Masalimo 111 - Buku Lopatulika Buku Lopatulika
Masalimo 111

¹ Aleluya. Ndidzayamika Yehova ndi mtima wonse, mu upo wa oongoka mtima, ndi mumsonkhano.

² Ntchito za Yehova nzazikulu, zofunika ndi onse akukondwera nazo.

³ Chochita Iye ncha ulemu, ndi ukulu: Ndi chilungamo chake chikhalitsa kosatha.

⁴ Anachita chokumbukitsa zodabwitsa zake; Yehova ndiye wachisomo ndi nsoni zokoma.

⁵ Anapatsa akumuopa Iye chakudya; adzakumbukira chipangano chake kosatha.

⁶ Anaonetsera anthu ake mphamvu ya ntchito zake, pakuwapatsa cholowa cha amitundu.

⁷ Ntchito za manja ake ndizo choonadi ndi chiweruzo; malangizo ake onse ndiwo okhulupirika.

⁸ Achirikizika kunthawi za nthawi, achitika m'choonadi ndi chilunjiko.

⁹ Anatumizira anthu ake chipulumutso; analamulira chipangano chake kosatha; dzina lake ndilo loyera ndi loopedwa.

¹⁰ Kumuopa Yehova ndiko chiyambi cha nzeru; onse akuchita chotero ali nacho chidziwitso chokoma; chilemekezo chake chikhalitsa kosatha.