ဆာ​လံ 149 - မြန်​​​မာ့​​​စံ​​​မီ​​​သမ္မာ​​​ကျမ်း​​ မြန်​​​မာ့​​​စံ​​​မီ​​​သမ္မာ​​​ကျမ်း​​
ဆာ​လံ 149

¹ ဟာလေလုယ​။ ထာဝရဘုရား​ထံသို့ သီချင်း​အသစ်​ကို သီဆို​ကြ​လော့​။ သန့်ရှင်း​သူ​တို့​၏​အစုအဝေး​၌ ကိုယ်တော်​၏​ဂုဏ်ကျေးဇူး​တော်​ကို​ချီးမွမ်း​ကြ​လော့​။

² အစ္စရေး​လူမျိုး​သည် မိမိ​ကို​ဖန်ဆင်း​သော​အရှင်​၌ ဝမ်းမြောက်​ပါစေ​။ ဇိအုန်​သားသမီး​တို့​သည် မိမိ​တို့​၏​ရှင်ဘုရင်​၌ ရွှင်လန်း​ကြ​ပါစေ​။

³ သူ​တို့​သည် ကခုန်​လျက် ကိုယ်တော်​၏​နာမ​တော်​ကို ချီးမွမ်း​ကြ​ပါစေ​။ ပတ်သာ​နှင့်​စောင်း​ကို​တီး​၍ ကိုယ်တော်​ကို သီဆိုချီးမွမ်း​ကြ​ပါစေ​။

⁴ အကြောင်းမူကား ထာဝရဘုရား​သည် မိမိ​၏​လူမျိုး​တော်​ကို နှစ်သက်​တော်မူ​၏​။ ကိုယ်တော်​သည် စိတ်နှိမ့်ချ​သော​သူ​တို့​ကို ကယ်တင်​ခြင်း​နှင့်​တင့်တယ်​စေ​တော်မူ​၏​။

⁵ သန့်ရှင်း​သူ​တို့​သည် ဘုန်းအသရေ​တော်​၌​ရွှင်မြူး​ကြ​ပါစေ​။ မိမိ​တို့​၏​အိပ်ရာ​ပေါ်၌ ရွှင်လန်း​စွာ​သီချင်းဆို​ကြ​ပါစေ​။

⁶ သူ​တို့​၏​နှုတ်​၌ ဘုရားသခင်​၏​ဂုဏ်တော်ချီးမွမ်း​ခြင်း​ရှိ​ကြ​ပါစေ​။ သူ​တို့​၏​လက်​၌​လည်း အသွားနှစ်ဖက်​ပါ​သော​သန်လျက်​ကို ကိုင်​ထား​ကြ​ပါစေ​။

⁷ သူ​တို့​သည် တိုင်းနိုင်ငံ​များ​ကို​လက်တုံ့ပြန်​ခြင်း​နှင့် လူ​တို့​ကို​ဆုံးမ​ခြင်း​အမှု​တို့​ကို​ပြု​ရန်​လည်းကောင်း​၊

⁸ ထို​သူ​တို့​၏​ရှင်ဘုရင်​များ​ကို သံကြိုး​ဖြင့်​ချည်နှောင်​၍ ထို​သူ​တို့​ထဲမှ​ဂုဏ်သရေရှိ​ပုဂ္ဂိုလ်​များ​ကို သံ​ခြေချင်း​ခတ်​ရန်​လည်းကောင်း​၊

⁹ ရေးသား​ထား​သော​တရားစီရင်ချက်​ကို ထို​သူ​တို့​အပေါ် သက်ရောက်​စေရန်​လည်းကောင်း​ဖြစ်​၏​။ ဤသည်ကား ကိုယ်တော်​၏​သန့်ရှင်း​သူ​အပေါင်း​တို့​၌​ရှိ​သော ခန့်ညားထည်ဝါမှု​ဖြစ်​၏​။ ဟာလေလုယ​။