Kasta
98 Qullunak kuyntʼir iyawsäwit parlir Biblian jiskʼa tʼaqanakapa
Jesusasti sänwa: —Jumatejj iyawsasmajja, lurasispawa. Iyawsir jaketaquejj take cunas waquisiquiwa —sasa.
Aca arunacasti jiwasanacarojj yatichistuwa, cunjämtï Diosajj jiwasanacar catokquistu iyawsäwi laycuqui, cunjämtejj Kellkatan sisquis uqhama: “Qhititejj Diosamp catokatäqui ucajja iyawsäwi laycuquiw jacani” sasa.
Jesusaruy uñtañäni, jupatwa iyawsañasajj juti, juparaquiw uca iyawsañasjja phokhachani. Jesusasti crusanwa t'akhesi, jan uca casta jiwañaru p'enkasisa. Jupajj yatisïnwa uca t'akhesitapatjja khepürunjja cusisiñ jicjjatañapata; ucatsti Diosan tronopan cupëjjaparuw kont'asi.
Ucampis take iyawsañampiw mayiñapa, jan acch'as pächasisa. Pächasiri jakesti kota mathapimpi sasiwa thayampis ucsar acsar apata.
Diosan munasiñapatwa jumanacajj khespiyatäpjjtajja iyawsañ laycu. Acasti janiw jumanacan luräwinacamäquiti, jan ucasti Diosaw jumanacar churapjjtam.
Ucampis Jesusajj sascaquïnwa: —¿Janit nayajj siscsma, jumatejj iyawsäta ucajja, Diosan jach'a ch'amapjja uñjätawa —sasajja?
Uca suyt'añ churiri Diosajja, cusisiñampi, sumancañampi jumanacar phokhantpan juparu iyawsapjjatam laycu, uqhamat uca suyt'añanjja phokt'atäpjjañamataqui Kollan Ajayun ch'amap toke.
Jumanacajj iyawsañ token takeniw Diosan wawanacapäjjapjjta, Cristo Jesusamp mayachatäpjjatanacam laycu.
Jesusasti juparojj sänwa: —Warmi, ¡cunja jach'as iyawsañamajja! Cunjämtejj muncta uqhamay luraspan —sasa. Ucspachaw uca warmin phuchapajj c'umaraptjjäna.
Uqhamawa iyawsañajja, janitejj luräwinac toke uñacht'ayasqui ucqhajja, uca iyawsaña sapaquejj jiwatawa.
Nayajj jiwjjtwa Cristompi chic ch'accatata, ucampis janiw nayajj jacjjtti, jan ucasti Cristow nayan jacjje. Aca janchin jactsa ucajja, Diosan Yokaparu iyawsatajj laycuquiw jacasctjja, nayar munasinwa jacañapa naya laycu apt'asiwayi.
Jesusasti capitanarojj saraquiwa: —Utamar sarjjam, iyawsatamarjamaraquiw lurasini —sasa. Jupan uywatapasti ucspachaw c'umaraptayatäjjäna.
Jesusasti jupanacarojj sänwa: —Jumanacan iyawsañamajj wali pisiwa. Khanacwa sapjjsma, jumanacantejj iyawsañamajj utjaspa mä mostaz jatha ucch'aquisa, aca kollurojj: ‘Sartam acawjata, yakha chekaru’ sapjjasmawa, ucat uca kollusti yakhawjaruw sartaspa. Janiw cunas ch'amäcaspati, jumanacantejj iyawsañajj utjaspa ucajja.
Iyawsañajja: “Catokäwa” sas take chuymampi suyt'ctans ucawa, uqhamarac chekpachapuni iyawsañasa cuntejj jan uñjtan ucajj chekätapa.
Khanacwa sapjjsma, qhititejj chuymapan jan pächasisa aca kollur saspajja: ‘Onjjtam, jach'a kotar mantaraquim’ sasa; arsutapajj phokhasispawa, jupatejj iyawsañampi arsuspa ucqhajja.
