ភាពមិនស្មោះត្រង់របស់អ៊ីស្រាអែលចំពោះព្រះ1 ហាលេលូយ៉ា! ចូរអរព្រះគុណដល់ព្រះយេហូវ៉ា ដ្បិតព្រះអង្គទ្រង់ល្អ ដ្បិតសេចក្ដីស្រឡាញ់ឥតប្រែប្រួលរបស់ព្រះអង្គនៅអស់កល្បជានិច្ច! 2 តើនរណាអាចថ្លែងកិច្ចការដ៏មានព្រះចេស្ដារបស់ព្រះយេហូវ៉ាបាន? តើនរណាអាចប្រកាសសព្វគ្រប់នូវសេចក្ដីសរសើរតម្កើងនៃព្រះអង្គបាន? 3 មានពរហើយ អ្នកដែលរក្សាសេចក្ដីយុត្តិធម៌ ដែលអនុវត្តសេចក្ដីសុចរិតគ្រប់ពេល! 4 ព្រះយេហូវ៉ាអើយ កាលណាព្រះអង្គមានសេចក្ដីសន្ដោសចំពោះប្រជារាស្ត្ររបស់ព្រះអង្គ សូមនឹកចាំទូលបង្គំផង សូមមើលថែទូលបង្គំដោយសេចក្ដីសង្គ្រោះរបស់ព្រះអង្គផង 5 ដើម្បីឲ្យទូលបង្គំឃើញភាពមានពររបស់អ្នកដែលត្រូវបានជ្រើសរើសរបស់ព្រះអង្គ ដើម្បីឲ្យទូលបង្គំអរសប្បាយក្នុងអំណរនៃប្រជាជាតិរបស់ព្រះអង្គ និងដើម្បីឲ្យទូលបង្គំអួតជាមួយមរតករបស់ព្រះអង្គ! 6 យើងខ្ញុំបានប្រព្រឹត្តបាប ដូចដូនតារបស់យើងខ្ញុំ យើងខ្ញុំបានប្រព្រឹត្តអំពើទុច្ចរិត ហើយប្រព្រឹត្តអាក្រក់។ 7 ដូនតារបស់យើងខ្ញុំមិនបានចាប់ភ្លឹកនឹងកិច្ចការដ៏អស្ចារ្យទាំងឡាយរបស់ព្រះអង្គ កាលនៅអេហ្ស៊ីប; ពួកគាត់មិនបាននឹកចាំភាពបរិបូរនៃសេចក្ដីស្រឡាញ់ឥតប្រែប្រួលរបស់ព្រះអង្គឡើយ ផ្ទុយទៅវិញ ពួកគាត់បានបះបោរនៅក្បែរសមុទ្រ គឺត្រង់សមុទ្រក្រហម។ 8 យ៉ាងណាមិញ ព្រះអង្គបានសង្គ្រោះពួកគាត់ដោយយល់ដល់ព្រះនាមរបស់ព្រះអង្គ ដើម្បីសម្ដែងព្រះចេស្ដារបស់ព្រះអង្គ។ 9 ដូច្នេះ ព្រះអង្គបានស្ដីបន្ទោសសមុទ្រក្រហម នោះវាក៏រីងទៅ ហើយព្រះអង្គបាននាំពួកគាត់ដើរកាត់ទីជម្រៅ ដូចដើរកាត់ទីរហោស្ថាន។ 10 ព្រះអង្គបានសង្គ្រោះពួកគាត់ពីកណ្ដាប់ដៃរបស់អ្នកដែលស្អប់ពួកគាត់ ព្រះអង្គបានប្រោសលោះពួកគាត់ពីកណ្ដាប់ដៃរបស់ខ្មាំងសត្រូវ។ 11 ទឹកដ៏ច្រើនបានគ្របលើបច្ចាមិត្តរបស់ពួកគាត់ គឺគ្មានសល់អ្នកណាម្នាក់ពីចំណោមពួកគេឡើយ។ 12 នោះពួកគាត់ក៏ជឿលើព្រះបន្ទូលរបស់ព្រះអង្គ ហើយច្រៀងសរសើរតម្កើងព្រះអង្គ។ 13 ប៉ុន្តែពួកគាត់ឆាប់ភ្លេចកិច្ចការរបស់ព្រះអង្គ ហើយមិនបានរង់ចាំដំបូន្មានរបស់ព្រះអង្គឡើយ។ 14 ពួកគាត់ចេះតែលោភចង់បាន នៅទីរហោស្ថាន ហើយល្បងលព្រះ នៅទីហួតហែង។ 15 ដូច្នេះ ព្រះអង្គបានប្រទានតាមសំណូមរបស់ពួកគាត់ ប៉ុន្តែព្រះអង្គបានបញ្ជូនសេចក្ដីស្គមស្គាំងទៅក្នុងព្រលឹងរបស់ពួកគាត់ដែរ។ 16 នៅក្នុងជំរំ ពួកគាត់ច្រណែនម៉ូសេ និងអើរ៉ុនជាវិសុទ្ធជនរបស់ព្រះយេហូវ៉ា 17 នោះដីក៏បើកចំហ ហើយលេបដាថាន ព្រមទាំងគ្របលើបក្សពួករបស់អ័ប៊ីរ៉ាម។ 18 ភ្លើងឆេះឡើងក្នុងបក្សពួករបស់ពួកគេ អណ្ដាតភ្លើងក៏បញ្ឆេះពួកមនុស្សអាក្រក់។ 19 ពួកគាត់ធ្វើកូនគោមួយនៅភ្នំហោរែប ពួកគាត់ថ្វាយបង្គំរូបសិតមួយ 20 គឺពួកគាត់ប្ដូរព្រះនៃសិរីរុងរឿងរបស់ពួកគាត់ នឹងរូបគោបាដែលស៊ីស្មៅ។ 21 ពួកគាត់បានភ្លេចព្រះដែលជាព្រះសង្គ្រោះរបស់ពួកគាត់ ដែលធ្វើកិច្ចការដ៏ធំឧត្ដមនៅអេហ្ស៊ីប 22 គឺកិច្ចការដ៏អស្ចារ្យដែលធ្វើនៅដែនដីរបស់ហាំ និងកិច្ចការដែលគួរឲ្យស្ញែងខ្លាចនៅសមុទ្រក្រហម។ 23 ដូច្នេះ ព្រះអង្គមានបន្ទូលថានឹងបំផ្លាញពួកគាត់; ប្រសិនបើម៉ូសេអ្នកដែលត្រូវបានជ្រើសរើសរបស់ព្រះអង្គ មិនបានឈរនៅចន្លោះបាក់បែកនៅចំពោះព្រះអង្គ ដើម្បីបង្វែរសេចក្ដីក្រេវក្រោធរបស់ព្រះអង្គទេ ម្ល៉េះសមព្រះអង្គបានបំផ្លាញពួកគាត់ហើយ! 24 ពួកគាត់បានបដិសេធទឹកដីដ៏ល្អវិសេស ហើយមិនបានជឿលើព្រះបន្ទូលរបស់ព្រះអង្គឡើយ។ 25 ពួកគាត់បានរអ៊ូរទាំនៅក្នុងរោងរបស់ខ្លួន ហើយមិនស្ដាប់តាមព្រះសូរសៀងរបស់ព្រះយេហូវ៉ាឡើយ។ 26 ដូច្នេះ ព្រះអង្គបានលើកព្រះហស្តរបស់ព្រះអង្គឡើងស្បថទាស់នឹងពួកគាត់ ដើម្បីធ្វើឲ្យពួកគាត់ដួលនៅទីរហោស្ថាន 27 និងដើម្បីធ្វើឲ្យពូជពង្សរបស់ពួកគាត់ដួលក្នុងចំណោមប្រជាជាតិនានា ព្រមទាំងដើម្បីកម្ចាត់កម្ចាយពួកគាត់ទៅក្នុងទឹកដីនានាផង។ 28 ក្រោយមក ពួកគាត់បានភ្ជាប់ខ្លួននឹងព្រះបាល-ពេអរ ពួកគាត់បានហូបយញ្ញបូជារបស់ព្រះដែលគ្មានជីវិត 29 ពួកគាត់ធ្វើឲ្យព្រះយេហូវ៉ាក្រេវក្រោធដោយទង្វើរបស់ពួកគាត់ នោះជំងឺឧត្បាតក៏ផ្ទុះឡើងក្នុងចំណោមពួកគាត់។ 30 ពេលនោះ ភីនេហាសឈរឡើង ហើយធ្វើអន្តរាគមន៍ នោះជំងឺឧត្បាតក៏ឈប់។ 31 ការនេះត្រូវបានរាប់ជាសេចក្ដីសុចរិតដល់គាត់ ពីជំនាន់មួយទៅជំនាន់មួយជារៀងរហូត។ 32 ពួកគាត់ក៏ធ្វើឲ្យព្រះទ្រង់ព្រះពិរោធនៅត្រង់ទឹកមេរីបា រហូតដល់នាំឲ្យមានរឿងអាក្រក់ដល់ម៉ូសេ ដោយសារតែពួកគាត់; 33 ដ្បិតពួកគាត់ធ្វើឲ្យវិញ្ញាណរបស់លោកល្វីងជូរចត់ នោះលោកក៏និយាយឥតបើគិតដោយបបូរមាត់របស់លោក។ 34 ពួកគាត់មិនបានបំផ្លាញសាសន៍ទាំងឡាយ ដូចដែលព្រះយេហូវ៉ាបានបង្គាប់ពួកគាត់ឡើយ 35 ផ្ទុយទៅវិញ ពួកគាត់បានភប់ប្រសព្វជាមួយប្រជាជាតិនានា ហើយរៀនចេះការប្រព្រឹត្តរបស់គេ។ 36 ពួកគាត់បម្រើរូបបដិមាកររបស់គេ នោះវាក៏ទៅជាអន្ទាក់ដល់ពួកគាត់។ 37 ពួកគាត់ថ្វាយកូនប្រុសកូនស្រីរបស់ខ្លួនជាយញ្ញបូជាដល់អារក្ស; 38 ពួកគាត់បង្ហូរឈាមមនុស្សឥតទោស គឺឈាមរបស់កូនប្រុសកូនស្រីរបស់ខ្លួន ដែលពួកគាត់បានថ្វាយជាយញ្ញបូជាដល់រូបបដិមាកររបស់ពួកកាណាន ទឹកដីនោះក៏សៅហ្មងដោយឈាម។ 39 ដូច្នេះ ពួកគាត់ទៅជាសៅហ្មងដោយការប្រព្រឹត្តរបស់ខ្លួន ហើយប្រព្រឹត្តអំពើផិតក្បត់ដោយទង្វើរបស់ខ្លួន។ 40 បន្ទាប់មក ព្រះពិរោធរបស់ព្រះយេហូវ៉ាបានឆេះឡើងទាស់នឹងប្រជារាស្ត្ររបស់ព្រះអង្គ; ព្រះអង្គក៏ស្អប់ខ្ពើមមរតករបស់ព្រះអង្គ 41 ហើយប្រគល់ពួកគាត់ទៅក្នុងកណ្ដាប់ដៃរបស់ប្រជាជាតិនានា ព្រមទាំងឲ្យអ្នកដែលស្អប់ពួកគាត់ គ្រប់គ្រងលើពួកគាត់ផង។ 42 សត្រូវរបស់ពួកគាត់បានសង្កត់សង្កិនពួកគាត់ ពួកគាត់ក៏ត្រូវបានបង្ក្រាបនៅក្រោមកណ្ដាប់ដៃរបស់សត្រូវទាំងនោះ។ 43 ព្រះអង្គបានរំដោះពួកគាត់ជាច្រើនដង ប៉ុន្តែពួកគាត់បានបះបោរតាមបំណងរបស់ខ្លួន ហើយធ្លាក់ទៅក្នុងអំពើទុច្ចរិតរបស់ខ្លួនពួកគាត់។ 44 យ៉ាងណាមិញ កាលណាព្រះអង្គទ្រង់ឮសម្រែករបស់ពួកគាត់ ព្រះអង្គក៏យកចិត្តទុកដាក់នឹងទុក្ខវេទនារបស់ពួកគាត់ 45 ហើយដោយយល់ដល់ពួកគាត់ ព្រះអង្គទ្រង់នឹកចាំសម្ពន្ធមេត្រីរបស់ព្រះអង្គ ក៏ប្ដូរព្រះហឫទ័យស្របតាមភាពបរិបូរនៃសេចក្ដីស្រឡាញ់ឥតប្រែប្រួលរបស់ព្រះអង្គ 46 ព្រមទាំងធ្វើឲ្យពួកគាត់ទទួលបានសេចក្ដីមេត្តា នៅចំពោះអស់អ្នកដែលចាប់ពួកគាត់ជាឈ្លើយសឹកផង។ 47 ព្រះយេហូវ៉ាដ៏ជាព្រះនៃយើងខ្ញុំអើយ សូមសង្គ្រោះយើងខ្ញុំផង សូមប្រមូលយើងខ្ញុំពីចំណោមប្រជាជាតិនានា ដើម្បីឲ្យយើងខ្ញុំបានអរព្រះគុណដល់ព្រះនាមដ៏វិសុទ្ធរបស់ព្រះអង្គ ហើយអបអរក្នុងការសរសើរតម្កើងព្រះអង្គផង! 48 សូមឲ្យមានព្រះពរដល់ព្រះយេហូវ៉ាដ៏ជាព្រះនៃអ៊ីស្រាអែល ចាប់ពីអស់កល្ប រហូតដល់អស់កល្ប។ សូមឲ្យប្រជាជនទាំងអស់និយាយថា៖ “អាម៉ែន!”។ ហាលេលូយ៉ា!៕ |