ВЫСЛОЎІ 9 - Біблія (пераклад А.Бокуна)

Разьдзел 9

¹ Мудрасьць пабудавала сабе дом, вычасала сем слупоў ягоных,

² закалола тое, што было на зарэз, зьмяшала віно і прыгатавала стол свой.

³ Паслала служак сваіх, кліча на дзядзінцу і на вышынях гарадзкіх:

⁴ «Хто неразумны, няхай прыйдзе сюды», а да бязглуздага кажа:

⁵ «Прыходзьце, ешце хлеб мой і піце віно, якое я зьмяшала,

⁶ пакіньце дурноту і жывіце, і хадзіце шляхам розуму».

⁷ Хто павучае насьмешніка, сьцягвае на сябе прыкрасьць, а хто дакарае бязбожніка, запляміцца.

⁸ Не дакарай насьмешніка, каб ён не зьненавідзеў цябе, дакарай мудрага, і ён будзе любіць цябе.

⁹ Настаўляй мудрага, і ён стане мудрэйшы; вучы праведнага, і ён павялічыць веды.

¹⁰ Пачатак мудрасьці — страх перад ГОСПАДАМ, і веданьне Сьвятога — розум.

¹¹ Бо праз мяне памножацца дні твае і дададуцца гады жыцьця твайго.

¹² Калі будзеш мудры, для сябе будзеш мудры, а калі станеш насьмешнікам — сам будзеш мець шкоду.

¹³ Дурнота — жанчына крыклівая, неразумная і нічога ня ведае;

¹⁴ сядзіць каля дзьвярэй дому свайго на пасадзе, на вышынях гарадзкіх,

¹⁵ каб клікаць тых, што праходзяць дарогаю, што ідуць проста сьцежкамі сваімі:

¹⁶ «Хто неразумны, няхай прыйдзе сюды», а да бязглуздага кажа:

¹⁷ «Вада крадзеная салодкая, і схаваны хлеб смачнейшы».

¹⁸ І ня ведае той, што там мерцьвякі, і што ў цемры адхлані запрошаныя ёю.