1 Samuel 2 - Kaxinawá Bíblia (BR)

Deus kẽwaĩ Ana kãtanikiaki, na hãtxarã

¹ Eska hãtxawẽ Anã Senhor Deus kẽwaĩ kãtakĩ yuibaĩkĩ: “Senhor Deusuũ, mĩ ea kushipa bena inaĩwẽ taea mia shinaĩ ẽ huĩti benimaii. Mĩ ea merabewaimawẽ taeshũ eki kashemisbu hatu binui benimahairakĩ ẽ hatu txitetiruki. Mĩ ea merabewaimawẽ taea ẽ benimaii.

² Senhor Deusuũ, tsua meribi mia keska hayamaki. Nukũ mekenika Deusuũ, mĩ nuku mekemis keska tsua hayamaki. Tsuã mia binua ana betsa hayamahairaki.

³ Nukũ mekenika Senhor Deusũ dasibi unãmiswẽ taea hau keĩ tsua hãtxayamakubainũbũwẽ. Haska yurabũ amisbu unãti wakĩ pepawẽ inũ txakabuwẽ mĩ hatu kupimiski.

⁴ Tsakanamemis kushipabũ kanũ tekekubaĩkĩ babuaibu hawẽ kushipa Senhor Deusũ hatu sawemamiski.

⁵ Uatiã piti teshe hayabiani hakia natiã huni betsa dayahairashũkĩ misi tureishta besti bimisbuki. Hakia piti hayama bunikũkainima eskatiã ana buniama yaniwamisbuki. Aĩbuaibu bake bitiruma ibiani eskatiã ma 7 bake hayaki. Hakia aĩbu bake itxapa hayanibu eskatiã bakeuma hi shana keskabuki.

⁶ Senhor Deusũ nukũ hiwea nuku mebĩbiatã anu nuku inãtiruki. Nuku hatu maiwamabiatã hatũ nuku ana benibirãtiruki.

⁷ Mabuya inũ mabuuma Senhor Deusũ nuku wamiski. Hanua nukũ kushipa nuku mebĩbiatã txipu ana kushipa nuku inãtiruki.

⁸ Deusũ mai hirabi dami wakĩ haki maputi wanirã, hawenaki. Haska wakĩ dami washũ haki dasibi yunukĩ mapũbauniki. Haska dami wani hawẽ kushipawẽ taeshũ mai anu mania nuitapai hawauma hiweabu merabewakĩ hatu benimiski. Ha dikabi txaka putati anua pei ea imisbu merabewakĩ hatu kenatã shanẽ ibubube hatu tsaũtã hau yurabũ hatu kẽwanũbũ Senhor Deusũ hatu haska wamiski.

⁹ Hawẽ kushipawẽ tsuã ibubis binutirubumawẽ taeshũ hawẽ hãtxa txibaĩ txĩtuĩsbuma Senhor Deusũ hatu mekekubaĩmiski. Hakia tsuara txakabukĩ nĩkaisbuma hatũ txakabuwẽ mawakubaĩmisbuki, meshu meranua debua keskairã.

¹⁰ Naiuria kana tũ ikaĩkainai hatuki yunua tsuabura haki sinataibu Senhor Deusũ hatu yamawakubaĩmiski, mishki ture ture aka keska wakinã. Shanẽ ibu katushũ kushipa inãni ana hawẽ kushipa binumatã Senhor Deusũ mai hirabi anu hiwebaunabu hawẽ unãti watã kupikĩ keyushanikiki”, ishĩkẽ

¹¹ hanua Elcana hawenabube hawẽ mae Ramá anu txĩtũbaini hikiabũ hakia hau Elĩ yunua Senhor Deus dayashũkũkaĩshanũ hawẽ huni bake Samuel Anã bashishũbainikiaki.

Elĩ huni bake dabe txakabuhaira inibukiaki, na hãtxarã

^12-13 Elĩ huni bake dabe hawenabu Deusbe hatu hãtxashunikabia Senhor Deuskiri hawa shinã pewama txakabukubainaibũ hatunabũ Senhor Deus benimawanũ, iwanã, Siló anu hatũ inabu beshũ tesẽtã dashpeshũ hawẽ sheni dukũ bitã hau Deusbe hawenabu hãtxashunikatũ Deus kuashũkĩ menushunũ hanu Senhor Deuski nukuti tari hiwe pũtenibu anu bua ma hawẽ sheni menukĩ keyushũkẽ hanushũ hawẽ nami meshte meshte atã kẽti ewapaki nami huabu kukatsa ikaya Deusbe hãtxashunikã dayaru betsa hawẽ txatxitã neshetiya hushũ

¹⁴ kẽti ewapaki kukatsa ikai anu pukushũ haratura nami betãkĩ nesheshũ hawẽ tsuma anu butã butãmisbu Siló anu bushũ Israelĩ enabu dasibibũ hatũ ina inãkuĩ beabu Elĩ bakebũ hatu itxakawakĩ habiaskas hatu wapaunibukiaki.

