Psalms 16 - Die Bybel 2020-vertaling

¹ 'n Miktaam. Van Dawid. Beskerm my, o God, want by U skuil ek.

² Ek het vir die Here gesê: “U is my Heer; buiten U is daar vir my niks goeds nie.”

³ Wat die heiliges in die land betref, ja, die magtiges, by wie ek al my vreugde gevind het:

⁴ Wie hulle na ander gode haas, vererger hulle smart. Ek sal nie vir hulle •drankoffers van bloed uitgiet nie, en ek sal nie hulle name op my lippe neem nie.

⁵ Here, my erfdeel, my beker, U bepaal my lot.

⁶ Die meetsnoere het vir my in lieflike plekke geval, ja, my erfenis is vir my mooi.

⁷ Ek sal die Here prys wat my raad gegee het, selfs in die nag wys my hart my tereg.

⁸ Ek hou die Here altyd voor oë; omdat Hy aan my regterkant is, sal ek nie struikel nie.

⁹ Daarom is my hart bly en juig my binneste; ja, my liggaam bly veilig,

¹⁰ want U sal my lewe nie aan die •doderyk oorlewer nie; U sal nie toelaat dat u getroue volgeling die graf sien nie.

¹¹ U wys my die pad van die lewe: oorvloedige vreugde in u teenwoordigheid, lieflikhede in u regterhand, vir altyd.