ВЫСЛОЎІ 10 - Біблія (пераклад А.Бокуна) Біблія (пераклад А.Бокуна)
ВЫСЛОЎІ 10

¹ Прыповесьці Салямона. Мудры сын — радасьць для бацькі, а дурны сын — смутак для маці.

² Не прыносяць карысьці скарбы бязбожныя, а праведнасьць ратуе ад сьмерці.

³ Не дазволіць ГОСПАД галадаваць душы праведніка, але адкіне жаданьні бязбожнікаў.

⁴ Лянівая рука робіць бедным, а рука працавітая ўзбагачае.

⁵ Хто летам зьбірае, той сын разважлівы, а хто сьпіць у жніво — сын ганебны.

⁶ Дабраславенствы — на галаве праведнага, а вусны бязбожнікаў хаваюць няправасьць.

⁷ Памяць пра праведніка дабраслаўлёная, а імя бязбожнікаў спарахнее.

⁸ Мудры сэрцам прыймае прыказаньні, а той, хто мае вусны неразумныя, упадзе.

⁹ Хто ходзіць беззаганна, той ходзіць бясьпечна, а хто крывіць шляхі свае, будзе выяўлены.

¹⁰ Хто міргае вачыма, той робіць прыкрасьць, і той, хто мае вусны неразумныя, упадзе.

¹¹ Вусны праведніка — крыніца жыцьця, а вусны бязбожнікаў хаваюць няправасьць.

¹² Нянавісьць выклікае сваркі, а любоў пакрывае ўсе правіны.

¹³ У вуснах разумнага знаходзіцца мудрасьць, а кій — на сьпіне бязглуздага.

¹⁴ Мудрыя захоўваюць веданьне, а вусны неразумнага вядуць да загубы.

¹⁵ Маёмасьць багатага — умацаваны горад для яго, загуба для бедных — галеча іхняя.

¹⁶ Праца праведніка вядзе да жыцьця, набытак бязбожніка — да грэху.

¹⁷ На сьцежцы жыцьця той, хто прыймае настаўленьне, а хто адкідае дакараньне — блукае.

¹⁸ Хто хавае нянавісьць, у таго вусны хлусьлівыя, а хто паклёп разносіць, той дурань.

¹⁹ У мностве словаў не пазьбегнеш грэху, а хто стрымлівае вусны свае, той разважлівы.

²⁰ Язык праведніка — адборнае срэбра, а сэрца бязбожніка нічога ня вартае.

²¹ Вусны праведнага пасьвяць многіх, а бязглуздыя паміраюць ад нястачы розуму.

²² Дабраславенства ад ГОСПАДА, яно ўзбагачае, і смутку з сабою не прыносіць.

²³ Радасьць для дурня — учынкі ганебныя, а чалавек разумны [радуецца] мудрасьці.

²⁴ Тое, чаго баіцца бязбожнік, прыйдзе на яго, а прагненьні праведных споўняцца.

²⁵ Калі пранясецца віхура, ня будзе больш бязбожніка, а праведнік мае вечны падмурак.

²⁶ Як воцат для зубоў і як дым для вачэй, так гультай для тых, што яго пасылаюць.

²⁷ Страх перад ГОСПАДАМ памнажае дні, а гады бязбожнікаў скароцяцца.

²⁸ Чаканьне праведнікаў — радасьць, а спадзяваньне бязбожнікаў загіне.

²⁹ Шлях ГОСПАДАЎ — апора для беззаганных і загуба для злачынцаў.

³⁰ Праведнік не пахісьнецца навекі, а бязбожнікі ня будуць жыць на зямлі.

³¹ Вусны праведніка памнажаюць мудрасьць, а язык падступны будзе адсечаны.

³² Вусны праведніка ведаюць, што даспадобы [Богу], а ў вуснах бязбожнікаў — падступнасьць.