Éxodo 5 - Tayta Diospa Wilakuynin

Moisés y Aarón Faraón kaqman aywashqan

¹ Nirkurnami Faraónman aywaykur Moisés y Aarón kayno nipäkurqan: <<Israel runakunata kuyaq Tayta Diosmi kayno nin: <Kuyashqä runakunata kachariy chunyaq jirkaman aywaykur noqata adoramashpan fiestata rurapäkunanpaq> >>.

² Tsayno niptinmi Faraón kayno nirqan: <<¿Pitaq Tayta Diosnikiqa kaykan payta cäsukur Israel runakunata <ayway> ninäpaqqa? Tayta Diosnikitaqa manami reqïtsu. Israel runakunata aywakunanpaq manami kachapäshaqtsu>>.

³ Tsayno niptinmi Moiséswan Aarón kayno nirqan: <<Hebreo runakunapa Tayta Diosninmi yuripämashqa. Tsaymi chunyaq jirkaman aywapäkushaq kimsa junaq aywayta. Tsaychömi Tayta Diosnïta adorar sacrificiukunata rupatsipäkushaq. Tsayno mana ruraptïqa qeshyawanpis o guërrawanpis noqakunata ushakätsimanqami>>.

⁴ Tsawraqa Egipto nacionpa mandaqnin rey kayno nirqan: <<Moisés y Aarón, ¿imanirtaq runakuna ali arukuykaqta tiempunta perdiykätsinki? ¡Qamkunapis jukla aruq aywapäkuy!

⁵ Kaytsika Israel runakuna ali arukuykaptin ¿imanirtaq shimita jatipaykanki mana arukunanpaq?>>

Israel runakunata mana jamatsiypa arutsishqan

⁶ Tsayno nirmi tsay junaqla capatazninkunata y yanapaqninkunatapis Faraón kayno nirqan:

⁷ <<Israel runakuna adöbita tsutananpaq kananpitaqa amana päjata kamaripaynatsu. Kikinkunana aywatsun päjata ashimunanpaq.

⁸ Nirkur nawpata tsutashqannöla juk adöbilapis mana pishiqta tareata cumplinanpaq obligapäkunki. Tsay runakunaqa aruyta qelanashpanmi kayno nirkaykan: <Chunyaq jirkaman aywar Diosnïpaq sacrificiuta rupatsipäkushaq>.

⁹ Tsaynöpis kanan junaqpitaqa Israel runakunata mana jamatsiypa arutsipäkunki. Aruywan nitishqa karmi lulapaykashqantapis mana chaskipanqanatsu>>.

¹⁰ Tsaymi capatazkuna y yanapaqninkunapis aywaykur Israel runakunata kayno nipäkurqan: <<Faraónmi nipäkamashqa kananpitaqa päjata manana kamaripänäpaq.

¹¹ Kananqa kikikikuna maypitapis päjata ashimunki adöbita tsutapäkunaykipaq. Nirkur nawpata tsutashqaykino adöbita tsutanki juklaylapis mana pishiqta>>.

¹² Tsayno niptinmi adöbita tsutapäkunanpaq Israel runakuna intëru Egiptupa ashirqan päjapa trukan punshata shuntapäkunanpaq.

¹³ Capatazkunami kayno nirqan: <<Päjata chaskir adöbita tsutashqaykinöla kananpis cumplipäkuy>>.

¹⁴ Yanapaqninkuna cumplitsiyta mana kamäpakuptinmi capatazkuna astapäkurqan kayno nishpan: <<Qanyanpis ni kananpis ¿imanirtaq nawpata tsutatsishqaykino adöbi tsutatsiyta mana cumplitsinkitsu?>> (Capatazkunapa yanapaqninkunaqa Israel runakunami karqan.)

¹⁵ Tsawraqa capatazkunapa yanapaqninkuna Faraónman quejakuq aywar kayno nipäkurqan: <<Ashmayniki karkaykaptïqa ¿imanirtaq fiyupa nakatsimanki, tayta?

¹⁶ Capataznikikunaqa päjatapis mananami kamaripämannatsu. Tsayno mana kamaripaykämarpis tareata cumplitsinätaraq munarkaykan. Nirkurpis maqarkaykämanraq. Päjata mana kamaripämar capataznikikunami jutsayuq karkaykan adöbi tsutayta mana cumplitsinäpaq, tayta>>.

¹⁷ Tsayno niptinmi Faraón kayno nirqan: <<¡Qamkunaqa qela karmi tsayno purirkaykanki! Tsaymi <Tayta Diospaq sacrificiuta rupatsiq aywapäkushaq> nirkaykanki.

¹⁸ Tsayno nir purinaykipa trukanqa aruq jukla aywapäkuy. Päjata manana kamaripäshuptikipis juktapis mana pishiqta adöbita tsutatsinki>>.

¹⁹ Imanöpapis tareata cumplitsinanpaq niptinmi capatazkunapa yanapaqninkuna pasaypa lakikurqan.

²⁰ Faraónwan palaciuncho parlashqanpita yarqamurmi Moisésta y Aarónta shuyarpaykaqta capatazkunapa yanapaqninkuna taripäkurqan.

²¹ Tsaycho tarirmi kayno nipäkurqan: <<Qamkunami Faraónta rabyanätsishqanki kayjinanpa nakatsipäkamänanpaq. Wanutsimänanpaq cuchilluta aptapaqnömi achäquita ashipashqanki. ¡Tsayno rabyanätsishqaykipita Tayta Dios castigashunki!>>

²² Tsayno niptinmi Tayta Diosta manakur Moisés kayno nirqan: <<Tayta Dios, ¿imanirtaq pasaypa nakaykatsinki akrashqayki runakunata? ¿Tsaypaqku kachamarqayki?

²³ Faraónwan parlaq aywashqä junaqpita patsami kuyashqayki runakunata maqa maqarkur arutsishpan fiyupa nakaykätsin. Tsayno nakaykätsiptinpis manami paykunata salvaykankitsu>>.