Hebreus 10 - Kaxinawá Bíblia (BR)

Deusũ Moisés hawẽ hãtxa yununirã, ana hawẽ hatu pewatirubumakiaki, na hãtxarã

¹ Hanua Deusũ hatu yubani Moisés hatu yusĩpauni hawẽ yubati bena haska hawẽ besu tashnimashanai hawẽ bemakia unãmati besti iniki, haskaira mawaira kuxipa ha kayabimarã. Haskakẽ Deusũ hãtxa Moisés yusĩniwenã, tsuabura dasibi pepatirumawẽ taea bari tibi habias daya txashuwã bene inũ ina awa bene tesẽshũ kuakĩ keyushũpakebiakĩ Deusbe nukunabu hãtxashunika shanẽ ibu binuatũ nukunabũ hatũ xinã hatu betsa wamakĩ dasibi hatu pewakĩ keyushũtirubuma ikubiranibuki.

² Txanima Deusũ hãtxa kuxipa hayatũ hatũ txakabu ma pewakẽ habũ xinã ibubis ma pe mekinã, ha yuinaka menukĩ Deus inãkubainaiburã, henekeanibuki.

³ Bari tibi txashuwã inũ ina awa tesẽshũ hatu kuashũkĩ Deusbe nukunabu hãtxashunika shanẽ ibu binuatũ hatũ txakabu ana hatu xinãmakubaĩmiski.

⁴ Hakia yuinaka mawa himiwẽ hatũ xinã txakabu pewakĩ hatu buashũtirubumaki.

Jesus Cristo mawakĩ Deus nuku ma daewashunikiaki, na hãtxarã

⁵ Haskakẽ Jesus Cristo mai anu dami tashnimashũ yurabu yusĩkĩ taewakatsi hawẽ Epa Deus yuikĩ: “Epaã, yuinaka inũ shekiwã duru kuaibu besti mĩ ana abuamaki. Haskakẽ mĩ xinãwẽ ẽ akubaĩshanũ huni kuĩ yura mĩ ea inãniki.

⁶ Ha inũ, hatũ txakabu buakatsi ikĩ inãkuĩ bushũ hatũ txakabu buashũkĩ hatu kuashunaibu mĩ ana haska abuamaki.

⁷ Haskakẽ eska unãtã haska ekiri keneniburã, mĩ xinãnẽ besti anũ ika ẽ ma tashniaki”, aniki.

⁸ Ha dukunã, Deusũ Moisés hatu yusĩmani keska abiakĩ kaneaibuwẽ taeshũ Deusũ hatũ inãkuĩ inũ hatũ txakabu buashũkĩ hatu menu keyushũbiakubainaibũ Deusũ ana abuama inũ benimama ikũkainaya

⁹ Jesus hushũ yuikĩ: “Haska mĩ xinãnẽ besti anũ ika ẽ ma tashniaki”, ikĩ hawẽ Deus daewati sheni hawama wakĩ keyutã hawẽ Deus daewati bena hamebi hawẽ hiweawẽ nuku bena washuniki.

¹⁰ Hanua Deusũ xinã besti txibaĩ bestiwai hawẽ yura Deus inaĩ nuku mawashũtã ana besteniki, ana betsatiã mawatimairã. Haska wakĩ Jesus Cristõ Deusunabu nuku wakĩ ma nuku meribi waniki.

¹¹ Haska inũ, hatũ txakabu hatu buashunũ, iwanã, inãkuĩ betsa betsapa Deus inãkĩ habias bestikima yuinaka kuai bikamisbuki, haskawẽ hatũ txakabu tere akĩ keyutirubumabia Deuski nukuti Templo hemaĩtĩ anu dayakĩ bari tibi nukunabu Deusbe hãtxashunikabũ habiawẽs daewati wakubaĩmisbuki.

¹² Hamẽ Jesus Cristo ikirã, habũ nũ ikũwãshanaibu nukũ txakabu nuku buashunũ ika besti ha bestiwai cruzkia nuku mawashũtã ana ipatimai bestẽtã hawẽ Ibu Deusũ yusiuri hanushũ betsabu binũa besti natiã ma tsauwaki, hanua nuku hãtxashũkũkainirã.

