Marka 1 - Baiboly Katolika

I FANOMANANA NY FANDRAHARAHANA HATAON’I JESOA Toritenin’i Joany Batista

¹ Fiandohan’ny Evanjelin’i Jesoa Kristy, Zanak’Andriamanitra.

² Araka izay voasoratra ao amin’i Izaia mpaminany hoe: Indro Aho maniraka ny Anjeliko eo alohanao, izay hamboatra ny làlanao;

³ injay misy feo miantso any an’efitra hoe: «Amboary ny lalan’ny Tompo, ahitsio ny alehany»,

⁴ dia niseho tany an’efitra i Joany Batista nitory batemim-pibebahana ho famelan-keloka.

⁵ Ary nandeha nanatona azy ny tany Jodea rehetra sy ny mponina rehetra tao Jerosalema, ka nataony batemy tamin’ny onin’i Jordany ireo, rehefa niaiky ny fahotany.

⁶ Volon-drameva no nitafian’i Joany, fehikibo hoditra no nanaovany, ary valala sy tantely remby no fihinany; ary izao no notorìny:

⁷ «Avy aoriako Ilay mahery noho izaho, ka tsy mendrika hiondrika hamaha ny fehikapany akory aho.

⁸ Izaho nanao batemy anareo tamin’ny rano, fa Izy kosa hanao Batemy anareo amin’ny Fanahy Masina.»

Nanaovana batemy an’i Jesoa

⁹ Ary tamin’izany andro izany, dia tonga avy any Nazareta tanànan’i Galilea i Jesoa, ka nataon’i Joany batemy tao Jordany.

¹⁰ Raha vao niala avy tao anaty rano Izy, dia nahita ny lanitra nisokatra, sy ny Fanahy Masina nidina tahaka ny voromahailala, nankeo amboniny;

¹¹ ary nisy feo re avy tany an-danitra nanao hoe: «Ianao no Zanako malalako, Ianao no ankasitrahiko.»

Fakam-panahy tany an’efitra

¹² Dia nentin’ny Fanahy ho any an’efitra niaraka tamin’izay Izy,

¹³ ka nitoetra tany efapolo andro dia nalain’i Satana fanahy sy niara-nitoetra tamin’ny bibidia, ary ny Anjely nanompo Azy.

II. NY FANDRAHARAHAN’I JESOA TANY GALILEA Misantatra ny toriteniny i Jesoa

¹⁴ Ary rehefa natao an-tranomaizina i Joany, dia nankany Galilea i Jesoa nitory ny Evanjelin’ny fanjakan’Andriamanitra,

¹⁵ ka nanao hoe: «Tonga ny fotoana, ary efa akaiky ny fanjakan’Andriamanitra; mibebaha ianareo ary minoa ny Evanjely.»

Ny niantsoana ireo mpianatra efatra voalohany

¹⁶ Nony nandalo teny amoron’ny ranomasin’i Galilea Izy, dia nahita an’i Simôna sy i Andre rahalahiny nanarato teo amin’ny ranomasina, fa mpanarato izy ireo.

¹⁷ Ary hoy i Jesoa taminy: «Andeha hanaraka Ahy, fa hataoko mpanarato olona ianareo.»

¹⁸ Dia nandao ny haratony niaraka tamin’izay izy, ka nanaraka Azy.

¹⁹ Nony nandeha kelikely Izy, dia nahita an’i Jakôba zanak’i Zebede sy i Joany rahalahiny, izay teo an-tsambo kely koa, nanamboatra ny haratony.

²⁰ Dia niantso azy niaraka tamin’izay Izy, ka nilaozan’izy mirahalahy teo an-tsambo keliny i Zebede rainy sy ny mpikaramany, fa lasa nanaraka an’i Jesoa izy.

I Jesoa nampianatra tao Kafarnaoma sy nanasitrana olona azon’ny demony

²¹ Ary nankany Kafarnaoma izy ireo, ka ny sabata voalohany ihany dia niditra tao amin’ny sinagoga Izy sy nampianatra ny olona.

