ဆာ​လံ 148 - မြန်​​​မာ့​​​စံ​​​မီ​​​သမ္မာ​​​ကျမ်း​​

ဖန်ဆင်းခံလောကတစ်ခုလုံးထာဝရဘုရားကိုချီးမွမ်းခြင်း

¹ ဟာလေလုယ​။ ထာဝရဘုရား​ကို ကောင်းကင်​ပေါ်မှ ချီးမွမ်း​ကြ​လော့​။ ကိုယ်တော်​ကို မြင့်မြတ်သောအရပ်​၌ ချီးမွမ်း​ကြ​လော့​။

² ကိုယ်တော်​၏​ကောင်းကင်တမန်​အပေါင်း​တို့​၊ ကိုယ်တော်​ကို ချီးမွမ်း​ကြ​လော့​။ ကိုယ်တော်​၏​ကောင်းကင်​ဗိုလ်ခြေ​အပေါင်း​တို့​၊ ကိုယ်တော်​ကို ချီးမွမ်း​ကြ​လော့​။

³ နေ​နှင့်​လ​တို့​၊ ကိုယ်တော်​ကို ချီးမွမ်း​ကြ​လော့​။ တောက်ပ​သော​ကြယ်​အပေါင်း​တို့​၊ ကိုယ်တော်​ကို​ချီးမွမ်း​ကြ​လော့​။

⁴ အမြင့်ဆုံးသောကောင်းကင်​နှင့် ကောင်းကင်​အထက်​မှ​ရေ​များ​တို့​၊ ကိုယ်တော်​ကို ချီးမွမ်း​ကြ​လော့​။

⁵ ၎င်း​တို့​သည် ထာဝရဘုရား​၏​အမိန့်​တော်​ဖြင့် ဖန်ဆင်း​ခြင်း​ခံရ​ကြ​သည်​ဖြစ်၍ ကိုယ်တော်​၏​နာမ​တော်​ကို​ချီးမွမ်း​ကြ​ပါစေ​။

⁶ ကိုယ်တော်​သည် ၎င်း​တို့​ကို ကာလ​အစဉ်အဆက်​တည်​စေ​၍ မ​ပျောက်ပျက်​နိုင်​သော​ပြဋ္ဌာန်းချက်​ကို ပေး​တော်မူ​၏​။

⁷ ရေသတ္တဝါကြီး​များ​နှင့် နက်ရှိုင်း​ရာ​အရပ်​ရှိသမျှ​၊

⁸ မီး​နှင့်​မိုးသီး​၊ နှင်းပွင့်​နှင့်​မြူခိုး​၊ ကိုယ်တော်​၏​အမိန့်​တော်​အတိုင်း​လုပ်ဆောင်​သော လေ​မုန်တိုင်း​၊

⁹ တောင်​များ​နှင့် တောင်ကုန်း​ရှိသမျှ​၊ သီးစားပင်​နှင့်​သစ်ကတိုးပင်​ရှိသမျှ​၊

¹⁰ တောရိုင်းတိရစ္ဆာန်​နှင့် ယဉ်ပါးသောတိရစ္ဆာန်​ရှိသမျှ​၊ တွားသွားသောတိရစ္ဆာန်​များ​နှင့် ပျံသန်း​တတ်​သော​ငှက်​၊

¹¹ ကမ္ဘာမြေကြီး​ပေါ်ရှိ ရှင်ဘုရင်​များ​နှင့် လူမျိုး​ရှိသမျှ​၊ အကြီးအကဲ​များ​နှင့် ကမ္ဘာမြေကြီး​ပေါ်ရှိ​စီရင်အုပ်ချုပ်​သူ​ရှိသမျှ​၊

¹² လူပျို​များ​နှင့်​အပျို​များ​၊ အသက်ကြီး​သော​သူ​များ​နှင့်​ကလေးသူငယ်​များ​တို့​၊ ထာဝရဘုရား​ကို ကမ္ဘာမြေကြီး​ပေါ်မှ ချီးမွမ်း​ကြ​လော့​။

¹³ ကိုယ်တော်​၏​နာမ​တော်​တစ်ပါးတည်း​သာ ချီးမြှောက်​ခြင်း​ခံရ​၍ ကိုယ်တော်​၏​ဘုန်းကျက်သရေ​သည် မြေကြီး​နှင့် ကောင်းကင်​အထက်၌​ရှိ​တော်မူ​သောကြောင့် သူ​တို့​သည် ထာဝရဘုရား​၏​နာမ​တော်​ကို ချီးမွမ်း​ကြ​ပါစေ​။

¹⁴ ကိုယ်တော်​သည် မိမိ​၏​လူမျိုး​တော်​အတွက် ဦးချို​ကို​ချီးမြှောက်​တော်မူ​၏​။ ၎င်း​သည် မိမိ​၏​သန့်ရှင်း​သူ​အားလုံး​အတွက်​၊ မိမိ​အနီး​တွင်​ရှိ​သည့်​လူမျိုး​တည်းဟူသော အစ္စရေး​အမျိုးသား​တို့​အတွက် ချီးမွမ်း​ရာ​ဖြစ်​၏​။ ဟာလေလုယ​။