Daniel 6 - Kaxinawá Bíblia (BR)

Mai kini merã inu betsa leão pubẽ hiweabu anu Daniel mistunibukiaki, na hãtxarã

¹ Hanu hatu yunubaunai anu hau ha shanẽ ibu beshmaskĩ hatũ mai pakea hau mekekubaĩshanũbũ 120 yununikabu shanẽ ibu Dariõ hatu katutã

² hanushũ mai pakea yununikabu hau habũ hatu uĩkĩ pewashũkubainũbũ haskawẽ taeshũ hawẽ shanẽ ibu benui txakabukatsi ikama 3 shanẽ ibubu betsabu hatu binuabu hatu katuriatã hanua shanẽ ibu pewanika betsa Daniel ikũkaini

³ unanepahairaiwẽ taeshũ dayakĩ ha shanẽ ibu dabe betsa inũ yununikabu beshmasbu dasibi hatu binuaiwẽ taeshũ shanẽ ibuhaira Dariõ shinãkĩ: “Ea katxu Daniel shanẽ ibuhaira ẽ watirumẽkaĩ”, ikaya

⁴ haska shinaĩ hãtxai unãtã Daniel danãkĩ: “Danielkiri mĩ shinainã, dayai peismaki”, iwanã, shanẽ ibuhaira yuikatsi ikĩ ha shanẽ ibu beshmas dabe inũ yununikabũ Daniel daya txakai benaibũ hakia Daniel huni pepawẽ taeshũ hawa yunu txakai betxiabumawẽ taeshũ shanẽ ibuhaira Dario Danielkiri hawa txakabu yuiabumabiakẽ

⁵ habiaskabiakẽ Danielki sinatakĩ danaĩ yuinamei: “Daniel dayai hawa txakabu hayamawẽ taeshũ nũ ha atirumaki. Hakia hawẽ mekenika Deus kẽwãkubainaiwẽ taeshũ nũ Daniel ha atiruki, txakabuwakinã” ika

⁶ shanẽ ibuhaira Dariobe hãtxai ha shanẽ ibu dabe uĩkĩ pewanika inũ yununikabu itxapa bui ha bebũ mapushũ yuikĩ: “Shanẽ ibuũ, habi mĩ hiweyukũkaĩshanaii, hawa beshtekeamarã!

⁷ Shanẽ ibu beshmasbu inũ, maewã yununikabu inũ, mia merabewanikabu inũ, mia dayashũmisbu nũ itxashũ shinãshinaki. Mĩ shanẽ ibuhairatũ yunuti bena mĩ yunutiru nuku dasibibũ eska nũ shinaiĩ. 30 shaba kaya hamapai yushĩ inũ deus inũ hunĩ hawẽ merabewati tsuã yukatirumaki. Kẽwãkĩ mia besti hau yukakubaĩshanũbũwẽ. Tsuabũra mĩ yunuti hãtxa nĩkakĩ mia akabumakẽ mai kini merã inu betsa leão pubẽ hiweabu anu hau hatu urẽshanũbũwẽ.

⁸ Nukũ hãtxa mĩ betxipaiairã, haska hatu yunuwe. Média nawabu inũ Pérsia nawabũ beya tsuã tere akĩ keyutiruma txibãkĩ mĩ yunuti hãtxa mia keneshunabu mĩ kena kenekĩ mestẽwãwẽ, hau tsuã betsa wayamashanunã”, akabu

⁹ haska wabu nĩkatã hatu yunua ma keneshunabu hatu bebũshũ hawẽ kena shanẽ ibuhaira Dariõ kenekĩ mestẽwãkĩ hatu bisha bisha ashuã

¹⁰ hawẽ yunuti hãtxa bena hawẽ kena kenekĩ Dariõ ma mestẽwãshina Daniel nĩkatã hawẽ hiwe anu kai hikishũ hanu ushamis dĩtu anu Jerusalémkiri uiã shui bepẽ keyutã shaba tibi dabe inũ bestiki Deusbe haskakũkaĩmis keskai hãtxanũ ika dãti ishũ hawẽ huiwẽ kẽwãkĩ Deusũ merabewati yukakĩ taewaya

¹¹ habiatiãri Danielĩ hiwe anu hatiri shanẽ ibubu hikibaĩ hawẽ huiwẽ kẽwãkĩ Deusũ hau merabewanũ Danielĩ yukai nĩkatã

¹² tashnibaini hawẽ yunuti hãtxakiri Dariobe hãtxanũ ika bushũ ha bebũ mapushũ yuikĩ: —30 shaba kaya hamapai yushĩ inũ, deus inũ, hunĩ hawẽ merabewati tsuã yukatirumaki. Kẽwãkĩ mia besti hau yukakubaĩshanũbũwẽ. Tsuabũra mĩ yunuti hãtxa nĩkabuma mai kini merã leão pubẽ hiweabu anu hau hatu urẽshanũbũwẽ, akĩ mĩ haska hatu dasibi banabimashinaki, txanimamẽ?— akabu hatu kemakĩ Dariõ yuikĩ: —Habiaskaki. Média nawabu inũ Pérsia nawabũ beya tsuã tere akĩ keyutiruma txibãkĩ ẽ yunuti hãtxa hau akĩ keyukubaĩshanũbũwẽ— hatu wa

¹³ hanushũ ana yuikĩ: —Judá enabu Jerusalém anua hatu iwenibu betsa Daniel miki mesekĩ mĩ hãtxa nĩkama inũ mĩ yunuti hãtxa mĩ hatu banabimashina hawa nĩkamariki. Hawẽ mekenika Deusũ hau merabewanũ shaba tibi yukamis uĩkĩ nũ nĩkashuki— akabu

