Hebreus 10:1 - Kaxinawá Bíblia (BR) Hanua Deusũ hatu yubani Moisés hatu yusĩpauni hawẽ yubati bena haska hawẽ besu tashnimashanai hawẽ bemakia unãmati besti iniki, haskaira mawaira kuxipa ha kayabimarã. Haskakẽ Deusũ hãtxa Moisés yusĩniwenã, tsuabura dasibi pepatirumawẽ taea bari tibi habias daya txashuwã bene inũ ina awa bene tesẽshũ kuakĩ keyushũpakebiakĩ Deusbe nukunabu hãtxashunika shanẽ ibu binuatũ nukunabũ hatũ xinã hatu betsa wamakĩ dasibi hatu pewakĩ keyushũtirubuma ikubiranibuki. Kashinawa : Diosun Jesúswen taexun yuba bena yiniki Janua Diosun jatu yubani Moisin jatu yusinpauni jawen yubati bena jaska jawen besu taxnimaxanai jawen bemakia unanmati besti iniki, jaskaida mawaida kushipa ja kayabimadan. Jaskaken Diosun jancha Moisin yusiniwenan, tsuabuda dasibi pepatidumawen taea badi tibi jabias daya chaxuwan bene inun ina awa bene tesenxun kuakin keyuxunpakebiakin Diosbe nukunabu janchaxunika xanen ibu binuatun nukunabun jatun shinan jatu betsa wamakin dasibi jatu pewakin keyuxuntidubuma ikubidanibuki. |
Deusũ Moisés yunukĩ hawẽ hãtxa kenemanirã, yurabu hatũ xinã babuwẽ taeshũ haska washũ txibãtirubumakẽ haska bebũkiri yubani yurabu babubu hau hatũ txakabu hatu buashuni mawayunũ, iwanã, hawẽ bake yura babu nukuna keska bimatã Deusũ yununiki. Jesus haskakiranishũ hawẽ mawa kayabimati Satanásã kuxipa mebĩkĩ Deusũ bakẽ maemaniki.
Na beya betsa betsapa tibiwẽ hawẽ Cristokiri xinãmati besti ikubainibuki. Hakia Cristo ma hunikẽ ha beya ana kuxipa hayama hamẽki.
Haskawẽ taea nukuri Deusbe hãtxanũ ika nukũ xinã txakabũ nuku mekemis ana mekemama ũpashwẽ txuki keskatã nukũ huĩti shũpĩtã txanima kayabi ikũ kayabi wai Deusbe hãtxakubainãkãwẽ.
Israelbu Deusũ hatu hawẽ pepawayukatsi hawẽ yunuti inũ hawẽ nemati hãtxa Moisés hatu inãmakĩ yununikiaki. Hawẽ taeshũ Levĩ bababu Deusbe hawenabu hãtxashunika wakĩ ha hãtxa txibãkĩ hau hatu pewakubaĩshanũbũ, iwanã, Deusũ Moisés habu katumanikiaki. Hatu haska waniwẽ taeshũ habuã hawa pewama kanekubaini hiwenibuki. Haskawẽ taea huni betsa Deusbe nuku hãtxashunika betsa Deus anua huniki. Hamẽ Arãonẽ bababũ amis keskama hakia Melquisedeque imis keskai Deusbe nukunabu hãtxashunika bena hau ipakeshanũ haska Deusũ xinãnishũ hawẽ yunuti maewanikiaki.
Ha inũ, haska Mati Sinai anushũ Deusũ nai anua tari inũ bitxi hiwe dami Moisés uĩmaxina Moisés hatu amanũ ikaya hanushũ Deusũ Moisés ana yuikĩ: “Uĩrawe. Haska mati anushũ ẽ mia uĩmaxina keska ha itsa hatu amashãwẽ”, aniwẽ taeshũ Deusũ Moisés uĩmani ha kayabima ha itsa uĩmani keska ha Israelbu hawenabu Deusbe hãtxashunikabũ txibãkĩ akubaĩmisbuki.
Hakia Cristo na mai anu ma iwãniki. Eskatiã harã, nukũ Shanẽ Ibu Deusbe nuku hãtxashunika binuhaira haska Deusũ yuba bena nuku inãniwẽ nuku mekekubainikiki. Hanu Cristo hikinirã, na mai anushũ hunibũ hiwe wani keska anu hikiama hakia haskarara ma hari Deusũ pewashuni anu hikitã haria nuku Deusbe hãtxashuni hawa apaunibu keska wama hatu binua pehaira kaneisma nuku ishũkũkainikiki.
Haskawẽ taeshũ txanima himiuma tsua meribi itirumawẽ taeshũ yuinaka mirima detekubaĩpaunibuki, hatũ txakabu ana Deusũ xinãtima wamakinã. Hakia haska wakinã, haska txipu Jesus Cristõ nukũ txakabu nuku buashũshanai ha binumakĩ ha kayabima mawakĩ ha keska wakĩ akubainibuki.
Ha inũ, Arãonẽ bababu Deusbe nukunabu hãtxashunika shanẽ ibu binua ano tibi dayairã, himi betsabu bui hikitã Deus inãkĩ Deus uĩmai hanu meribihaira anu hikipaunibu keskai Cristõ hawẽ himi bushũ inãkĩ baxa baxa akubaĩtima iniki.