Salm 81 - An Bíobla Naofa 1981

Féile an Fhómhair agus na hAthbhliana

¹ Don stiúrthóir. Leis an bhfonn “Na Cantaoirí Fíona”. Le hÁsáf.

² Canaimis go meidhreach do Dhia ár neart; tógaigí gártha gliondair do Dhia Iacóib.

³ Cromaigí ar an gceol agus buailigí an tiompán, an bhinnchruit chaoin agus an chláirseach.

⁴ Séidigí an stoc le linn na gealaí úire, nuair is lán don ghealach, lá na féile.

⁵ Óir is bunreacht in Iosrael é; is reacht é de reachtanna Dia Iacóib

⁶ a d'achtaigh an dlí seo do Iósaef nuair a ghabh sé amach in aghaidh na hÉigipte.

⁷ Teanga nárbh aithnid dom a chuala mé: “Thug mé faoiseamh dá ghualainn ón ualach agus fuasclaíodh a lámha ón gcliabh.

⁸ Ghlaoigh tú orm in am an bhuairimh agus shaor mé thú; thug mé freagra ort as néal na doininne; rinne mé do thástáil ag uiscí Mhiríbeá. Selah

⁹ Éistigí, a phobal liom, tabharfaidh mé comhairle daoibh; monuar nach n‑éisteann tú liom, a Iosrael!

¹⁰ Ná bíodh aon dia deoranta in bhur measc; ná déanaigí dia eachtrannach a adhradh.

¹¹ Mise an Tiarna, bhur nDia, a sheol sibh as tír na hÉigipte; oscail do bhéal go fairsing agus líonfaidh mé é.

¹² Ach ní éistfeadh mo phobal le mo ghlór; níorbh áil le hIosrael bheith umhal dom.

¹³ Thug mé suas iad do mhianta a gcroí; chun cibé ní ab áil leo a dhéanamh.

¹⁴ Dá mb'áil le mo phobal éisteacht liom; dá siúlfadh Iosrael i mo shlite,

¹⁵ chuirfinn a naimhde faoi chois gan mhoill; agus dhéanfainn a n‑eascairde a threascairt.

¹⁶ Bheadh lucht fuatha an Tiarna ag lútáil leis; ach bheidís faoi bhroid go brách.

¹⁷ Bheathóinn [Iosrael] le scoth na cruithneachta; agus líonfainn é le mil as an gcarraig.”