¹⁵ Hatũ beya haskabia hawẽ sheni txi tapu anu menukĩ taewariamabiakẽ Deusbe hãtxashunikã dayaru hushũ Senhor Deus kẽwãkĩ menukatsi ikaibu hatu yuikĩ: “Ẽ tsuma Deusbe hatu hãtxashunikã nami shui pikatsis ikikiki. Ha nami pasha ea inãwẽ. Matũ nami hua danãkĩ betxipaiamaki. Nami pasha besti bikiki”, aka

¹⁶ hakia Israelĩ enabũ hatũ beya pepa kanekatsi ikama txibãkĩ kemakĩ yuikĩ: “Haskamaki. Ha dukũ hawẽ sheni hau menukĩ ea keyushunũwẽ. Haska washũ hawara betxipaiai mĩ tsuma Deusbe nuku hãtxashunikã bitiruki”, aka hakia hawẽ dayarũ kemakĩ yuikĩ: “Hamaki. Ikis hawaira ha dukũ ea inãwẽ. Mĩ ea inãma nĩkamas mia mebĩtã nũ bushuaiĩ”, aka

¹⁷ Senhor Deus inãkuĩ nami hawenabiakẽ ha berunãbũ ibubis txakabukĩ ha inãkuĩ Senhor Deus beshuãbu hawẽ berubi atimapahairawakĩ Senhor Deus kẽwãti beya danãkĩ Senhor Deus sinatamahairaibũ

¹⁸ haskabiaibũ Samuelĩ éfode tari mãyunepa yura putxinĩ kesua saweshũ bakeishtã Senhor Deus duawakĩ Deusbe hatu hãtxashunika shanẽ ibu Eli merabewakubainaya

¹⁹ ano tibi turu tari bena washũtã hawẽ ibubũ Senhor Deus kẽwãkĩ hawẽ kẽwãti nami pinũ ika Siló anu Senhor Deuski nukuti tari hiwe pũtenibu anu hawenabu Elcanã iyui kai hawẽ benebe Ana kakĩ Samuelĩ tari bena ano tibi bushũtãtãmis

²⁰ hawẽ bake Samuel duawaya ano tibi Elĩ uĩkĩ Elcana inũ hawẽ aĩ Anã hãtxa pepawẽ ana hatu yuikĩ: “Senhor Deus duawamakubaĩkĩ hawẽ bake iyua inãkĩ yunuimawẽ taeshũ mĩ aĩ Ana bake itxapa bimakĩ Senhor Deusũ hau mia manakushanũwẽ”, hatu wa benimabaini hatũ hiwe anu txĩtuãbu

²¹ Ana Senhor Deusũ duawakĩ merabewaya bake bitã kaĩpakemis atimas 3 huni bake inũ 2 aĩbu bake Ana hayakẽ hanua Senhor Deusũ berubi Samuel yumekũkaini

²² Eli ma anibuhairakũkainaya hawẽ bakebũ Israelĩ enabu beabu hatu itxakawakubaĩkĩ Deuski nukuti tari hiwe pũtenibu hikiti shui anushũ aĩbuaibu dayaibu txutamisbũ Elĩ unãshũ

²³ hawẽ huni bake dabe kenashũ hatu yukakĩ yuikĩ: “Haska mã txakabukubainaibu dasibibũ matu uĩ eki txanikubaĩkanikiki. Haskai mã haskamismẽ?

²⁴ Ẽ bakebuũ, ana hatu haska wayamakãwẽ. Matukiri hãtxai peama Senhor Deusũ enabũ matu yuãkubaĩkanikiki.

²⁵ Huni betsabe tsuara itxakani kaya hatũ txakabu Senhor Deusũ hatu unãti watã pewakĩ hatu daewatiruki. Hakia tsuabũra Senhor Deus sinatamaibu tsuã Senhor Deus daewatirumaki”, hatu wa ma bebũkiri Senhor Deusũ hatu tenãkatsi yubakashĩkẽ hanushũ hatũ epã hãtxa nĩkabiatã txakabu henekatsi ikama txakabus bestikubainibukiaki.

