Salamo 9 - Baiboly Katolika

SALAMO 9-10 Arian’Andriamanitra ny ratsy fanahy, vonjeny ny mahantra

¹ Ho an’ny mpampianatra hira. Amin’ny hira hoe Fahafatesana ho an’ny zanaka lahy . Salamon’i Davida.

Alef

² Hidera an’i Iaveh amin’ny foko rehetra aho, hanambara ny zava-mahagaga rehetra nataonao.

³ Hifaly sy hientan-kafaliana aminao aho, hihira ny Anaranao aho, ry Avo indrindra ô!

Bet

⁴ Lasa mihemotra ny fahavaloko, mandraingiraingy izy, dia lavo teo anatrehan’ny Tavanao.

⁵ Satria efa nataonao mahery ny rariny ananako sy ny adiko, nipetraka ho mpitsara marina Ianao, teo amin’ny seza fiandriananao.

Gimel

⁶ Nofaizinao ny firenena, naringanao ny tsy mpivavaka, nokosehinao ho faty mandrakizay antaranoana ny anaran’ireny.

⁷ Levona ny fahavalo! faharavana haharitra mandrakizay! Tanàna nofongoranao! Very mbamin’ny fahatsiarovana azy.

He

⁸ Fa i Iaveh kosa mipetraka mandrakizay, efa voatsangany ny sezany hitsarany;

⁹ ka mitsara an’izao tontolo izao amin’ny fahamarinana Izy, mitsara ny firenena amin’ny fahitsiana

Vao

¹⁰ I Iaveh dia fiarovana ho an’ny ampahorîna, fiarovana ho amin’ny andron’ny fahoriana.

¹¹ Ianao no itokian’izay mahalala ny Anaranao fa tsy mandao izay mitady Anao Ianao, ry Iaveh.

Jain

¹² Mankalazà an’i Iaveh izay mitoetra any Siôna, ambarao amin’ny firenena ny asa lehibe nataony.

¹³ Satria izay manadina ny ra nalatsaka dia nahatsiaro izany; tsy nanadino ny fitarainan’ny tra-pahoriana.

Het

¹⁴ Mamindrà fo amiko, ry Iaveh, hoy ireny; jereo ity fahoriana amelin’ny fahavaloko ahy fa Ianao no mampiverina ahy avy amin’ny vavahadin’ny fahafatesana,

¹⁵ mba hahazoako mitory ny fiderana rehetra, eo am-bavahadin’ny zanaka vavin’i Siôna, sy hientan-kafaliana noho ny famonjenao.

Tet

¹⁶ Latsaka tamin’ny lavaka nohadiny ny firenena; voan’ny fandrika harato nafeniny ny tongony.

¹⁷ Fa niseho i Iaveh nanao ny fitsaràny, ka ny asan-tanan’ny ratsy fanahy ihany no naningorany azy. - Higaiona. - Selà

Iôd

¹⁸ Miverina ho any amin’ny Seoly ny ratsy fanahy, ny firenena rehetra izay manadino an’Andriamanitra.

¹⁹ Fa ny malahelo tsy mba hadinoina hatrany hatrany; ny fanantenan’ny ory tsy rava mandrakizay.

Kaf

²⁰ Mitsangàna, ry Iaveh, aoka tsy ho ny olombelona no hahery; aoka hotsaraina eo anatrehan’ny Tavanao ny firenena!

²¹ Asio fangorohoroana ireny, ry Iaveh ô, aoka ho fantatry ny firenena fa olombelona ihany izy! - Selà