DANIEL 2 - BUKUIT NE TILIL

Ma imuch bik che ng’orsei korji laitoriat karuotitoennyi

¹ Ak eng’ kenyit ne bo aeng’ ne bo laitornatetab Nebukadnesar, koruotyi Nebukadnesar karuotitaosiek; ak kiimak tamirmiriennyi, ak ma inuuch.

² King’at anyun laitoriat keguur bik che ng’omen che ng’orsei, ak ng’omotikab kecheik, ak bonik ak Kaldeik si komwachi laitoriat karuotitaosiekyik. Kibwa anyun go ak kotononso eng’ taitab laitoriat.

³ Ak kilenji laitoriat ichek, koaruotyi karuotitoet, ak iimaaksei tamirmiriennyu komachei konai karuotitaonoto.

⁴ Kong’alalji anyun Kaldeik laitoriat eng’ kutitab Suria, kolenji, Ee, laitoriandani, sob agoi: mwawech achek otwogiguk karuotitaonoto, si kiborun kaweeksennyi.

⁵ Kiwolji laitoriat Kaldeik kolenji, Bo iman ng’olyot ne kaatil ale: ngot ko moborua karuotitaonoto ak kaweeksennyi, ketonatonok, ak koek gorikwok kapng’atat.

⁶ Ago ngot oborua karuotitoet ak kaweeksennyi, onyoru eng’ ane konunoik ak melekwek ak teegisto ne o: oborua anyun karuotitoet, ak kaweeksennyi.

⁷ Kiwolji ne bo aeng’ kolenji, Ingomwawech laitoriat achek otwogikyik karuotitaonoto, si kiboru kaweekset.

⁸ Kowol laitoriat kole, Angen komie ale omache onyoru boroindo, amu bo iman ng’olondonito kaatil.

⁹ Ago ngot ko moborua karuotitoet, komi ng’atutiet agenge ne nyoljinok: amu koochob lembechek ak ng’alek che yaachen si omwa eng’ tainnyu, kot kowalak betusiek: omwawa anyun karuotitaonoto, si anai ale omuchi oborua kaweeksennyi.

¹⁰ Kowol Kaldeik eng’ taitab laitoriat kole, Mami chi ng’ony ne imuchi kobor ng’olyondonoto bo laitoriat: amu mami laitoriat, anan chi ne o, anan ribindet ne kiga koteebe kit ne u noto chi age tugul ne ng’om ne ng’orsei anan ng’omotiotab kecheik anan Kaldeindet.

¹¹ Ak ko kit ne ma bo kotugul ni kateeb laitoriat, ama mi age ne imuchi koborji laitoriat, kobate cheptalelisiek, che mamenyei ak bik.

¹² Kinerech anyun mising’ laitoriat eng’ neregek che ng’wonen eng’ ng’olyondonito, ak kong’at kebar bik tugul che ng’omen che bo Babulon.

¹³ Kigimwaita anyun ng’atutiet kele kebar bik che ng’omen; ak kigicheng’ Daniel ak choronokyik kele kebar.

Kong’ang’jin Jehovah Daniel ung’otiet

¹⁴ Kiwol anyun Daniel eng’ naet ak ng’omnatet, kowolji Ariok kiptaiyatab ribikab laitoriat ne kigawa kole kobar bik che ng’omen che bo Babulon;

¹⁵ kiwolji Daniel Ariok kiptaiyatab laitoriat kolenji, Amu nee si kogoromit ko u ni ng’atutioni bunu laitoriat? Kiborji anyun Ariok Daniel ng’olyondonoto.

¹⁶ Ak kiwa Daniel go, ak kosom laitoriat kole keng’atyi betut, si koborji laitoriat kaweekset.

¹⁷ Kiwa anyun Daniel gonnyi, ak koborji ng’olyondonoto Hanania, Misael ak Asaria, choronokyik:

¹⁸ si kosom rirenosiek che bo Kamuktaindetab kipsengwert agobo ung’otioni; kole si ma kibar Daniel ak choronokyik koboto bik alak che ng’omen che bo Babulon.

¹⁹ Kiging’ang’ji anyun Daniel ung’otionoto eng’ ng’ang’utiet ne bo kemoi. Kiilos anyun Daniel Kamuktaindetab kipsengwet.

²⁰ Kiwol Daniel kole, Iberurot kainetab Kamuktaindet koigeny ak koigeny: amu nenyi ng’omnatet ak kamuktaet:

²¹ ak kowalei betusiek ak kenyisiek; istoi laitorinik, ak koeeti laitorinik; igochin ng’omnatet che ng’omen, ak kogochin naet ichek che ingen kaguiyet:

²² ng’anyei tuguk che looen ak ko ung’otin: ingen tuguk che mi mesundeito, ak komenyei lapkeiyet koboto inendet.

²³ Aweegun kongoi, ak alosun, ee inye, Kamuktaindetab kwanisiekyuk, ne kiigona ng’omnatet ak kamuget, ak kaiborun nguno kit ne kogimagenen: amu kaiboruech ng’olyotab laitoriat.

²⁴ Kwo anyun Daniel ole mi Ariok, ne kiga kong’at laitoriat kole kobar bik che ng’omen che bo Babulon: kiwa komwachi ichek ko u ni kole: Amat ibar bik che ng’omen che bo Babulon: imuta ole mi laitoriat, si aborji laitoriat kaweekset.

Komwachin Daniel laitoriat karuotitoennyi

²⁵ Komut anyun Ariok Daniel kochaktae kwo taitab laitoriat, ak kolenji, Kaanyoru chi eng’ lagokab bik che kigiluul che bo Juda, ne imuchi koborji laitoriat kaweekset.