Jesusasti jupanacarojj sänwa: —Khanacwa sapjjsma, jumanacantejj iyawsañanacamajj utjapjjeristam, janirac pächasiñas utjapjjeristam ucajja, janiw nayajj lurcta ucac lurapcasmati, jan ucasti qhä kollur: ‘Sartam, ucatsti kotar mantam’ sapjjasma ucajja, lurasispawa.
Janiw Diosarojj jan iyawsañampejj cunapachas cusisiycsnati, jupar jac'achasiñataquejja maynejj iyawsañapawa Diosajj utjatapa, uqhamaraqui jupar thakerinacarojj bendicirïtapa.
Jesusasti nayranacaparu llamct'asinjja jupanacarojj sänwa: —Luraspanaya cunjämtï jumanacajj iyawsapcta uqhamarjama —sasa.
Iyawsäwi laycuraquiw yattan Diosajj arupampi acapach luratapa, cuntejj jichhajj uñjtan ucajj jan uñjcayat luratätapa.
qhitinacatejj Diosan wawanacapäqui, ucanacajja, acapacharojj atipjiwa. Iyawsañasasti acapacharojj atipt'ayaraquistuwa.
Ucampis qhitinacatejj mä cuns mank'asiscchi pächasisa ucajja, uqham mank'asinjja jupapachaw juchañchasi. Jan iyawsañampi cuna lurañasa juchawa.
Iyawsäwi laycuraquiw Jericó marcan jach'a perkanacapas tincuraraquïna, israelitanacajj pakallk uru muyupjjäna ucqhajja.
Jumanac laycojj Jesucristo tokew nayrakat Diosajjar sinti yuspagarta, jumanacan Diosar iyawsapjjatamatsti take chekanwa parlasi.
Uqhamat takenis iyawsäwinjja mayaquïñaru puriñasataqui, uqhamarac Diosan Yokaparu uñt'añansa. Ucatsti ch'amani jakenacaw tucuñäni, Cristojj kawkch'äquitejj ucar puriñascama.
Jesusasti jupanacarojj sänwa: —Nayätwa jacañ churir t'ant'ajja. Qhititejj nayaru jutqui ucajja, janiw mayampis awtjayascaniti. Qhititejj nayaru iyawsquitani ucajja, janiw mayampis pharjayascaniti.
Jichhajj uñjtanwa mä jakejj iyawsäwi laycuqui Diosan asquit catokatätapjja, janiw cuntejj leyinjja sisqui ucar phokhatap laycuti.
Ucatsti discipulonacaparojj saraquiwa: —¿Cawquinquis iyawsañanacamajja? —sasa. Jupanacasti sustjataw muspharasipjje, ucatsti maynit maynicamaw jisct'asipjjäna: —¿Qhitiraquïpach aca jakesti, thayas, umas tokenokatajj juparojj jaysaquiraquisä? —sasa.
Jiwasanacatejj Cristo Jesusampi mayaquïstanjja, janiw cunataquis asquïquiti circuncisión lurayasiñasa jan lurayasiñasa. Ucampis iyawsañanïñäni ucaw juc'amp asquejja, aca iyawsañasti munasiñanwa jacayaraquistani.
Ucatsti Jesusajj discipulonacaparojj saraquïnwa: —¿Cunats ucatak sustjasipjjta? ¿Cunatarac jan iyawsañanïpjjtasti? —sasa.
Jupasti saraquiwa: —¿Cunatsa sinti ajjsarapjjta? ¡Jumanacan iyawsañanacamajj sinti pisiwa! —sasa. Sartasisinsti thayampiru kotampiruw tokenokäna, arsutaparusti thayajj t'acurawayjjänwa.
Iyawsäwi laycuraquiw Moisesajj sarjjäna Egipto marcatsa, reyin colerasiñapar jan ajjsarasa, cuntejj amtcatayna ucjja janiw chhaktayascänti, jan uñjcañ Diosarojj uñjcaspas uqhama.