¹³ Harishũ tsuabũra Cristo danaĩ haki sinataibu Deusũ hatu maemamakĩ hawauma hatu washanai manayui Jesus Cristo tsauwaki.

¹⁴ Jesus Cristõ hawẽ hiwea besti wakĩ Deus inãkĩ ma dasibi pehairawai mawaniwẽ taea tsuabura Deusũ ma hatu pewani ma meribi hiweshũkanikiki.

¹⁵ Deusũ Yushĩ Pepatũ betsa watimawakĩ hawẽ yuishunika Jeremias yuikĩ yubai:

¹⁶ “Ẽ Yavé Deusũ hatu yuikĩ: ‘Hanu hatiara Israelbukiri ẽ ana hatukiri yubakairã, eska ẽ ishanaii. Hatiara haska ẽ hatube yubakai benairã, ana bemakis ẽ hãtxa ẽ hatu yunuamaki. Hanua hanu hatuki dasikatsi hatũ bushka anu ẽ hãtxa mistukĩ hatũ huĩti bena watã ẽ hãtxa ẽ hatuki kenea keska washanaii’ ”, iwanã, ana ha hãtxakiri yuikĩ:

¹⁷ “Hatũ txakabu hatu buashũtã ẽ ana haska hatukiri xinãma ikũkaĩshanaii”, Yavé Deusũ ea waxinaki, aka Jeremiasĩ nĩkatã nuku keneshuniki.

¹⁸ Ma nukũ txakabu pewatã nuku buashunikẽ ana tsuã hatũ txakabu buanũ ishũ yuinaka ana tesẽshũ hau ana hamẽ yuinaka kuayamakubainũbũwẽ.

Deus yubakaniki haki dasi kakatsi txĩtũtimakiaki, na hãtxarã

¹⁹ Ẽ betsabu inũ ẽ puibuũ, haskawẽ taea Jesus Cristo nuku mawashũkĩ hawẽ himi habawaniwẽ taearã, natiã hawa dateama Deusbe hãtxanũ ika hawẽ dĩtu meribi anu hikiai keskatã nũ haki ma kematirubuki.

²⁰ Ha meribi dĩtu anu hanu besti wai hawenabu Deusbe hãtxashunika besti hikibiakubaĩmisbũ eskatiã Jesusũ ha tariwẽ bepunibu keska nuku bepẽshũkinã, hawẽ yurawẽ mawakĩ ha meribi dĩtu bepunibu bepeã keska waniki, hawẽ taea ha bai bena txibãkĩ hawẽ kai nũ Deusbe hãtxakubaĩshanũbũ nuku ashũkinã.

²¹ Natianã, nukũ Deusbe nuku hãtxashunika kayabi Deus bebũ ma niaki.

²² Haskawẽ taea nukuri Deusbe hãtxanũ ika nukũ xinã txakabũ nuku mekemis ana mekemama ũpashwẽ txuki keskatã nukũ huĩti shũpĩtã txanima kayabi ikũ kayabi wai Deusbe hãtxakubainãkãwẽ.

²³ Habias mestẽwãtã xinã betsa betsapa wai txĩtuãma haska nũ ikũwãkĩ yuiai besti manakakubainãkãwẽ. Txanima Deus yubakanishũ nuku ashũshanikiki, kaneamarã.

²⁴ Ha inũ, nũ habũ ikũwaĩburã, merabenaĩ abunamei pepai duanamekubainãkãwẽ.

²⁵ Ha inũ, Deusũ hãtxa tapĩ itxai heneyamakubainãkãwẽ, haskai betsabu babui txĩtũkanikikirã. Haskama betsabube merabenãkatsis ikĩ hatu uĩmakĩ hamakiri xinãbiabainaibũ hatu beya wakĩ xinã txãkãwãkĩ hatu benimawakubaĩkãwẽ. Hatu haska wakĩ ma Jesus ana hua kemai uĩkatsirã, xinã txãkãhairai hatube itxai heneyamakubaĩkãwẽ.

²⁶ Ma Jesus Cristokiri unãti wakĩ txanima tapĩbiatã haratubũra hawa xinã betsa maewama ana nukũmebi txakabu mei atimapai huĩti kuxikĩ nũ akaiburã, ana hawa betsawẽ Deus daewati nũ hayamahairakiaki.