¹⁴ haska nĩkatã huĩti nishmahairai: “Daniel hau mawayamanũ hawawẽ ẽ merabewatirumẽ? pashawakinã”, ikĩ Dariõ benabaũkĩ bari hikiriama hawẽ yunuti hãtxa keneshinabu maewakatsis ikĩ Dariõ bika teneaya

¹⁵ hakia ha habias yununikabu ana beshũ ha bebũ mapubaũshũ Dario yuikĩ: —Shanẽ ibuũ, Média nawabu inũ Pérsia nawabũ beya txibãkĩ hawẽ nemati inũ hawẽ yunuti hãtxa kenea nĩkama mĩ kenekĩ mestẽwãmis tsuã tere akĩ keyutirumaki, mĩ unãhairairã— akabu

¹⁶ hatũ hãtxa nĩkatã hau Daniel itãshũ hau mai kini merã inu betsa leão pubẽ hiweabu anu hau urenũbũ Dariõ hatu yunua Daniel putariabuma Dariõ Daniel yuikĩ: —Mĩ mekenika Deus txĩtuãma nĩkakĩ mĩ kẽwãkubainaitũ hau mia mekenũwẽ, mĩ debuyamanunã— akaya

¹⁷ leão pubẽ anu Daniel ureãbu mishki sapa ewapa beshũ ha kini bepukĩ Daniel kupiti tsuã betsã bepẽtiruma wakĩ bĩ dekua txabai tuis tuis ikaiwẽ buyatã hawẽ meitxikiti keneyãwẽ Dariõ tsamiã shanẽ ibu beshmas dabetũ habiaskari wanibuki, mishki bepeãbu unãti shara wakinã.

¹⁸ Hanua hawẽ hiwe ewapa hawẽrua anu shanẽ ibuhaira Dario ka hawa piama samakei mimawaibu nĩkakatsi ikama hawẽ dakatiki daka meshu txaitanai Danielkiri shinaĩ ushama ishĩ

¹⁹ penamahaira shabakiranaya bututã mai kini merã leão hiweabu anu hawaira kaĩ

²⁰ haki kemashũ kasha teneshũ Daniel kenakĩ yuikĩ: —Daniel, Deus hiweatũ dayaruũ, mĩ mekenika Deus txĩtuãma nĩkakĩ mĩ kẽwãkubainaitũ leão pubẽbu anu mia urẽbiabũ nemakĩ mia mekeshinamẽ?— aka

²¹ kini uke merãshũ Daniel benimakĩ hui kushipawẽ kemakĩ yuikĩ: —Shanẽ ibuũ, habi mĩ hiweyukũkaĩshanaii, hawa beshtekeamarã!

²² Hawẽ nai tsuma ẽ mekenika Deusũ yunua hau ea txakabuwayamanũbũ leão pubẽbu hatu nemakĩ hatũ kesha bepua ea hawa meama ishiãbuki. Kanekĩ mikiri ẽ hawa txakabuwama ishiã Deusũ unaĩkiki— aka

²³ haskawẽ taea benimahairakĩ kini meranua dispiwẽ hau Daniel mapemanũbũ shanẽ ibuhaira Dariõ hatu yunua ma mapemabu hawẽ mekenika Deus ikũhairawaiwẽ taeshũ hawa piama tsua uĩsisma uiaĩbũ

²⁴ hanushũ ha katxu habũ Danielki txakabuwati shinãshinabu hau hatu itanũbũ Dariõ hatu yunua ha hunibu inũ, hatũ aĩ inũ, hatũ bakebu hatu itãshũ leão pubẽ anu hau hatu urenũbũ hatu yunua hatu urẽ urẽ akabu tĩ iriabuma leão ishtxukirã atxishũ hatũ sheta inũ hatũ mẽtsiswẽ hatu hashkakĩ tseka tseka ashũ pikĩ keyuaibũ

²⁵ hanushũ yurabu dasibi inũ nawa shukuabu betsa betsapa tibi inũ hãtxa betsa betsapawẽ hãtxamisbu mai hirabi anu hawẽ yunuti hãtxa hatu bumakĩ shanẽ ibuhaira Dariõ hatu kenemakĩ yuikĩ: “Hawa nuitapama unanuma hiwei mã mabuyakũkaĩshanũ haska ẽ matukiri shinaiĩ.

²⁶ Hanira ẽ hatu yunubaũmis anushũ Danielĩ mekenika Deus hawa danãma hau haki mesekĩ unãkubaĩshanũbũ matu dasibi ẽ hãtxa ẽ matu yunuaii. Danielĩ mekenika Deus hiweaki, ikibi ikarã. Shanẽ ibukũkainai tsuã keyukĩ yamawatirumaki, hawẽ kushipa hawa keyutirumarã.

²⁷ Txakabu anua kaĩmakĩ tsuabura mekekĩ piskumatiruki. Nai anua inũ mai anua dami atimaska akĩ hatu uĩmamiski. Leão pubenẽ mẽtsis nemakĩ Daniel mekekĩ piskumashinaki”, atã dasibibu anu hatu buma akeakenikiaki.

²⁸ Dario shanẽ ibukũkaini inũ txipu Pérsia nawa Ciro shanẽ ibukũkaĩriaitiã shanẽ ibu ha katxu Daniel warianikiaki.