Psalms 121 - Die Bybel 2020-vertaling

¹ 'n •Pelgrimslied. Ek kyk op na die berge: Waar sal my hulp vandaan kom?

² My hulp is van die Here, wat hemel en aarde gemaak het.

³ Hy sal nie toelaat dat jou voet struikel nie; jou Beskermer sal nie insluimer nie.

⁴ Kyk, die Beskermer van Israel sluimer nie in nie en Hy slaap nie.

⁵ Die Here is jou Beskermer; die Here is jou skaduwee aan jou regterhand.

⁶ Bedags sal die son jou nie skaad nie, en snags ook nie die maan nie.

⁷ Die Here sal jou beskerm teen elke onheil; Hy sal jou lewe beskerm.

⁸ Die Here sal jou uitgaan en jou terugkeer beskerm van nou af en vir altyd.