တမန်တော်ဝတ္ထု 11 - ခေတ်သစ်မြန်မာ သမ္မာကျမ်းမိမိ၏လုပ်ဆောင်မှုများကို ပေတရုရှင်းလင်းခြင်း 1 လူမျိုးခြားများသည်လည်း ဘုရားသခင်၏ နှုတ်ကပတ်တရားတော်ကို ခံယူကြောင်း ယုဒပြည်တစ်ဝန်းရှိ တမန်တော်များနှင့် ယုံကြည်သူများကြားသိကြ၏။ 2 ထို့ကြောင့် ဂျေရုဆလင်မြို့သို့ ပေတရုပြန်တက်လာသောအခါ အရေပြားလှီးခြင်းမင်္ဂလာကို ခံယူကြသောသူများက 3 “သင်သည် အရေပြားလှီးခြင်းမင်္ဂလာကို မခံယူသောသူတို့ထံ သွား၍ ထိုသူတို့နှင့်အတူ စားသောက်ပါသည်” ဟု ပြစ်တင်၍ ပြောဆိုကြ၏။ 4 ထိုအခါ ပေတရုသည် ထိုအကြောင်းကို သူတို့အား အစအဆုံးရှင်းပြသည်မှာ 5 “ကျွန်ုပ်သည် ယုပ္ပေမြို့တွင် ဆုတောင်းလျက်ရှိနေစဉ် ပီတိဘဝင်ဖြစ်၍ ရူပါရုံတစ်ခုကို မြင်ရ၏။ ကောင်းကင်မှ ထောင့်လေးထောင့်ဖြင့် ထိန်းလျက် လျှောချသည့် ပိတ်ထည်စကြီးကဲ့သို့သောအရာသည် ကျွန်ုပ်အနားသို့ တဖြည်းဖြည်းကျဆင်းလာ၏။ 6 သေချာစွာကြည့်သောအခါ ခြေလေးချောင်းသတ္တဝါများ၊ အသားစားသတ္တဝါများ၊ တွားသွားသတ္တဝါများနှင့် ငှက်များပါရှိသည်ကို တွေ့ရ၏။ 7 ထို့နောက် ‘ပေတရု၊ ထ၍ သတ်စားလော့’ ဟူ၍ ကျွန်ုပ်ထံသို့လာသော အသံကိုလည်း ကြားရ၏။ 8 သို့သော် ကျွန်ုပ်က ‘မဖြစ်နိုင်ပါ သခင်ဘုရား… အကျွန်ုပ်သည် ညစ်ညမ်းသောအရာနှင့် မစင်ကြယ်သောအရာကို မည်သည့်အခါမျှ မစားဖူးပါ’ ဟု လျှောက်၏။ 9 သို့သော်လည်း တစ်ဖန် ကောင်းကင်မှ အသံတော်က ‘ဘုရားသခင်စင်ကြယ်စေသည့်အရာကို ညစ်ညမ်းသည်ဟု မဆိုနှင့်’ ဟူ၍ ဆိုလေ၏။ 10 ဤသို့ သုံးကြိမ်ဖြစ်ပျက်ပြီး ထိုအရာသည် ကောင်းကင်သို့ ယူဆောင်သွားခြင်းခံရ၏။ 11 ထိုခဏချင်းတွင် ဆီဇာရီးယားမြို့မှ ကျွန်ုပ်ထံသို့ စေလွှတ်ခံရသော လူသုံးဦးသည် ကျွန်ုပ်တို့နေထိုင်သောအိမ်သို့ ရောက်လာကြ၏။ 12 ထို့နောက် ဝိညာဉ်တော်က ကျွန်ုပ်အား မတွန့်ဆုတ်ဘဲ ထိုသူတို့နှင့် လိုက်သွားရန် မိန့်တော်မူ၏။ ဤညီအစ်ကိုခြောက်ဦးသည်လည်း ကျွန်ုပ်နှင့်လိုက်ပါ၍ ထိုသူ၏အိမ်သို့ ဝင်ရောက်ကြ၏။ 13 ထိုအခါ ကော်နေလိက ကောင်းကင်တမန်သည် သူ၏အိမ်တွင်ရပ်လျက် ‘ယုပ္ပေမြို့သို့ လူလွှတ်၍ ပေတရုဟု ခေါ်သော ရှိမုန်ကို ဖိတ်လော့။ 14 သူသည် သင်နှင့် သင့်အိမ်သူအိမ်သားအားလုံး ကယ်တင်ခြင်းခံရမည့် တရားစကားကို ဟောပြောလိမ့်မည်’ ဟု ဆိုသည်ကို ကျွန်ုပ်တို့အား ပြန်ပြောပြ၏။ 15 ကျွန်ုပ်စတင် ဟောပြောသည်နှင့် သန့်ရှင်းသောဝိညာဉ်တော်သည် ယခင်က ကျွန်ုပ်တို့အပေါ်သက်ရောက်သကဲ့သို့ ထိုသူတို့အပေါ် ဆင်းသက်တော်မူ၏။ 16 ထိုအခါ ကျွန်ုပ်က သခင်ဘုရား မိန့်တော်မူခဲ့သော ‘ယောဟန်သည် ရေ၌နှစ်ခြင်းမင်္ဂလာပေးသော်လည်း သင်တို့သည် သန့်ရှင်းသောဝိညာဉ်တော်၌ နှစ်ခြင်းမင်္ဂလာကို ခံယူကြရလိမ့်မည်’ဟူသည့် စကားတော်ကို ပြန်၍သတိရ၏။ 17 သခင်ယေရှုခရစ်တော်အား ကျွန်ုပ်တို့ယုံကြည်သောအခါ ဘုရားသခင်သည် ကျွန်ုပ်တို့အား ပေးတော်မူသည့် လက်ဆောင်ကို