ទំនុកតម្កើង 107 - ព្រះគម្ពីរខ្មែរសាកលភាគ ៥ (ទំនុកតម្កើង 107-150) អរព្រះគុណសម្រាប់ការជួយសង្គ្រោះរបស់ព្រះ 1 ចូរអរព្រះគុណដល់ព្រះយេហូវ៉ា ដ្បិតព្រះអង្គទ្រង់ល្អ ដ្បិតសេចក្ដីស្រឡាញ់ឥតប្រែប្រួលរបស់ព្រះអង្គនៅអស់កល្បជានិច្ច—— 2 សូមឲ្យអ្នកដែលព្រះយេហូវ៉ាបានប្រោសលោះនិយាយដូច្នេះ គឺអ្នកដែលព្រះអង្គបានប្រោសលោះពីកណ្ដាប់ដៃរបស់បច្ចាមិត្ត 3 និងប្រមូលពីស្រុកនានា ពីទិសខាងកើត ពីទិសខាងលិច ពីទិសខាងជើង និងពីទិសខាងត្បូង។ 4 អ្នកខ្លះបានវង្វេងក្នុងទីរហោស្ថាន ក្នុងទីហួតហែង ក៏រកផ្លូវទៅទីក្រុងដែលជាទីស្នាក់អាស្រ័យមិនបានឡើយ។ 5 ពួកគេឃ្លានផងស្រេកផង ហើយព្រលឹងរបស់ពួកគេក៏ចុះខ្សោយនៅក្នុងពួកគេ។ 6 គ្រានោះ ពួកគេបានស្រែកឡើងទៅកាន់ព្រះយេហូវ៉ា ក្នុងទុក្ខវេទនារបស់ពួកគេ នោះព្រះអង្គក៏រំដោះពួកគេពីទុក្ខព្រួយរបស់ពួកគេ។ 7 ព្រះអង្គទ្រង់នាំពួកគេឲ្យដើរក្នុងផ្លូវត្រឹមត្រូវ ដើម្បីឲ្យទៅដល់ទីក្រុងដែលជាទីស្នាក់អាស្រ័យ។ 8 សូមឲ្យពួកគេអរព្រះគុណដល់ព្រះយេហូវ៉ា សម្រាប់សេចក្ដីស្រឡាញ់ឥតប្រែប្រួលរបស់ព្រះអង្គ និងសម្រាប់កិច្ចការដ៏អស្ចារ្យរបស់ព្រះអង្គចំពោះមនុស្សលោក! 9 ដ្បិតព្រះអង្គបានចម្អែតព្រលឹងដែលស្រេក ហើយបំពេញព្រលឹងដែលឃ្លានដោយសេចក្ដីល្អ។ 10 អ្នកខ្លះបានអង្គុយក្នុងសេចក្ដីងងឹត និងស្រមោលនៃសេចក្ដីស្លាប់ ជាអ្នកទោសនៃទុក្ខវេទនា និងច្រវាក់ដែក 11 ដោយសារពួកគេបានបះបោរនឹងព្រះបន្ទូលរបស់ព្រះ ហើយមើលងាយដំបូន្មានរបស់ព្រះដ៏ខ្ពស់បំផុត។ 12 ដូច្នេះ ព្រះអង្គបានបន្ទាបចិត្តរបស់ពួកគេដោយការនឿយហត់; ពួកគេបានជំពប់ ហើយគ្មានអ្នកណាជួយឡើយ។ 13 គ្រានោះ ពួកគេបានស្រែកយំទៅកាន់ព្រះយេហូវ៉ា ក្នុងទុក្ខវេទនារបស់ពួកគេ នោះព្រះអង្គក៏សង្គ្រោះពួកគេពីទុក្ខព្រួយរបស់ពួកគេ។ 14 ព្រះអង្គទ្រង់នាំពួកគេចេញពីសេចក្ដីងងឹត