Esteban chachasti Diosan ch'amapampi, uqhamarac bendicionapampi phokt'atäsinjja, milagronacampi, uñacht'äwinacampwa jakenac taypina luräna.
Tatit Jesusaru iyawsañamajj utjatap ist'asina, uqhamarac Diosanquirinacataqui munasiñanacamajj utjatapa ist'asinjja,
Khanaquïsquiwa, janiw qhitis Diosampejj catokatäquiti leyiru phokhatap laycojja. Kellkatanjja aqham siwa: “Qhititejj Diosampi catokatäqui ucajja iyawsañ tokew jacani.”
Jesusasti jupanacan iyawsañanïpjjatap yatisinjja suchu jakerojj sänwa: —Wawa, juchanacamajj perdonatawa —sasa.
¿Cunamps säjja? Tiempow jan utjquituti Gedeón, Barac, Sansón, Jefté, David, Samuel take ucanacata, profetanacampita parlañajjataquejja. Iyawsäwi laycuw yakha marcanacarus jupanacajj atipapjjäna, suma apnakapjjaraquïna, uqhamarac Diosajj arscatayna uca yanapt'apsa catokapjjaraquïnwa. Leonanacan lacanacapsa jist'antapjjaraquïnwa, uqhamarac jan jiwarcay ninsa jiwarayapjjänwa, espadamp jiwayatäñatsa jaltapjjaraquïnwa. Pisi ch'amaninacajj guerranacan wali ch'amaninacaw tucjjapjje, ucatjja atipapjjaraquiw uñisirinacapan ejercitonacaparusa.
Jupampi chict'ata jicjjatasiñajjataquiraquiwa Diosampi catokatäta, janiw leyerjam cheka sarnakatajj laycuti, jan ucasti Cristor iyawsatajj laycuwa, Diosajj catokewa qhitinacatejj iyawsapqui ucanacarojja.
¿Cunatsa uqhamajja? Jupanacajj janiw iyawsäwi laycuti uqham Diosan catokatäñ munapcänjja, jan ucasti cuntejj jupanacajj lurapquis uca tokwa catokatäñ munapjjäna. Uca laycupï jupanacajj lanctaña kalarojj lanctapjjejja.
Ucat sipan janiw jiwasanacajj khepar cutt'irinacäctanti, janiraquiw t'unjatäñan sarirïctansa, jan ucasti iyawsañaninacätanwa, uqhamatwa almasjja imasipjjtanjja.
Ucampis janiw qhitis Diosan nayrakatapanjja catokatäcaniti Moisesan leyip phokhatap laycojja, jan ucasti Jesucristoru iyawsatap laycuquiw catokatäni. Ucataracwa nanacas Jesucristorojj iyawsapjjtjja, aca iyawsañ toke catokatäñataqui, janiw catokatäpcti leyin luräwinacap laycojja. Janiw qhitis Diosan nayrakatapanjja catokatäcaniti leyejj cuntï sisqui ucarjama phokhatap laycojja.
Cristo tokewa Diosar jan ajjsarasina jac'achasiñasajj utji, jupar iyawsctansa uca iyawsañampi.
Jumanacan jacañanacamasti jupan saphintatäñapawa, jupjjaru suma utt'atäpjjañamaraquiwa iyawsäwi laycu, cunjämatï yatichatäpcäyäta uqhama, Diosaru yuspagarasapuni.
Ucatpï ch'amacht'asipjjañamajja iyawsatanacamarojja suma luräwinacampi yapjjatapjjañamataqui; suma luräwinacarusti amuyt'asiñampi; amuyt'asiñarusti, jumanacpach suma sarnakañampi; jumanacpach suma sarnakañarusti, llamp'u chuymampi; llamp'u chuymanïñjjarusti, Diosar munañampi; Diosar munañarusti, jilapurjam sarnakañampi; jilapurjam sarnakañarusti, munasiñampi.
Janiw nanacajj iyawsañanacamarojj cun sañs munapcsmati, jumanacasti iyawsañanacamanjj suma thurt'atäjjapjjtawa. Uqhamïpansti, yanapt'añ munapjjsma cusisipjjañanacamataqui.
