Ester 9 - Kaxinawá Bíblia (BR)

Hatuki sinataibu Judeu nawabũ hatu maemanibukiaki, na hãtxarã

¹ Ushe 12tiã hawẽ kena Adar inũ shaba 13tiã shanẽ ibuhairatũ yunuti hãtxa dabe hau anũbũ Judeu nawabuki sinataibũ hatu maemakatsi ibiaibũ hatu haska wamama Judeu nawabu hatuki sinataibu hatu maemanibukiaki.

² Província tibi hanu shanẽ ibuhaira Assuerõ hatu yunumis anu habũ hatu txakabuwakatsis ikaibu hatube detenamenũ ika mae tibi Judeu nawabu hiwea anu itxabu yura shukuabu tibi hatuwẽ datehairakĩ hatu merabewakatsis ikaibuwẽ taea haratura hatu berukubaũtirubu ma mesea dakanibukiaki.

^3-4 Shanẽ ibuhairatũ hiwe anu Mardoqueu shanẽ ibu beshmas ikũkaini shaba tibi yununikai kushipakũkainaya província tibi anu hakiri txaniakeakebaunaibu shanẽ ibu Mardoqueũ kushipawẽ datekĩ maewã yununikabu tibi inũ, província yununikabu tibi inũ, província yununika beshmasbu tibi inũ, Assuerõ shanẽ ibu beshmasbũ Judeu nawabu merabewakubainaibũ

⁵ hatuki sinataibu matxatu txaipawẽ Judeu nawabũ hatuki sinataibu hatu detekubaĩkĩ haska wakatsis ikĩ ma hatu yamawakĩ keyubaunaibũ

^6-10 shanẽ ibuhairatũ maewã Susã anushũ Judeubũ 500 hunibu tenãtã hakia hatũ mabu hawa meabuma ha dikabi Judeu nawabuki sinatamis Hamãnẽ huni bakebu Parsandata inũ, Dalfom inũ, Aspata inũ, Porata inũ, Adalia inũ, Aridata inũ, Farmasta inũ, Arisai inũ, Aridai inũ, Vaizata hati huni bakebu hatu tenãkĩ keyuriabu

¹¹ habias shabatiãri hawẽ maewã Susã anu hati hunibu tenãkãshu Assuero banabimabu nĩkatã

¹² Ester yuikĩ: —Nenu Susã anua besti 500 hunibu inũ Hamãnẽ 10 huni bakeburi minabu Judeu nawabũ tenãkãshukiaki. Ẽ província tibi hanu ẽ yunubaũmis anushũ hatira tenãkãshuki. Mirimahairamẽkaĩ. Hakia ana hawa betsa ẽ mia ashũtiru mĩ betxipaiai ea ana yuiwe. Hawara mĩ ea yuai ẽ mia ashũshanaii— aka

¹³ kemakĩ Esterĩ yuikĩ: —Haska pe mĩ shinaĩ hawẽ yunuti hãtxa txibãkĩ habias akãshu keska meshukiri Susã anushũ habias watirubu mĩ ea hatu yunushũtiruki. Ha inũ, dasibibũ hau uĩkubainũbũ hanu teneshtirubu anu Hamãnẽ 10 huni bakebũ yura hatu dũtãbaĩbainũbũ mĩ ea hatu amashũtiruki— aka

¹⁴ haska Esterĩ ana yuishu shanẽ ibuhairatũ habias hatu yunua hawẽ yunuti hãtxa bena Susã anushũ hatu banabimabaunabu Hamãnẽ 10 huni bakebu tenãshinabu hatũ yura dũtanibukiaki.

¹⁵ Ushe Arartiã inũ 14 shabatiã Susã anu hiweabu Judeu nawabu ana itxashũ ana 300 hunibu tenãtã hakia hatũ mabu hawa meabuma inibukiaki.

^16-17 Ha dikabi província betsa tibi anu hiweabu hatũ hiwea mekei habias ushe Arartiã inũ 13 shabatiã Judeu nawabu itxashũ hatuki sinataibu maemakĩ 75.000 yurabu tenãtã hakia hatũ mabu hawa biãma ushashini shaba 14tiã huĩrukuĩ benimakĩ piti mirima pewatã pi besiaibũ

¹⁸ hanua Susã anu Judeu nawabũ shaba 13 inũ shaba 14tiã hatu tenãshinabuwẽ taea shaba 15tiã huĩrukuĩ benimakĩ piti mirima pewatã pi besiriaibũ

¹⁹ hakia mae hatiubuma inũ mae kenekauana hayabuma anu Judeu nawabu hiweabu ushe Arartiã shaba 14tiã benimakĩ piti mirima pewatã pi besikĩ hatũ hamapai inananãbukunibukiaki.