និងស្រមោលនៃសេចក្ដីស្លាប់ ហើយផ្ដាច់ចំណងរបស់ពួកគេ។ 15 សូមឲ្យពួកគេអរព្រះគុណដល់ព្រះយេហូវ៉ា សម្រាប់សេចក្ដីស្រឡាញ់ឥតប្រែប្រួលរបស់ព្រះអង្គ និងសម្រាប់កិច្ចការដ៏អស្ចារ្យរបស់ព្រះអង្គចំពោះមនុស្សលោក! 16 ដ្បិតព្រះអង្គបានបំបាក់ទ្វារលង្ហិន ហើយកាត់រនុកដែកចោល។ 17 អ្នកខ្លះជាមនុស្សល្ងីល្ងើដោយសារតែផ្លូវនៃការបំពានរបស់ខ្លួន ហើយរងទុក្ខដោយសារតែអំពើទុច្ចរិតរបស់ខ្លួន។ 18 ព្រលឹងរបស់ពួកគេខ្ពើមអាហារគ្រប់មុខ ហើយខិតទៅជិតខ្លោងទ្វារនៃសេចក្ដីស្លាប់។ 19 គ្រានោះ ពួកគេស្រែកយំទៅកាន់ព្រះយេហូវ៉ា ក្នុងទុក្ខវេទនារបស់ពួកគេ នោះព្រះអង្គក៏សង្គ្រោះពួកគេពីទុក្ខព្រួយរបស់ពួកគេ។ 20 ព្រះអង្គទ្រង់ចាត់ព្រះបន្ទូលរបស់ព្រះអង្គឲ្យមក ហើយប្រោសពួកគេឲ្យជា ព្រមទាំងរំដោះពួកគេពីរណ្ដៅមរណៈផង។ 21 សូមឲ្យពួកគេអរព្រះគុណដល់ព្រះយេហូវ៉ា សម្រាប់សេចក្ដីស្រឡាញ់ឥតប្រែប្រួលរបស់ព្រះអង្គ និងសម្រាប់កិច្ចការដ៏អស្ចារ្យរបស់ព្រះអង្គចំពោះមនុស្សលោក! 22 សូមឲ្យពួកគេថ្វាយយញ្ញបូជានៃការអរព្រះគុណ ហើយថ្លែងអំពីស្នាព្រះហស្តរបស់ព្រះអង្គ ដោយសម្រែកហ៊ោសប្បាយ! 23 អ្នកខ្លះចុះទៅសមុទ្រតាមនាវា ទាំងធ្វើជំនួញលើទឹកដ៏ច្រើន; 24 ពួកគេបានឃើញស្នាព្រះហស្តរបស់ព្រះយេហូវ៉ា និងកិច្ចការដ៏អស្ចារ្យរបស់ព្រះអង្គនៅក្នុងទីជម្រៅ។ 25 ព្រះអង្គមានបន្ទូល នោះក៏កើតមានខ្យល់ព្យុះ ហើយវាលើករលកសមុទ្រឡើង។ 26 ពួកគេឡើងទៅផ្ទៃមេឃ រួចចុះទៅទីជម្រៅ នោះព្រលឹងរបស់ពួកគេក៏រលាយនៅក្នុងមហន្តរាយ។ 27 ពួកគេយោលយោកចុះឡើង ហើយដើរទ្រេតទ្រោតដូចមនុស្សស្រវឹង រីឯអស់ទាំងប្រាជ្ញារបស់ពួកគេក៏អស់ទៅ។ 28 គ្រានោះ ពួកគេស្រែកឡើងទៅកាន់ព្រះយេហូវ៉ា ក្នុងទុក្ខវេទនារបស់ពួកគេ នោះព្រះអង្គក៏យកពួកគេចេញពីទុក្ខព្រួយរបស់ពួកគេ។ 29 