Mpitsara 12 - Baiboly Katolika

¹ Nivory ny lehilahy amin’i Efraima, ka nandeha nankany Sefôra, nanao tamin’i Jefte hoe: «Nahoana no nandeha niady tamin’ny taranak’i Amôna ianao, ka no tsy mba niantso anay hiaraka aminao? Hodoranay ny tranonao mbamin’ny tenanao».

² Dia izao no navalin’i Jefte azy ireo: «Mbola nifamaly mafy tamin’ny taranak’i Amôna izaho sy ny vahoakako dia efa niantso anareo aho, nefa tsy namonjy ahy tamin’ny tanany ianareo.

³ Nony hitako fa tsy tonga hamonjy ahy ianareo, dia nanao vy very ny aiko aho, ka nandeha niady tamin’ny taranak’i Amôna, ary natolotr’i Iaveh teo an-tanako ireny. Ka nahoana ianareo no miakatra atỳ amiko anio hiady amiko?»

⁴ Dia namory ny lehilahy rehetra amin’i Galaada i Jefte, ka niady tamin’i Efraima. Noresen’ny lehilahin’i Galaada ny an’i Efraima izay efa nilaza nanao hoe: «Ianareo, ry Galaadita, dia mpandositra fotsiny avy amin’i Efraima, ao afovoan’i Efraima sy i Manase».

⁵ Dia azon’i Galaada ny fitàna an’i Jordany ao amin’ny lafin’i Efraima, ka raha misy mpandositra avy amin’i Efraima manao hoe: «Avelao kely aho mba hita», dia anontanian’ny lehilahin’i Galaada izy hoe: «Efraimita va ianao?»Ary mamaly manao hoe: «Tsia.»

⁶ Dia hoy izy ireo manao hoe: «Tonòny àry ny hoe: Skibôleta.» Ary izy kosa manao hoe: «Sibôleta», fa tsy hainy tononina tsara izany; dia samboriny sy vonoiny eo anilan’ny fitàna an’i Jordany. Nisy roa arivo sy efatra alina ny lehilahin’i Efraima maty tamin’izany andro izany.

⁷ Nitsara an’i Israely enin-taona i Jefte; raha efa izany dia maty i Jefte, Galaadita, ka nalevina tao amin’ny anankiray amin’ny tanànan’i Galaada.

9. I ABESANA

⁸ Ary taorian’izy io dia i Abesàna, avy any Betlehema, no mpitsara tamin’i Israely.

⁹ Nanan-janaka telopolo lahy izy; ary zanany vavy telopolo no nampanambadiany tany ivelan’ny fianakaviany; ary ny zanany lahy kosa nangalany zazavavy telopolo avy any ivelany. Nandritra ny fito taona izy no mpitsara tany Israely.

¹⁰ Raha efa izany dia maty i Abesàna ka nalevina tany Betlehema.

10. I AHIALÔNA

¹¹ Taorian’izy io dia i Ahialôna avy any Zabolôna no mpitsara tamin’i Israely.

¹² Raha efa izany dia maty i Ahialôna avy any Zabolôna ka nalevina tao Ajalôna amin’ny tanin’i Zabolôna.

11. I ABDÔNA

¹³ Taorian’izy io, dia i Abdôna, zanak’i Ilela, avy any Faratôna, no mpitsara tamin’i Israely.

¹⁴ Nanan-janaka efapolo lahy sy zafy telopolo lahy izy, izay nitaingina zanak’ampondra telopolo.

¹⁵ Nandritra ny valo taona izy no mpitsara tamin’i Israely.

¹⁶ Raha efa izany dia maty i Abdôna zanak’i Ilela, avy ao Faratôna, ka nalevina tao Faratôna amin’ny tanin’i Efraima any amin’ny tendrombohitry ny Amalesita.