²⁷ Txĩtũtã nũ hawẽ hiwei kairã, Deus hatuki sinatakĩ hatu kupitxakayamakĩ txi merã hatu menukĩ keyushanai besti manakanikiki. Uĩrakãwẽ, mesekirã.

²⁸ Nukũ shenipabũ Deusũ Moisés yusĩa hãtxa nĩkama txakabuwaibu dabe kasmai dabe inũ besti habias hakiri yui kaneabumakẽ hatu unãti watã hawa hatuwẽ nuiama kupikĩ tenãpaunibukiaki. Natiã ha yununi mese hayayuaki.

²⁹ Matubunã, xinãkãwẽ. Tsuabũ meshanimẽkaĩ, ha hawa hatuwẽ nuiama Deusũ hatu kupitxakayamashanairã. Jesus Cristõ himiwẽ hawẽ hatu yubani Deusũ Yushĩnĩ hawẽ taeshũ hatu abubia tsuabũra Deusũ bakeki hameĩ haki kashekĩ hawẽ himi hatu habashũbiani danãkĩ itxakanikiki, hawẽ taea habũ ikũwaĩbu pepati wabianikenã.

³⁰ Hanushũ Deusũ hawẽ hãtxa yunui hamebi yubakai hãtxai: “Tsuãra matu txakabuwaya meyamashãkãwẽ. Emebi Ẽ Hiwemistũ ha txakabuwaibu eã ẽ hatu kupishanaii”, iniki. Ana betsa txani: “Yavé Deusũ hawenabu unãti watã hatu manakushanikiki”, arianiki.

³¹ Txanima hawara tibi txakabui ikaiburã, mese beshmaski. Hamẽ Deus Hiweatũ hatu kupiai tibi ishanairã, mese mepakekubaĩshãkanikiki, hau haki besti datekubainũbũwẽ.

³² Hanu mã Jesus ikũwãkĩ taewaitiã mã ini xinãkãwẽ. Habũ ikũwãkatsi ikabumã matu bika tenemabiabu mestẽtã mã binukubaĩyamaki.

³³ Hanushũ hatiri matubi itxakĩ mirimabũ uĩaĩbũ bika betsa betsapawẽ matu memaibũ hanua betsabu ha nuitapaibube hatuki dasishũ hẽ iyamai dateama mã hatu merabewakubainibuki.

³⁴ Jesusunabu betsabu hatuki sinatakĩ bitxiti hiwe merã hatu bitxiabu nuitapaibuki mã batãtanaya matũ mabu inũ matũ hiwe matu biãbũ hawa yuiama benimakĩ matũ hamapai hatu heneshũkĩ Deus kẽwãkĩ hawẽ mae pepa nai anu hawa txapuisma hanu hiwei ikibi iki mã kashanai haska mã xinãkubaĩyamaki.

³⁵ Haskawẽ taeshũ mã ikũwaĩnã, benuyamakãwẽ, mã ma haki txiti ika bika tenemiswẽ taeshũ matu itxapa manakushanikiki.

³⁶ Hamẽ matu akabumaki, bika tenemakinã. Haska Deus yubakani haska xinaĩ keskawẽ matu akaiburã, dateama binui hawẽ mestẽkubaĩkãwẽ. Mã haska tenekubaĩmisbuwẽ taeshũ haska Deus yubakaniwẽ matu manakua txanima mã uĩshanaii.

³⁷ Deusũ hawẽ hãtxa yuishunika hãtxa wa hatu keneshũkĩ: “Ẽ haskakiri yubakairã, hawa manakubiranama hawaira iki hushanikiki.

³⁸ Tsuabura pepabunã, haska ẽ yubakai xinãkĩ ikũwaĩ hawẽ hiweshãkanikiki. Hamẽ tsuabũra ha ẽ yubakai ikũwãkĩ mestẽwãkatsi ikama txĩtuaĩburã, ẽ ana habuwẽ benimama ishanaii”, aka nĩkashũ nuku keneshuniki.

³⁹ Haskakẽ betsabũ Jesus txibaĩ txĩtuaĩbu habu Deusũ kupiaya ea inũ mã ebetã Jesus ikũwaĩ txĩtuãma nũ txibãkubaĩmisburã, hawẽ pashai Deusbe nũ hiwekũkaĩshanaii.