Psalms 47 - Die Bybel 2020-vertaling

¹ Vir die •musiekleier. Van die Koragiete. 'n Psalm.

² Al julle volke, klap hande! Juig tot eer van God met jubelkrete!

³ Want die Here, die Allerhoogste, is ontsagwekkend, 'n groot koning oor die hele aarde.

⁴ Hy onderwerp volke aan ons, nasies onder ons voete.

⁵ Hy kies vir ons ons erfgrond, die trots van Jakob, wat Hy liefhet. •Sela

⁶ Onder gejuig bestyg God die troon, die Here bestyg dit onder die geluid van 'n •ramshoring.

⁷ Besing God, besing Hom! Besing ons koning, besing Hom!

⁸ Want God is die koning van die hele aarde; sing 'n lied wat onderrig.

⁹ God regeer oor nasies, God sit op sy •heilige troon.

¹⁰ Die vooraanstaandes van volke kom bymekaar by die God van Abraham, want aan God behoort die skilde van die aarde. Hy is hoog verhewe.