ထိုသူတို့အားလည်းပေးသနားသောကြောင့် ကျွန်ုပ်သည် မည်သူဖြစ်၍ ဘုရားသခင်ကို ဟန့်တားနိုင်ပါမည်နည်း” ဟူ၍ ဖြစ်၏။ 18 ဤအကြောင်းအရာများကို ထိုသူတို့ကြားရသောအခါ ငြိမ်သက်သွားကြပြီး “ဤသို့ဆိုလျှင် ဘုရားသခင်သည် လူမျိုးခြားတို့အား ထာဝရအသက်ရှင်စေရန်နောင်တရခြင်းအခွင့်ကို ပေးသနားတော်မူပြီ” ဟု ဆို၍ ဘုရားသခင်ကို ချီးမွမ်းကြ၏။ ဆီးရီးယားပြည် အန္တိအုတ်မြို့ရှိ အသင်းတော် 19 သတေဖန်သေဆုံးပြီးနောက် ဖြစ်ပေါ်လာသည့် ညှဉ်းပန်းနှိပ်စက်ခြင်းကြောင့် ကွဲလွင့်ပျံ့နှံ့သွားကြသောသူများသည် ဖိုနီးရှားပြည်၊ ဆိုက်ပရပ်ကျွန်းနှင့် ဆီးရီးယားပြည်ရှိအန္တိအုတ်မြို့ထိတိုင် ရောက်သွားကြပြီး ဂျူးလူမျိုးတို့ကိုသာ ဘုရားသခင်၏နှုတ်ကပတ်တရားကို ဟောပြောကြ၏။ 20 သို့သော် ထိုသူတို့အထဲတွင် ဆိုက်ပရပ်ကျွန်းနှင့် ကုရေနေမြို့သားတချို့ပါရှိ၍ အန္တိအုတ်မြို့သို့သွားကြပြီးလျှင် ဂရိစကားပြောသောလူတို့အား သခင်ယေရှုအကြောင်းကို ဟောပြောကြလေ၏။ 21 သခင်ဘုရား၏တန်ခိုးတော်သည် ထိုသူတို့နှင့်အတူ ရှိသဖြင့် မြောက်မြားစွာသောလူတို့သည် ယုံကြည်လာကြပြီး သခင်ဘုရားထံသို့ ပြောင်းလဲလာကြ၏။ 22 ဂျေရုဆလင်မြို့ရှိ အသင်းသားများသည် ဤသတင်းကို ကြားသဖြင့် ဗာနဗကို အန္တိအုတ်မြို့တိုင်အောင် စေလွှတ်ကြ၏။ 23 ဗာနဗရောက်လာပြီး ဘုရားသခင်၏ကျေးဇူးတော်ကို မြင်တွေ့ရသောအခါ ဝမ်းမြောက်ပျော်ရွှင်၍ ထိုသူတို့အားလုံးကို ခိုင်မြဲသောစိတ်နှလုံးဖြင့် ယေရှုခရစ်တော်အား ဆက်လက်ဆည်းကပ်ရန် တိုက်တွန်းလေ၏။ 24 ဗာနဗသည် သူတော်ကောင်းဖြစ်၍ သန့်ရှင်းသောဝိညာဉ်တော်နှင့် ယုံကြည်ခြင်းတို့ဖြင့် ပြည့်ဝသောသူဖြစ်၏။ ထို့ကြောင့် မြောက်မြားစွာသောလူတို့သည် သခင်ဘုရားထံသို့ ပြောင်းလဲလာကြ၏။ 25 ထို့နောက် ဗာနဗသည် ရှောလုကိုရှာရန် တာရှုမြို့သို့ သွားလေ၏။ 26 ရှောလုကို တွေ့သောအခါ အန္တိအုတ်မြို့သို့ ခေါ်ဆောင်လာ၏။ ထိုမြို့၌ တစ်နှစ်ပတ်လုံး အသင်းတော်နှင့်တွေ့ဆုံစည်းဝေး၍ လူများစွာကို သွန်သင်ပေးလေ၏။ တပည့်တော်များသည် ခရစ်ယာန်ဟု အန္တိအုတ်မြို့တွင် ပထမဦးဆုံးခေါ်ဝေါ်ခြင်း ခံကြရ၏။ 27 ထိုအချိန်တွင် ပရောဖက်များသည် ဂျေရုဆလင်မြို့မှ အန္တိအုတ်မြို့သို့ ဆင်းလာကြ၏။ 28 သူတို့အထဲမှ အာဂဗုအမည်ရှိသောသူသည် ထ၍ ကမ္ဘာတစ်ဝန်းလုံးတွင် ပြင်းထန်သောအစာခေါင်းပါးခြင်း ဖြစ်လိမ့်မည်ဟု ဝိညာဉ်တော်ဖွင့်ပြခြင်းအားဖြင့် ကြိုဟောလေ၏။ ထိုအစာခေါင်းပါးခြင်းသည် ကလောဒိမင်းလက်ထက်တွင် ဖြစ်ပွား၏။ 29 တပည့်တော်များက မိမိတို့ တတ်နိုင်သည့်အတိုင်း ယုဒပြည်တွင်နေထိုင်သော ယုံကြည်သူများအား ထောက်ပံ့ငွေပေးပို့ရန် ဆုံးဖြတ်ကြ၏။ 30 ထိုသို့ဆုံးဖြတ်ခဲ့သည့်အတိုင်း ထိုထောက်ပံ့ငွေကို ဗာနဗနှင့် ရှောလုမှတစ်ဆင့် အသင်းတော်အကြီးအကဲများထံသို့ ပို့လိုက်ကြ၏။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.