Besi Purim ano tibi hau akubaĩshanũbũ Mardoqueũ hatu yununikiaki, na hãtxarã

²⁰ Haska hatuki sinataibu Judeu nawabũ hatu maemashinabukiri Mardoqueũ hawẽ kenenikabu unaki hatu kenematã hanu Assuerõ yunubaunai anu província tibi inũ shanẽ ibu benãta hiweabu inũ txaima hiweabu hatu bumanikiaki,

²¹ ano tibi ushe Arartiã shaba 14 inũ shaba 15tiã hau besikubaĩshanũbũ hatu yunukinã.

²² Ha shaba dabetiã hatuki sinataibu Judeu nawabũ hatu maemakĩ yamawatã habias ushe punu nuka datei kasha txakayamabiashinabu maĩ beshteketã habu benimakĩ besi taewabainibukiaki, ha shaba dabetiã inananãbukũkĩ ha dikabi nuitapaibu merabewakĩ hatu inaĩ benimai Judeu nawabu dasibi hau besikĩ pikubaĩshanũbũ hawa henetima wakinã.

²³ Hatu yunukĩ Mardoqueũ hatu keneshunima betxipaikĩ Judeu nawabu dasibibũ ha besitiã hatũ beya wakĩ ha txibãpaketi wanibukiaki.

²⁴ Hanua Judeu nawabu dasibiki sinatakĩ Hamedatã bake Hamãnẽ hatu keyukĩ yamawakatsis ikĩ: “Haratu ushe inũ haratu shaba pemẽkaĩ”, iwanã, mukayabubetã shau meshte númeroya hawẽ kena Purim putakĩ Judeu nawabu hau tenãkĩ keyushanũbũ hawẽ unãti Purimwẽ katuimabu

²⁵ hakia Esterĩ shanẽ ibuhaira yuia Judeu nawabu hau yamawakĩ keyushanũbũ Hamãnẽ yunuti hãtxa txakabu keneshũtã hatu bumabiaima hakia hawẽ shinã txakabuwẽ Hamãnẽ txakabuwaimawẽ taeshũ hanu teneshti anu Hamã inũ hawẽ huni bakebu dũtãkĩ hatu teneshnibukiaki.

²⁶ Haskawẽ taeshũ ha shabatiã hatu maematã benimanibu shinãkĩ hanu besiti beya kenakĩ: “Purimki”, anibukiaki. Mardoqueu bika tenei hiwekũkaĩkĩ hawara uĩmawẽ taeshũ Mardoqueũ kene uĩ: “Txanimaki”, ishũ

²⁷ hamebi inũ hawenabu pakubaĩshanaibu inũ Judeumabia hatũ beya txibãkĩ ibubis txani: “Nũ Judeu nawabuki”, ikubainaibu ano tibi ha shaba dabetiã anu haska Mardoqueũ hatu yusĩma txibãkĩ hawa hakimama Purim besiti beya hau akubaĩshanũbũ Judeu nawa shanẽ ibu dasibibũ hatu yusinikiaki.

²⁸ Judeu nawabu dasibi inũ hatunabu pai hiwekubaĩshanaibu hau hatũ shinã hakimayamanũbarinũbũ Judeu nawabu shukuabu tibi inũ, província tibi inũ, maewã tibi anu hiwebaunabu pakubaĩkĩ habias shaba dabetiã shinaĩ Purim besikubaĩmisbuki.

²⁹ Hanushũ shanẽ ibuhairatũ aĩ kayabi Abiailĩ bake Ester inũ Judeu nawa Mardoqueũ besiti Purimkiri hãtxa kushipa mesewẽ ha dukũ keneima hau txibãpakeshanũbũ ana ha katxu kenekĩ

^30-32 Judeu nawabu dasibi inũ hatunabu pakubainaibu habias ushe inũ shaba dabe Mardoqueu inũ Esterĩ hatu yunuima anu Purim hau besikubaĩshanũbũ unanuma shinãmati hãtxa pepawẽ hatu yunutã habiatiãri kene betsa anu Purim besi taei huĩti nishma kashai samakekubaini keyutã benimakĩ pitirubu Esterĩ yunuti hãtxa hau txibãkubaĩshanũbũ hatu yunuriabu keneshunikabũ hatu keneshunabu 127 província hanu Assuerõ hatu yunubaũmis anu Judeu nawabu shukuabu tibi anu hatũ kene hatu bumabu haska Hamã inũ, Ester inũ, Mardoqueũ akubiranima una anu shanẽ ibuhairatũ keneshunikabũ hatũ miyui kenekĩ dasiwanibukiaki.