ព្រះអង្គទ្រង់ធ្វើឲ្យព្យុះសង្ឃរាស្ងប់ស្ងាត់ឈឹង ហើយរលកសមុទ្រក៏ស្ងៀមស្ងប់ទៅ។ 30 នោះពួកគេក៏អរសប្បាយដោយព្រោះវាស្ងប់ ហើយព្រះអង្គទ្រង់នាំពួកគេទៅកំពង់ផែដែលពួកគេប្រាថ្នាចង់ទៅ។ 31 សូមឲ្យពួកគេអរព្រះគុណដល់ព្រះយេហូវ៉ា សម្រាប់សេចក្ដីស្រឡាញ់ឥតប្រែប្រួលរបស់ព្រះអង្គ និងសម្រាប់កិច្ចការដ៏អស្ចារ្យរបស់ព្រះអង្គចំពោះមនុស្សលោក! 32 សូមឲ្យពួកគេលើកតម្កើងព្រះអង្គនៅក្នុងអង្គប្រជុំរបស់ប្រជាជន ហើយសរសើរតម្កើងព្រះអង្គក្នុងចំណោមកៅអីរបស់ពួកចាស់ទុំ! 33 ព្រះអង្គទ្រង់ធ្វើឲ្យទន្លេទៅជាទីរហោស្ថាន ហើយធ្វើឲ្យប្រភពទឹកទៅជាដីហួតហែង 34 ក៏ធ្វើឲ្យដីដែលផ្ដល់ផលផ្លែទៅជាដីប្រៃ ព្រោះតែការអាក្រក់របស់អ្នកដែលរស់នៅទីនោះ។ 35 ព្រះអង្គទ្រង់ធ្វើឲ្យទីរហោស្ថានទៅជាស្រះទឹក ហើយធ្វើឲ្យដីហួតហែងទៅជាប្រភពទឹក។ 36 ព្រះអង្គទ្រង់ធ្វើឲ្យមនុស្សអត់ឃ្លានបានរស់នៅទីនោះ ហើយពួកគេសាងសង់ទីក្រុងដែលជាទីស្នាក់អាស្រ័យ។ 37 ពួកគេសាបព្រោះនៅស្រែ ហើយធ្វើចម្ការទំពាំងបាយជូរផង ក៏ទទួលបានចម្រូតសម្បូរផលផ្លែ។ 38 ព្រះអង្គប្រទានពរពួកគេ នោះពួកគេក៏កើនចំនួនឡើងយ៉ាងច្រើន; ព្រះអង្គមិនធ្វើឲ្យសត្វស្រុករបស់ពួកគេថយចុះឡើយ។ 39 ក្រោយមក ពួកគេថយចុះ ហើយចុះខ្សោយ ដោយសារតែការសង្កត់សង្កិន មហន្តរាយ និងទុក្ខព្រួយ។ 40 ព្រះអង្គទ្រង់ចាក់សេចក្ដីមើលងាយលើពួកអភិជន ហើយធ្វើឲ្យពួកគេវង្វេងនៅក្នុងកន្លែងហិនហោចដែលគ្មានផ្លូវ។ 41 ប៉ុន្តែព្រះអង្គទ្រង់លើកមនុស្សខ្វះខាតឲ្យរួចផុតពីទុក្ខវេទនា ហើយធ្វើឲ្យក្រុមគ្រួសាររបស់ពួកគេកើនឡើងដូចហ្វូងចៀម។ 42 មនុស្សទៀងត្រង់ឃើញដូច្នេះ ក៏អរសប្បាយ រីឯអស់ទាំងមនុស្សទុច្ចរិតក៏បិទមាត់។ 43 តើនរណាមានប្រាជ្ញា? ចូរឲ្យអ្នកនោះយកចិត្តទុកដាក់នឹងសេចក្ដីទាំងនេះ ហើយយល់ច្បាស់នូវសេចក្ដីស្រឡាញ់ឥតប្រែប្រួលរបស់ព្រះយេហូវ៉ាចុះ!៕ |