²² Dia gaga izy ireo tamin’ny fampianarany, satria nampianatra azy toy ny manana fahefana Izy, fa tsy mba tahaka ny mpanora-dalàna.

²³ Ary tao amin’ny sinagogany dia nisy lehilahy anankiray azon’ny fanahy maloto, ary niantso mafy izy

²⁴ nanao hoe: «Mifampaninona izahay sy ianao, ry Jesoa avy any Nazareta? Tonga hampahita loza anay va Ianao? Fantatro raha Ianao, dia ilay Masin’Andriamanitra.»

²⁵ Fa nandrahona azy i Jesoa nanao hoe: «Mangina, ary mivoaha amin’io lehilahy io.»

²⁶ Ary ny fanahy maloto nampifanintontsintona azy, dia niantso tamin’ny feo mahery ka nivoaka taminy.

²⁷ Gaga ny olona rehetra ka nifampilaza hoe: «Inona ity? Fampianarana vaovao inona re ity? fa ny fanahy maloto avy no didiany ka manaiky Azy.»

²⁸ Dia niely eran’i Galilea rehetra ny lazany.

Ny nanasitranana ny rafozam-bavin’i Simôna

²⁹ Raha vao nivoaka avy tao amin’ny sinagoga izy ireo, dia nankany an-tranon’i Simôna sy i Andre Izy sy i Jakôba ary i Joany.

³⁰ Ary ny rafozam-bavin’i Simôna nandry teo am-pandriana fa nanavy, ka noresahin’izy ireo taminy niaraka tamin’izay.

³¹ Dia nanatona nandray ny tanany i Jesoa sy nanarina azy, dia afaka ny tazony ka nandroso sakafo ho Azy izy.

Fanasitranana maro

³² Nony hariva efa maty masoandro, dia nentina teo aminy ny marary rehetra sy ny azon’ny demony,

³³ ary ny tao an-tanàna rehetra nitangorona teo am-baravarana avokoa.

³⁴ Dia nanasitrana olona maro nararin’ny aretina samihafa Izy, sady nandroaka demony maro, fa tsy navelany hiteny ny demony, satria nahalala Azy.

I Jesoa niala mangina tao Kafarnaoma ary nitety an’i Galilea

³⁵ Nony ampitso nifoha maraina alina koa Izy, dia nivoaka nankany amin’ny tany mangingina, ka nivavaka tany.

³⁶ Dia lasa nitady Azy i Simôna sy ny namany,

³⁷ ka nony nahita Azy dia nilaza taminy hoe: «Tadiavin’ny olona rehetra Ianao.»

³⁸ Fa izao no navaliny: «Andeha isika hankany amin’ny tanàna akaiky, mba hitoriako any koa; fa izany no nivoahako.»

³⁹ Dia lasa Izy nitory tamin’ny sinagogan’ny olona sy eran’i Galilea rehetra, sady nandroaka ny demony.

Fanasitranana ilay boka

⁴⁰ Ary nisy boka anankiray nanatona Azy nandohalika teo anatrehany ka nitaraina taminy nanao hoe: «Raha mety Ianao dia mahay manadio ahy.»

⁴¹ Nangoraka azy i Jesoa ka naninjitra ny tanany, dia nanendry azy sy nanao taminy hoe: «Mety Aho, madiova ianao.»

⁴² Vantany vao niteny Izy, dia niala tamin-dralehilahy ny habokany ka nadio izy.

⁴³ Dia nampandeha azy niaraka tamin’izay i Jesoa sady namepetra azy mafy

⁴⁴ nanao hoe: «Tandremo, aza milaza izany na amin’iza na amin’iza ianao, fa mandehana misehoa amin’ny mpisorona, ary noho ny nanadiovana anao dia manatera ny fanatitra nodidian’i Môizy, mba ho vavolombelona amin’ny vahoaka.»

⁴⁵ Kanjo nony lasa ralehilahy dia nilazalaza sy nampiely izany hatraiza hatraiza, hany ka tsy afa-niditra niharihary tao an-tanàna intsony i Jesoa, fa nitoetra teny ivelany tamin’ny tany mangigina Izy, ary nohatonin’ny olona avy eny tontolo eny.