Miyambo 3 - Buku Lopatulika

Malangizo a kuopa, kukhulupirira, ndi kumvera Yehova

¹ Mwananga, usaiwale malamulo anga, mtima wako usunge malangizo anga;

² pakuti adzakuonjezera masiku ambiri, ndi zaka za moyo ndi mtendere.

³ Chifundo ndi choonadi zisakusiye; uzimange pakhosi pako; uzilembe pamtima pako;

⁴ motero udzapeza chisomo ndi nzeru yabwino, pamaso pa Mulungu ndi anthu.

⁵ Khulupirira Yehova ndi mtima wako wonse, osachirikizika pa luntha lako;

⁶ umlemekeze m'njira zako zonse, ndipo Iye adzaongola mayendedwe ako.

⁷ Usadziyese wekha wanzeru; opa Yehova, nupatuke pazoipa;

⁸ mitsempha yako idzalandirapo moyo, ndi mafupa ako uwisi.

⁹ Lemekeza Yehova ndi chuma chako, ndi zinthu zako zonse zoyambirira kucha;

¹⁰ motero nkhokwe zako zidzangoti thee, mbiya zako zidzasefuka vinyo.

¹¹ Mwananga, usapeputse mwambo wa Yehova, ngakhale kutopa ndi kudzudzula kwake;

¹² pakuti Yehova adzudzula omwe awakonda; monga atate mwana amene akondwera naye.

Phindu la Nzeru

¹³ Wodala ndi wopeza nzeru, ndi woona luntha;

¹⁴ pakuti malonda a nzeru aposa malonda a siliva, phindu lake liposa golide woyengeka.

¹⁵ Mtengo wake uposa ngale; ndipo zonse zikukondweretsa sizilingana naye.

¹⁶ Masiku ambiri ali m'dzanja lamanja lake; chuma ndi ulemu m'dzanja lake lamanzere.

¹⁷ Njira zake zili zokondweretsa, mayendedwe ake onse ndiwo mtendere.

¹⁸ Ndiyo mtengo wa moyo wa akuigwira; wakuiumirira ngwodala.

¹⁹ Yehova anakhazika dziko ndi nzeru; naika zamwamba ndi luntha.

²⁰ Zakuya zinang'ambika ndi kudziwa kwake; thambo ligwetsa mame.

²¹ Mwananga, zisachokere kumaso ako; sunga nzeru yeniyeni ndi kulingalira;

²² ndipo mtima wako udzatengapo moyo, ndi khosi lako chisomo.

²³ Pompo udzayenda m'njira yako osaopa, osaphunthwa phazi lako.

²⁴ Ukagona, sudzachita mantha; udzagona tulo tokondweretsa.

²⁵ Usaope zoopsa zodzidzimutsa, ngakhale zikadza zopasula oipa;

²⁶ pakuti Yehova adzalimbitsa mtima wako, nadzasunga phazi lako lingakodwe.

Malangizo ena osiyana

²⁷ Oyenera kulandira zabwino usawamane; pokhoza dzanja lako kuwachitira zabwino.

²⁸ Usanene kwa mnzako, Ukabwerenso, ndipo mawa ndidzakupatsa; pokhala uli nako kanthu.

²⁹ Usapangire mnzako chiwembu; popeza akhala nawe pafupi osatekeseka.

³⁰ Usakangane ndi munthu chabe, ngati sanakuchitire choipa.

³¹ Usachitire nsanje munthu wachiwawa; usasankhe njira yake iliyonse.

³² Pakuti wamphulupulu anyansa Yehova; koma chinsinsi chake chili ndi oongoka.

³³ Yehova atemberera za m'nyumba ya woipa; koma adalitsa mokhalamo olungama.

³⁴ Anyozadi akunyoza, koma apatsa akufatsa chisomo.

³⁵ Anzeru adzalandira ulemu cholowa chao; koma opusa adzakweza manyazi.