မောရှေထက် ကြီးမြတ်တော်မူသော ယေရှု1 ထို့ကြောင့် ဘုရားသခင်၏ ရွေးချယ်တော်မူခြင်းခံရသူတို့ထဲတွင် ပါဝင်သည့် သန့်ရှင်းသောညီအစ်ကိုမောင်နှမတို့… ကျွန်ုပ်တို့၏ ယဇ်ပုရောဟိတ်မင်းနှင့် အထူးတမန်တော်အဖြစ် ကျွန်ုပ်တို့ဝန်ခံသော ယေရှုခရစ်တော်ကို ဆင်ခြင်အောက်မေ့ကြလော့။ 2 မောရှေသည် ဘုရားသခင်၏အိမ်တော်တစ်ခုလုံးအပေါ် သစ္စာရှိသကဲ့သို့ ယေရှုသည်လည်း မိမိအား ခန့်ထားတော်မူသော ဘုရားသခင်အပေါ် သစ္စာရှိတော်မူ၏။ 3 သို့သော် အိမ်ဆောက်သူသည် ထိုအိမ်ထက် ပို၍ဂုဏ်အသရေရှိသကဲ့သို့ ယေရှုခရစ်တော်သည် မောရှေထက် ပို၍ ဂုဏ်အသရေခံထိုက်၏။ 4 အဘယ်ကြောင့်ဆိုသော် အိမ်ကို လူက တည်ဆောက်သော်လည်း ဘုရားသခင်သည် အရာခပ်သိမ်းကို တည်ဆောက်တော်မူသောကြောင့်ဖြစ်၏။ 5 မောရှေသည် အစေခံ တစ်ဦးအနေဖြင့် ဘုရားသခင်၏ အိမ်တော်တစ်ခုလုံးအပေါ် သစ္စာရှိပြီး အနာဂတ်တွင် ဘုရားသခင်ဟောပြောမည့်အရာအတွက် သက်သေတစ်ဦးဖြစ်၏။ 6 သို့သော် ခရစ်တော်သည် သားတော်တစ်ပါးအဖြစ် ဘုရားသခင်၏ အိမ်တော်ကို အုပ်စိုးရာတွင် သစ္စာရှိတော်မူ၏။ ကျွန်ုပ်တို့၏ စိတ်ချယုံကြည်မှုနှင့်ဂုဏ်ယူဝင့်ကြွားစရာ မျှော်လင့်ခြင်းကို ခိုင်မြဲစွာစွဲကိုင်ထားလျှင် ကျွန်ုပ်တို့သည် ကိုယ်တော်၏အိမ်တော်ဖြစ်ကြ၏။ 7 ထို့ကြောင့် သန့်ရှင်းသောဝိညာဉ်တော်မိန့်တော်မူသည်မှာ “ယနေ့ သင်တို့သည် ကိုယ်တော်၏အသံကို ကြားလျှင် 8-9 သင်တို့၏ ဘိုးဘေးများသည် အနှစ်လေးဆယ်လုံးလုံး ငါ၏ လုပ်ဆောင်မှုတို့ကို မြင်ခဲ့ကြသော်လည်း တော၌ ငါ့ကို အကဲစမ်းလျက် ပုန်ကန်စဉ်က ခေါင်းမာသကဲ့သို့ သင်တို့သည် ခေါင်းမမာကြနှင့်။ 10 သို့ဖြစ်၍ ထိုမျိုးဆက်ကို စိတ်ဆိုးလျက် ‘သူတို့သည် အစဉ်လမ်းလွဲ၍ ငါ၏ လမ်းစဉ်ကို မသိကြ’ ဟု ငါဆို၏။ 11 ထို့ကြောင့် ငါသည် စိတ်ဆိုး၍ ‘သူတို့သည် ငါ၏စံမြန်းနားခိုရာသို့ မည်သည့်အခါမျှ ဝင်ကြရမည်မဟုတ်’ ဟု ကျိန်ဆိုသည်” ဟူ၍ဖြစ်၏။ 12 ညီအစ်ကိုမောင်နှမတို့… သင်တို့၏ စိတ်နှလုံးသည် ညစ်ညူး၍ ယုံကြည်ရန် ငြင်းဆန်ကာ အသက်ရှင်သော ဘုရားသခင်ထံမှ ထွက်မသွားစေရန် သတိပြုကြလော့။ 13 သင်တို့သည် အပြစ်၏လှည့်စားမှုကြောင့် ခေါင်းမာသူများမဖြစ်ရန် “ယနေ့” ဟု ခေါ်သော နေ့စဉ်နေ့တိုင်း အချင်းချင်းအားပေးတိုက်တွန်းကြလော့။ 14 ကျွန်ုပ်တို့၏ မူလခံယူချက်ကို အဆုံးတိုင်အောင် ခိုင်မြဲစွာစွဲကိုင်ထားလျှင် ကျွန်ုပ်တို့သည် ခရစ်တော်နှင့် သက်ဆိုင်သူများဖြစ်ကြ၏။ 15 ကျမ်းစာ၌ “ယနေ့ ကိုယ်တော်၏အသံကိုကြားလျှင် သင်တို့၏ ဘိုးဘေးများ ပုန်ကန်စဉ်က ခေါင်းမာသကဲ့သို့ သင်တို့သည် ခေါင်းမမာကြနှင့်” ဟု ဖော်ပြထား၏။ 16 ကိုယ်တော်၏ အသံကို ကြားလျက် ပုန်ကန်သောသူတို့သည် အဘယ်သူနည်း။ အီဂျစ်ပြည်မှ မောရှေခေါ်ထုတ်ခဲ့သောသူအပေါင်းတို့မဟုတ်လော။ 17 အနှစ်လေးဆယ်အတွင်း ဘုရားသခင် အမျက်ထွက်တော်မူသောသူတို့မှာ မည်သူတို့နည်း။ အပြစ်ကျူးလွန်၍ တောကန္တာရ၌သေသောသူများ မဟုတ်လော။ 18 ဘုရားသခင်သည် သူ၏စံမြန်းနားခိုရာထဲသို့ မဝင်ရဟု မည်သူ့ကို ကျိန်ဆိုခဲ့သနည်း။ သူတို့သည် မနာခံ ငြင်းဆန်သူများ မဟုတ်လော။ 19 သို့ဖြစ်၍ သူတို့သည် မယုံကြည်သောကြောင့် ဘုရားသခင်၏ စံမြန်းနားခိုရာထဲသို့ မဝင်နိုင်ကြသည်ကို ကျွန်ုပ်တို့သိ၏။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.