩ ana nĩkamas huaya ẽ mia hatu tenãmashanaii— aka

²⁹ hawa dateama Moisĩ kemakĩ yuikĩ: —Peki. Txanima mĩ ea yuiaii. Ana hawẽtsaĩs mĩ besu ẽ mia uiãmaki— atã kaĩkainũ ikaya