Cunapachatejj jumanacajj Tatitun khespiyasiñ arunacap ist'apjjta ucqhajja, Cristorojj iyawsapjjtawa, juparuw mayachasjjapjjaractajja uqhamarac Diosanquirinacjamajj Kollan Ajayumpi sellatäjjapjjaractawa cawquïrtejj jupajj qhitaniñatac arsuwaycäna ucampi.
Uqhamapï iyawsañasa, suyt'añasa, munasiñasa jan tucuscanitejja, ucampis aca quimsatjja munasiñapuniw jilt'atajja.
“Amuct'jjapjjam, nayan Diosätajj uñt'apjjam: Nayajj marcanacat juc'ampïtwa, oraket juc'ampiraquïtwa.”
Cunapachatï Diosan arunacapa jumanacar parliri jutta ucqhajja, janiw jakenacan yatiñ arunacapampi amuyt'ayañjja munapcäyäsmati, jan ucasti Kollan Ajayu tokwa amuyt'ayapjjsma, Diosan ch'amapampiraqui, uqhamata jumanacan iyawsañanacamajja pachpa Diosat jutañapataqui, jan jaken amuyt'apatacjja.
Ucjjarusti Jesusajj sänwa: —Sarjjam. Iyawsatam laycuw c'umaräjjta —sasa. Ucspachaw juyqhojj nayrat waliptjjäna, Jesusarusti arcjjaruwayjjaraquïnwa.
Jumanacan iyawsañanacamasti mä korir uñtataw ninampi yant'atäñaparaqui. Cawquïri iyawsañatï uca yant'anaca pasqui ucasti uca tucusir korit sipansa juc'ampi jila alaniwa. Uqhamatpï jumanacan iyawsañanacamajja, yant'atäsinjja sumat uñt'atänejja, jach'aru aptataraquïniwa cunapachatejj Tatit Jesucristojj jutcani ucapachajja.
Tatitojj juchan jakerojj pampachiwa, jupar iyawsir jakerusti iyawsäwip laycuw asqui jaket catoke, luräwinacap uñachayañatac jan utjquipansa.
Jesusasti juparojj sänwa: —Tomás, jichhajj jumajj uñjatam laycuw iyawstajja. Cusisiñanïpjjewa jan uñjcas iyawsirinacajja —sasa.
Aca camachin amtäwipajj acawa: Munasipjjam k'oma chuymat jutqui uca munasiñampi suma chuymampi, uqhamarac chekpach iyawsäwimpi.
Jumanacarusti Diosajj jupar iyawsapjjatam laycojja, jach'a ch'amapampiw take cunatsa imasipcaractam, cuna khespiyasiñatejj jumanacataqui waquichatäqui uca catokapjjañamcama. Uca khespiyasiñsti khepa urunacaw jumanacajj catokasjjapjjäta.
Iyawsäwin suma nuwasiñapan nuwasim, wiñay jacaña jicjjataraquim ucataquiw Diosajj jawstam, iyawsäwin suma arsüwipwa lurawayta takenin uñjcaya.
Ucspachaw Jesusajj amparapat catusinjja Pedrorojj waysu, ucatsti saraquiwa: —¡Pisi iyawsañan jake! ¿Cunatsa pächasta? —sasa.
Iyawsäwi laycuraquiw Moisesajj jach'äjjän ucqhajj jan muncänti Egipto reyin phuchapan wawapaw sayasiñjja. Jan ucasti Diosan marcapan uñisitäñwa munäna, mä juc'a tiempo juchanacan cusisiñat sipansa.
Jumanacajj jan uñjapcsta ucasa, Jesucristorojj munapjjtawa, uqhama jan uñjcasasa iyawsapjjaractawa, waliraqui cusisipjjtajja. Uca jach'a cusisiñanacamasti janiw arunacampi arsuñjamäquiti, uqhama almanacamataqui khespiyasiñ jicjjatapjjatamatjja. Uca laycuraquipï jumanacajj iyawsapjjtajja.
