Matteus 4 - Die Bybel 2020-vertaling

Versoeking van Jesus

¹ Hierna is Jesus deur die Gees die woestyn ingelei om deur die Duiwel versoek te word.

² Veertig dae en veertig nagte lank het Hy gevas, en later honger geword.

³ Toe het die versoeker nader gekom en vir Hom gesê: “As u die •Seun van God is, sê dat hierdie klippe brode moet word.”

⁴ Maar Hy antwoord: “Daar staan geskryf, “ ‘Van brood alleen sal die mens nie leef nie, maar van elke uitspraak wat uit die mond van God kom.’ ”

⁵ Toe neem die Duiwel Jesus na die heilige stad en laat Hom op die hoogste punt van die tempelgeboue staan

⁶ en sê vir Hom: “As u die Seun van God is, spring hier af! Daar staan immers geskryf, “ ‘Hy sal sy engele opdrag oor jou gee – op hulle hande sal hulle jou dra, sodat jy nie dalk teen 'n klip jou voet stamp nie.’ ”

⁷ Jesus sê vir hom: “Daar staan ook geskryf, “ ‘Jy mag die Here jou God nie versoek nie.’ ”

⁸ Hierna neem die Duiwel Hom na 'n baie hoë berg en wys Hom al die koninkryke van die wêreld in hulle prag,

⁹ en sê vir Hom: “Dit alles sal ek vir u gee as u neerkniel en my aanbid. ”

¹⁰ Toe sê Jesus vir hom: “Gaan weg, Satan! Want daar staan geskryf, “ ‘Die Here jou God moet jy aanbid en Hom alleen dien.’ ”

¹¹ Toe het die Duiwel Hom met rus gelaat, en kyk, daar het engele gekom en Hom versorg.

Begin van Jesus se verkondiging

¹² Toe Jesus hoor dat Johannes in hegtenis geneem is, het Hy na Galilea teruggekeer.

¹³ Hy het Nasaret verlaat en in Kapernaum by die see gaan woon, in die gebied van Sebulon en Naftali,

¹⁴ sodat die woorde vervul sou word wat deur die profeet Jesaja gesê is:

¹⁵ “Land van Sebulon en land van Naftali, die pad langs die see, oorkant die Jordaan, Galilea van die heidene:

¹⁶ Die volk wat in duisternis woon het 'n groot lig gesien; vir hulle wat in die gebied en die skadu van die dood leef, het 'n lig opgegaan.”

¹⁷ Van toe af het Jesus met sy verkondiging begin en gesê: “Bekeer julle, want die •koninkryk van die hemele is op hande.”

Roeping van die eerste dissipels

¹⁸ Terwyl Jesus langs die See van Galilea loop, het Hy twee broers gesien, Simon, wat •Petrus genoem word, en Andreas, sy broer. Hulle was besig om 'n treknet in die see uit te gooi, want hulle was vissers.

¹⁹ Hy sê vir hulle: “Volg My, en Ek sal julle vissers van mense maak!”

²⁰ Hulle het onmiddellik hulle nette gelos en Hom gevolg.

²¹ Hy het van daar af verder geloop en twee ander broers gesien: Jakobus, die seun van Sebedeus, en sy broer Johannes. Hulle was saam met hulle vader Sebedeus in die boot besig om hulle nette heel te maak, en Hy het hulle geroep.

²² Hulle het onmiddellik die boot en hulle vader verlaat en Hom gevolg.

Genesing en onderrig in Galilea

²³ En Jesus het in die hele Galilea rondgegaan, in hulle •sinagoges geleer, die evangelie van die koninkryk verkondig, en elke siekte en elke kwaal onder die volk genees.

²⁴ Die nuus oor Hom het deur die hele Sirië versprei. Hulle het almal wat ongesteld was, dié wat deur allerlei siektes en pyne geteister is, na Hom gebring, ook almal wat deur demone besete en maansiek was, en verlamdes – en Hy het hulle genees.

²⁵ Groot skares het Hom gevolg, uit Galilea en Dekapolis en Jerusalem en Judea en van oorkant die Jordaan af.