Masalimo 1 - Buku Lopatulika

Kusiyana pakati pa olungama ndi oipa

¹ Wodala munthuyo wosayenda mu uphungu wa oipa, kapena wosaimirira m'njira ya ochimwa, kapena wosakhala pansi pa bwalo la onyoza.

² Komatu m'chilamulo cha Yehova muli chikondwerero chake; ndipo m'chilamulo chake amalingirira usana ndi usiku.

³ Ndiye akunga mtengo wooka pa mitsinje ya madzi; wakupatsa chipatso chake pa nyengo yake, tsamba lake lomwe losafota; ndipo zonse azichita apindula nazo.

⁴ Oipa satero ai; koma akunga mungu wouluka ndi mphepo.

⁵ Chifukwa chake oipa sadzaimirira pa mlanduwo, kapena ochimwa mu msonkhano wa olungama.

⁶ Pakuti Yehova adziwa mayendedwe a olungama; koma mayendedwe a oipa adzatayika.