Enoc chachas iyawsäwi laycuw mä jacañarojj jan jiwasina aptatäjjäna, janiw mayamps jicjjatcjjapjjänti, Diosaw juparojj apasiwayjjatayna. Kellkatanjja saraquiwa: “Janïra apatäcasinjja, Enoc chachajj Diosaruw cusisiyatayna” sasa.
Pablomp Silasampisti ucjjarojj sapjjänwa: —Jesucristo Tatitur iyawsam, ucatwa khespiyasïta jumasa, utamanquirinacasa —sasa.
Ucspachaw Jesusajj cutiquipstäna, ucatsti warmiru uñjasinjja sänwa: —Ch'amacht'asim, wawa, iyawsatam laycuw c'umara uñjastajja —sasa. Jupasti ucspachaw c'umaräjjäna.
Cunapachatejj jupanacajj iyawsañampi orapjjanejja, uca usutajj khespitäjjaniwa. Tatitusti juparojj sartayjjaraquiniwa, juchanïchi ucqhasti perdonataraquïniwa.
Iyawsäwi laycuraquiw Sara warmis, wali chuymanëjjasas Diosat ch'am catokänjja wawanïñataqui; Diosan arsutapar iyawsatap laycuw wawanïna.
Ch'aman sayt'asipjjañäni, jan pächasisa, iyawsäwisanjja cuntejj suyt'ctan ucanjja, Diosasasti phokhaniwa cuntejj arsuwayquistu ucjja.
¿Camsis Diosan arunacapajja? “Abrahamajj Diosarojj iyawsänwa ucatwa Diosajj juparojj asquita catokäna iyawsatap laycu.”
Diosan Arupan kellkatasti saraquiwa: “Iyawstwa, ucatwa parlaractjja” sasa. Uqhamaraquiw nanacajj iyawsasina parlapjjaractjja.
Iyawsäwi tokeraquiw Abrahamajj cunapachatejj Diosajj jawscäna ucqhajj ist'äna, ucatsti jupajj mistuwayjjänwa cawqharutejj Diosajj orak churañapäcäna ucaru. Orakepat mistusinsti janiw cawcsar sarataps yatiscaraquïnti.
Iyawsäwi laycuw Noé chachajj Diosarojj ist'äna uqhamarac arcsa luräna familiapan khespiyasiñapataqui, cunapachatejj Diosajj jan uñjatäcäns ucanacan pasañap yatiycän ucqhajja. Uca iyawsäwi laycuraquiw Noé chachan acaorakenquirinacarojj juchañchäna, uqham iyawsatap laycuraquiw Diosampejj catokatäna.
Tatitusti jupanacarojj saraquïnwa: —Iyawsañanacamatejj utjaspajja, mä mostaz jatjamaquisa, ucat aca sicómoro kokarojj sapjjasmajja: ‘Acat liwstam, ucat kotar ayruntasim’ sasa, uca kokasti jaysapjjeristamwa.
Ucatsipansa, iyawsañanacamajj mä escudjamäpan, Supayan akquir flechanacapat jarc'akasiñataqui.
Suyapjjapunim, iyawsañanacamansti ch'aman sayt'apjjam, chachjama sarnakapjjam, ch'amañchasipjjaraquim.
Chuymampiwa iyawsañajja Diosampi catokatäñataquejja, lacampisti arsuñawa Jesucriston khespiyatäñatakejja.
uqhamata jumanacan iyawsañanacamajja pachpa Diosat jutañapataqui, jan jaken amuyt'apatacjja.
Cristo tokeraquiw jiwasanacajj Diosarojj jac'achastanjja, iyawsäwi laycu jupat bendiciona catokañataqui. Uca bendicionansti takeniw ch'amani sayt'atätanjja, Diosan marcaparu mantañataqui suyt'äwinsti cusisitätanwa.
Uca quicpa Jesusan sutipar iyawsatap laycuw aca jakejj ch'amañchata uñjasi, jumanac nayrakatana. Uca Jesusar iyawsatap laycupï c'umarapun uñjasejja, take jumanacan uñjcata.