²⁶ Habiatiãri Samuel yumekĩ pepa akubainaya Senhor Deus inũ yura dasibibũ betxipaikubainaibũ

²⁷ habiatiãri Deusũ hãtxa yuishunika betsa Eli anu hushũ yuikĩ: “Eska hãtxa Senhor Deusũ ea yuishina mia yuinũ ea nĩkawe: ‘Egito anu mĩ shenipabu Faraó dayashunaibũ ẽ kushipa shabakabi ẽ hatu uĩmaniki.

²⁸ Txi tapu anushũ ea benimawati nami menukĩ keyukĩ inũ inĩti deshke ea menushũkĩ ea bebũ ebe hãtxashunikã éfode tari mãyunepa hau sawekubaĩshanũbũ Israelĩ enabu anua mĩ shenipabu Arãonẽ enabu ẽ hatu katuniki, ha hawenabu ebe hãtxashunika ikubaĩshanũbunã. Haskawẽ taeshũ Senhor Deus kẽwãkĩ hawara ea inãkĩ hawẽ sheni hau menukĩ keyukubaĩshanũbũ mĩ shenipabu ẽ hatu yununiki.

²⁹ Ha inãkuĩti inũ ha ea menushũti haska wati ẽ hatu yunubiani danãkĩ haskai eki dateama txakabuwakanimẽkaĩ? Enabu Israelĩ enabũ nami ea inãkuĩ beabu mĩ huni bake dabe duawakĩ pimakĩ mĩ hatu shua besti waii. Haskakĩ ea duawakĩ pewama mĩ bakebu besti nami pepa pimakĩ mĩ hatu duahairawakubainai, ea shinã beshmas wakinã?’

³⁰ hanua Israelĩ enabu mekenika Senhor Deusũ ana mikiri yuikĩ: ‘Ebe hãtxashunikabu hau ikubaĩshanũbũ mĩ shenipabu Arãonẽ enabu ẽ hatu yubaniki, minabu dikabikirirã. Haska ẽ hatu yubani ẽ ana shinãkatsi ikamaki. Habũ ea duawaibu besti eãri ẽ hatu duawashanaii. Hakia habũ ea danaĩbu eãri ẽ hatu danãriashanaii. Ẽ Senhor Deusũ shabakabi ẽ mia yuaii.

³¹ Mĩ shenipabũ kushipa mĩ hayabiani ẽ mia mebiaĩ ma kemaikiki. Minabu hunibu tsuataska mestebuama ishãkanikiki.

³² Israelĩ enabu duawakĩ ẽ hatu pepawashanai shinaĩ mĩ hatu keskamawẽ taea sinai bika tenei punu nukakũkaĩshãwẽ, minabu anibuabumakenã.

³³ Hakia minabu ẽ hatu teshe waima ẽ kẽwãti txi tapu anu ana daya hayama punu nukai keyua hatuki sinatai mapushãkanikiki, minabu eskarabes ẽ henekubainarã. Hakia hatiri minabu betsabu aniburiabuma tsuabura hatuki sinatakĩ hatu tenãkubaĩshãkanikiki.

³⁴ Haska ẽ mia yuishu minabu ikubaĩshanaibu hawẽ mĩ unanũ ẽ mia yuiaii. Mĩ huni bake dabe Hofni inũ Finéias habias diatiã mawashãkanikiki.

³⁵ Hanushũ hawenabu ebe hãtxashunika shanẽ ibu betsa katukĩ ẽ kushipa washanaii. Hatũ pe shinãkĩ ẽ hãtxa inũ haska ẽ betxipaiai unãkĩ ea ashũkubaĩshanikiki. Haskawẽ taeshũ hawenabu shanẽ ibu kushipa ẽ katushanaii. Hau habũ ea dayashũkubaĩshanũbũ ha ebe hãtxashunika shanẽ ibu benã enabu pakubainaibu ẽ hatu hiwemakubaĩshanaii, niti akamarã.

³⁶ Minabu tesheni eskarabes hiweabũ hatũ piti binũ ika pei heshe bestitxai benai inũ misi ture besti binũ ika daya benai ebe hãtxashunika shanẽ ibu bena anu bushũ dãti itã yukashãkanikiki’ ”, akĩ Deusũ hãtxa yuishunikã Eli yuibaini kakẽ