Nahoma 2 - Baiboly Katolika

(Ho an’i Jodà)

¹ Indro, eny an-tendrombohitra, ny tongotry ny iraka mitondra filazana mahafaly, izay manambara fiadanana. Ankalazao ny fetinao, ry Jodà, efao ny voadinao! Fa tsy handalo eo aminao intsony izy; efa levona mihitsy ny ratsy fanahy.

NY FAHARAVAN’NY NINIVA Fanafihana

² Misy mpandrava tamy hamely anao; tano ny trano mimanda, ambeno ny lalana, hatanjaho ny andilanao, angony ny herinao rehetra!

³ Fa i Iaveh mampody ny voninahitr’i Jakôba, mbamin’ny voninahitr’i Israely, satria norobain’ny mpandroba izy, sady nosimbany ny foto-boalobony.

⁴ Voaloko mena ny ampingan’ny mpiadiny, miakanjo mena mangatrakatraka ny miaramilany: mitranga ny kalesiny ao anatin’ny vy manjelanjelatra, amin’ny andro iomanany hiady, ary ny lefony mandihindihy.

⁵ Eny amin’ny arabe ny kalesiny miriotra mifofofofo; miezaka faingana eny amin’ny kianja, hoatra ny lelafo no fijery azy, toy ny tselatra mitsoriaka.

⁶ Mahatsiahy ny olo-malazany izy; tafintohina eny am-pandehanana ireny; miezaka ho amin’ny manda izy ireo: mivonon-kiaro tena ny olona.

⁷ Mivoha ny vavahadin’ny ony, dia mirodana ny lapa.

⁸ Efa tanteraka izao, dia nampitanjahiny, lasan-ko babo izy io, ka mitoloko ny mpanompovaviny toy ny fitolokon’ny voromahailala; mandondon-tratra izy ireo.

⁹ Toy ny bodo i Niniva hatrizay niandohany... Mandositra izy ireo! ...Mijanòna e! Mijanòna e!... nefa tsy misy miherika!

¹⁰ Baboy ny volafotsy, baboy ny volamena! fa tsy hita lany ny hareny, mbamin’ny fanaka sarobidiny rehetra voaangony.

¹¹ Foana, voaroba, tankina! Kivy ny fo, mangovitra ny lohalika, mitapitapin’ny fiahiana mafy ny valahana rehetra, mivaloarika avokoa ny tarehy.

Fandrahonana ny lion’i Asora

¹² Aiza no misy ny lavak’ireo liona, izay fitoerana ifahanan’ny liona tanora, izay nieran’ny liondahy aman-diombavy sy ny zana-diona, sady tsy misy manaitaitra azy?

¹³ Ilay liona nifaoka izay nilain’ny zanany, nanakenda ho an’ny liombaviny, nameno haza ny lavany, sy toha, ny zohiny.

¹⁴ Inty aho izao manohitra anao! - teny marin’i Iavehn’ny tafika; - hampanjariko setroka ny kalesinao; holevonin’ny sabatra ny liona tanoranao; hoesoriko amin’ny tany ny hazanao; ary tsy ho re intsony ny feon’ny irakao.