²⁶ Kiwolji laitoriat Daniel, ne kigiguure Beltesaser kolenji, Tos imuchi iborua kit ne kiageer eng’ karuotitoet, ak kaweeksennyi?

²⁷ Kowol Daniel eng’ taitab laitoriat, kole, Ung’otiet ne kateeb latoriat ko maimuchi bik che ng’omen, anan ng’omotikab kecheik, anan bik che ng’omen che ng’orsei, anan kipsogeinik, koborji laitoriat;

²⁸ ago mi Kamuktaindet kipsengwet ne ng’anyei ung’otik, ak kagoborji inendet laitoriat Nebukadnesar tuguk che tun biitu eng’ betusiek che bo let. Karuotitoeng’ung’ ak ng’ang’utik che kibwa meting’ung’ eng’ itogung’ung’ ko chu:

²⁹ ago inye, ee laitoriat, kibwanjin kabwatutiguk eng’ itogung’ung’, agobo tuguk che tun biitu let: ak kagoborun inendet ne ng’anyei ung’otik, tuguk che tun biitu.

³⁰ Ago eng’ ane, ko ma king’ang’wa ung’otionito amu ng’omnatet age tugul ne atinye kosiir chi age tugul ne sobei, ago si kobiit kiborji laitoriat kaweekset, ak si kobiit inai kabwatutikab muguleldang’ung’.

³¹ Koigeer inye, ee laitoriat, kanamwet ne o. Kitonone taing’ung’ kanamwonoto o, ne ko kararan mising’ kakweng’ennyi; ak koimuisiei itondanyi.

³² Ko bo tahabu ne kararan metitab kanamwonoto, ko bo feda togennyi ak eunekyik, ko bo sugunwet moennyi ak kubesaikyik,

³³ ko bo karnet kelyekyik, ko bo kebebertab keldebesaikyik karnet, ko bo kebeberta age, menet.

³⁴ Koigeer kot keeb koita ne ma kiebe eunek, ne kokwer keldebesaikab kanamwonoto che ko bo karnet ak menet, ak kotonaton.

³⁵ Kotonogis anyun tugul; karik, menet, sugunwet, feda, ak tahabu, ak koigei metetek che bo ruanyut ne kiborse; ak koib usonet, kot ko mata kenyorji ui: ak koek tulwet ne o kayato kotuei kanamwet, ak konyi emet komugul.

Koboru Daniel kaweeksetab karuotitoet

³⁶ Karuotitoet nito; ak kimwachini laitoriat kaweeksennyi.

³⁷ Ee laitoriandani, i laitoriatab laitorinik, ne kogogochi Kamuktaindetab kipsengwet bounatet, kamuget, ak kimnatet ak torornatet;

³⁸ ak kigogonin inendet oldo tugul ole menyei bik, ak tiong’ikab timin, ak taritikab barak kobwa eung’ung’ ak kigogonin ibou ichek tugul: inyendet metoto bo tahabu.

³⁹ Ak ye tun ma imi, kobiit bounatet age ne matenitu neng’ung’; yeityo kobiit bounatet age, ne bo somok, ne bo sugunwet, ne tun bou ng’ony komugul.

⁴⁰ Ak kimitu bounatet ne bo ang’wan ko u karnet: amu tonatoni karnet tuguk tugul ak koterter: ak ko u ye nyinyiri karnet chuto tugul, ko u noto tuisiei agine bounatonoto ak konyinyiris.

⁴¹ Ak ko u ye koigeer keldebesaik koboto morik, ne kebebertab menetab cheptereniot ak kebebertab karnet, koegu bounatet ne pcheoksei; ago mi orinnyi kimnatetab karnet, amu koigeer karnet ko burugot ak menet ne boto ng’ung’unyek.

⁴² Ak ko u ye ko bo morikab keldebesaik kebebertab karnet, ak kebebertab menet, ko u noto kimitu kebebertab bounatonoto, ak kobutok kebeberta age.

⁴³ Ak ko u ye koigeer ko burugot karnet ak menet ne boto ng’ung’unyek, koburuchegei ak iyotetab bik; ago manamegei age ak age, ko u ye maburuchegei karnet ak menet.

⁴⁴ Ak tun lumdoi Kamuktaindetab kipsengwet eng’ betusiekab laitorinichoto bounatet ne magoi king’em, ama kigochin laitornatanato boror age; ago tuatui ak koges bounatosiechuto tugul, ak tononi koigeny.

⁴⁵ Ak ko u ye koigeer ile kogieb koita ne komi tulwet ama eng’ eunek, si kotuatui karnet, sugunwet, menet, feda, ak tahabu; kagoborji Kamuktaindet ne o, laitoriat, tuguk che tun biitu let: ak bo iman karuotitoet, ak kosuldoi kaweeksennyi.

Koeti laitoriat Daniel ak choronokyik

⁴⁶ Kobutyi ng’ony anyun laitoriat Nebukadnesar ak kolos Daniel, ak kong’at kole, kigochi kagochinet koboto nyamdutik che anyiny.

⁴⁷ Kowolji laitoriat Daniel kolenji, Iman Kamuktaindeng’wong’ ko Kamuktaindet ne bou cheptalelisiek, ak ko Kiptaiyatab laitorinik, ak ng’ang’indetab ung’otik, amu kaimuch ing’any ung’otioni.

⁴⁸ Koeet anyun laitoriat Daniel, ak kogochi inendet kagochinoik che eechen, ak kogochi inendet koboi emet komugul ne bo Babulon; ak koek kiruogindet ne o ne bou bik tugul che ng’omen che bo Babulon.

⁴⁹ Ak kisom Daniel laitoriat, konde Sadrak, Mesak, ak Abed-nego, koboi ng’alekab emetab Babulon: ago kitebe Daniel ormarichetab laitoriat.