Cristojj chuymanacaman iyawsañ toke jacañapataqui. Uqhamaraquiw mayta jumanacajj munasiñanjja ch'amanïpjjañamataqui suma saphintatjama,
Discipulonacapasti Jesusampejj yakhawjanwa parlapjjäna, jisct'apjjaraquïnwa: —¿Cunatsa nanacajj uca ñankha ajayurojj alissuñatac jan ch'amanïpctjja? —sasa. Ucanwa Jesusajj khanquir tucuwayäna jupanacan nayrakatapana. Ajanupajj intjam c'ajquirïnwa, isipasti wali jank'oraquiw tucuwayäna. Jesusasti jupanacarojj sänwa: —Jumanacan iyawsañamajj wali pisiwa. Khanacwa sapjjsma, jumanacantejj iyawsañamajj utjaspa mä mostaz jatha ucch'aquisa, aca kollurojj: ‘Sartam acawjata, yakha chekaru’ sapjjasmawa, ucat uca kollusti yakhawjaruw sartaspa. Janiw cunas ch'amäcaspati, jumanacantejj iyawsañajj utjaspa ucajja.
Ucampis nayaw jumataquejj mayta jan iyawsañamajj pist'añapataqui. Jumasti nayaru cuttanjjät ucqhajj ch'amañcht'am jilanacamaru jan mayjt'asipjjañapataqui —sasa.
Cunatejj kellkañamäqui ucajj acawa: ‘Jan wali ñankha jakenacajj jach'a jach'aw tucupjje, ucampis asqui jakenacajj Diosar iyawsäwi laycuwa jacapjjani’ ” sasa.
Cunjämatejj janchejj jan ajayumpejj jiwatajja, uqhamaraquiwa iyawsañajj jiwata, cunapachatejj jan suma luräwinacampi uñacht'ayasqui ucqhajja.
Nayajj suma nuwasïwjja nuwastwa, tucuyäwcamaw jalaracta, iyawsañsti janiraquiw chhakaycti.
Uca Supayataquisti wal sayt'asipjjam iyawsañanacamanjja, yatipjjaraquim walja jilatanacan jumanacjamaraqui take chekan t'akhesipjjatapjja.
Tucuycamatejj take chuyma arcañäni take iyawsañampi, cunjämatï kalltatpacha utjquistu uqhama, ucapachajj Cristompejj utjistuw cunatejj jiwasanccani ucajja.
Ucampis Jesusajj warmirojj sänwa: —Iyawsatam laycuw khespiyatätajja, jichhajj cusisitaqui sarjjam —sasa.
Yatjjapjjaractawa cunapachatejj jumanacan iyawsañanacamajj cunayman yant'anac pasqui ucqhajja, jumanacajj wali llamp'u chuymanïñwa yatekapjjtajja.
Iyawsäwi laycu Dios nayrakatan asquit uñt'atäjjatasatwa Diosampi sumancañajj utjistu Jesucristo Tatitusana.
Ucampis jiwasanacajj urunquirjamajja, amuyasiñasapuniwa. Jarc'akasiñasawa iyawsañampi, uqhamarac munasiñampi, khespiyasiñataqui suyt'añajj mä cascjamawa p'ekesaru imantañapajja.
Niyaw amuytanjja, Abrahaman iyawsañapajj luratap tokwa uñstäna, uca iyawsañapasti phokhataraquiw tucu luratap toke.
Jesusasti sänwa: —Wawa, iyawsatam laycuw c'umaräjjtajja. Jichhasti sumac sarjjam. Usumatsti c'umaräjjtawa —sasa.
Janiw pächascänti Diosan arsutapatjja, ucampis juc'ampwa ch'amañchasïna, iyawsañapasti juc'ampïnwa, Diosarusti yupaycharaquïnwa, take chuyma catuyasisina, Diosajj ch'amanïtapa cuntejj sisquejj ucanaca phokhañataqui.