Iób 12 - An Bíobla Naofa 1981

Nochtann Oibreacha Dé a Eagna

¹ Ansin d'fhreagair Iób agus dúirt:

² Sibhse gan amhras lucht na tuisceana, Agus gheobhaidh an eagna bás libhse!

³ Ach tá tuiscint agamsa chomh maith libh, Agus níl an tosach agaibh orm, Agus, ó luaigh mé é, cé dó nach eol sin?

⁴ Is ceap magaidh mé do mo chairde, Mar glaoim ar Dhia agus súil agam le freagra! Níl san fhíréan gan locht ach ceap magaidh.

⁵ An té atá ar a shuaimhneas níl ach drochmheas aige ar an ainnise, Agus sonc don té a fuair barrthuisle.

⁶ Tá an rath ar bhothanna na ladrann; Níl baol ar lucht Dia a ghriogadh, An mhuintir a rinne dia de neart a lámh.

⁷ Ní gá duit ach ceist a chur ar na hainmhithe agus cuirfidh siad ar an eolas thú! Nó ar éanlaith an aeir agus múinfidh siad thú;

⁸ Nó labhair leis an talamh, agus inseoidh sé duit, Agus tabharfaidh iasc na farraige eolas duit.

⁹ Céard é ina measc seo go léir nach eol dó Gurb é lámh Dé a rinne é seo go léir?

¹⁰ Tá anam gach dúile beo ina ghlaic, Agus anáil anama an chine dhaonna.

¹¹ Nach ndéanann an chluas na briathra a phromhadh Agus an carball an bia a bhlas?

¹² Leis an tseanaois a ghabhann an eagna Agus an chríonnacht le síneadh na mblianta.

¹³ Is i [nDia] atá eagna agus cumhacht, Is aige atá comhairle agus tuiscint.

¹⁴ Má leag sé anuas, níl tógáil i ndán; Má chuireann sé duine i ngéibheann, níl fuascailt ann dó;

¹⁵ Má stopann sé na huiscí, téann siad i ndísc; Má scaoileann sé leo, bánn siad an talamh.

¹⁶ Tá neart ann agus teacht aniar; Is leis an dul amú agus an cur amú;

¹⁷ Fágann sé comhairleoirí ag siúl cosnochta Agus breithiúna ina n‑amadáin.

¹⁸ Scaoileann sé crios na ríthe Agus ceanglann brat íochtair faoina gcoim.

¹⁹ Fágann sé sagairt ag siúl cosnochta Agus leagann ar lár na huaisle.

²⁰ Ní fhágann sé focal ag na soilbhire, Agus sciobann ar shiúl gaois na seanóirí.

²¹ Maslaíonn sí flatha Agus coilleann ceandáine na dtréan.

²² Nochtann sé rúin as an dorchadas, Agus tugann an scáil dhorcha chun solais.

²³ Mórann sé náisiúin agus ansin déanann iad a threascairt; Cuireann sé an rath ar chiníocha agus ansin déanann iad a mhilleadh.

²⁴ Sciobann sé ar shiúl tuiscint lucht ceannais na tíre, Agus fágann iad ar guardal i bhfásach gan treoir;

²⁵ Bíonn siad ag únfairt sa dorchadas gan solas Agus fágann sé iad ag longadaíl mar a bheadh duine ar meisce.