Lioka 13 - Baiboly Katolika

Fiantsoan’Andriamanitra hibebaka

¹ Tamin’izany andro izany koa no nisy olona sasany tonga nilaza tamin’i Jesoa ny nanjò an’ireo Galileanina, fa nalatsak’i Pilaty niaraka tamin’ny soron’izy ireo ny rany.

² Ary novaliany hoe: «Moa ataonareo fa ireny Galileanina ireny dia mpanota mihoatra noho ny Galileanina rehetra matoa nozoin-doza toy izany?

³ Tsia, hoy Izaho aminareo; fa raha tsy mibebaka ianareo, dia ho very tahaka azy avokoa ianareo rehetra.

⁴ Na moa ataonareo fa ny olona valo ambin’ny folo maty nianjeran’ny tilikambon’i Siloe no meloka noho ny mponina rehetra tao Jerosalema?

⁵ Tsia, hoy Izaho aminareo; fa raha tsy mibebaka ianareo, dia ho very tahaka azy avokoa ianareo rehetra.»

Fanoharana amin’ny aviavy tsy mamoa

⁶ Dia nanao ity fanoharana ity koa Izy: «Nisy lehilahy anankiray nanana aviavy nambolena tamin’ny tanimboalobony, ka nankeo aminy mba hitady voa fa tsy nahita.

⁷ Dia hoy izy tamin’ny mpiasa ny tanimboalobony: ‹Indro efa telo taona izay no tonga mitady voa amin’ity aviavy ity aho, nefa tsy mahita; koa kapao io, fa nahoana no manimba ny tany foana eo?›

⁸ Ary hoy ny mpiasa namaly azy: ‹Aoka re ho eo ihany izy amin’ity taona ity, Tompoko, dia hoevoiko ny fotony sady hasiako zezika;

⁹ angamba hamoa izy, fa raha tsy izany dia hokapainao ihany izy.› »

Ilay vehivavy nanjoko nositranina sabata

¹⁰ Ary nampianatra tao amin’ny sinagoga anankiray i Jesoa indray sabata.

¹¹ Ka nisy vehivavy anankiray teo azon’ny demony hatramin’ny valo ambin’ny folo taona, ka efa nataony saozanina sy nanjoko tsy afa-nitraka mihitsy.

¹² Nony nahita azy i Jesoa dia niantso azy ka nanao taminy hoe: «Ravehivavy, afaka ny aretinao.»

¹³ Dia nametrahany tanana izy, ka nitraka niaraka tamin’izay, sy nankalaza an’Andriamanitra.

¹⁴ Fa sosotra ny lehiben’ny sinagoga noho i Jesoa nanasitrana tamin’ny andro sabata, ka niloa-bava tamin’ny vahoaka nanao hoe: «Henemana no andro azo iasana ka tongava hositranina amin’ireo ianareo, fa aza amin’ny andro sabata.»

¹⁵ Fa hoy ny navalin’ny Tompo azy: «Ry mpihatsaravelatsihy, moa tsy samy mamaha ny ombiny na ny ampondrany hiala amin’ny tranony avy ianareo, ka mitondra azy hisotro rano na dia sabata aza ny andro?

¹⁶ Ary ity zanaka vavin’i Abrahama izay efa nafatotr’i Satana hatramin’ny valo ambin’ny folo taona ity ve tsy tokony hovahana amin’izany fatorana izany amin’ny andro sabata?»

¹⁷ Tamin’Izy niteny izany, izay rehetra nanohitra Azy dia nangaihay foana, fa ny vahoaka rehetra kosa nifaly noho ny zavatra malaza rehetra nataony.

Fanoharana amin’ny voan-tsinapy

¹⁸ Dia hoy koa i Jesoa: «Ny inona no tahaka ny fanjakan’Andriamanitra, ary ny inona no hanoharako azy?

¹⁹ Tahaka ny voan-tsinapy izy, izay nalain’ny olona ka namboleny tamin’ny tanimboliny, dia nitombo ka tonga hazo ary nitoeran’ny voromanidina ny rantsany.»

Fanoharana amin’ny lalivay

²⁰ Dia hoy indray Izy: «Inona no hanoharako ny fanjakan’Andriamanitra?

²¹ Tahaka ny lalivay izay nalain’ny vehivavy anankiray izy, ka nampifangaroiny tamin’ny lafarina intelon’ny famarana mba hampibohaka ny koban-dafarina rehetra.»

Ny varavarana ety; ny Jody tsy mino ailika, ny tsy mpino antsoina

²² Dia nitety ny tanàna sy ny vohitra Izy ka nampianatra sy nandroso ho any Jerosalema.

²³ Ary nisy olona anankiray nanontany Azy hoe: «Tompoko, moa dia vitsy ihany no ho voavonjy?» Ka hoy Izy tamin’ny olona:

²⁴ Mikeleza aina hiditra amin’ny varavarana ety; fa lazaiko aminareo fa maro no hitady hiditra nefa tsy ho afaka.

²⁵ Satria rehefa hitsangana manidy ny varavarana ny tompon-trano no tavela any alatrano ianareo ka handondòna ny varavarana hanao hoe: Tompoko, vohay izahay, dia hovaliany hoe: Tsy fantatro izay niavianareo

²⁶ Ary amin’izay ianareo dia hanao hoe: Nihinana sy nisotro teo anatrehanao izahay, ary nampianatra teny amin’ny kianjanay Ianao.

²⁷ Fa hovaliany hoe: Lazaiko aminareo fa tsy fantatro izay niavianareo; mialà amiko ianareo rehetra mpanao ratsy.

²⁸ Ary amin’izay vao hisy fitomaniana sy fikitroha-nify, rehefa hitanareo eo amin’ny fanjakan’Andriamanitra i Abrahama sy i Isaaka ary i Jakôba mbamin’ny mpaminany rehetra, fa ianareo kosa ho voaroaka any ivelany.

²⁹ Hisy olona avy any atsinanana sy andrefana, ary avy any avaratra sy atsimo, hipetraka hihinana eo amin’ny fanjakan’Andriamanitra.

³⁰ Ary indro hisy farany izay ho voalohany, ary hisy voalohany izay ho farany.

I Herôda, amboadia

³¹ Tamin’izay andro izay ihany dia nisy Farisianina sasany nanatona Azy, ka nanao taminy hoe: «Mandehana miala eo ianao, fa tadiavin’i Herôda hovonoina.»

³² Dia hoy Izy tamin’ireo: «Mandehana lazao amin’izany amboadia izany hoe: ‹Indro mandroaka demony sy manasitrana marary aho anio sy rahampitso, fa amin’ny andro fahatelo vao ho tanteraka ny amiko.›

³³ Kanefa tsy maintsy tohiziko ihany ny diako anio sy rahampitso ary rahafakampitso; satria tsy mety raha mpaminany ka dia hovonoina ivelan’i Jerosalema.»

Antso mivantana amin’i Jerosalema

³⁴ «Ry Jerosalema, ry Jerosalema, izay mamono ny mpaminany sy mitora-bato izay irahina aminao, impiry re no nitadiavako hamory ny zanakao tahaka ny reniakoho mambomba ny zanany eo ambany elany, fa tsy nety ianao!

³⁵ Ary indro fa havela aminareo ny tranonareo. Fa lazaiko aminareo fa tsy hahita Ahy intsony ianareo ambara-pilazanareo hoe: ‹Hohasoavina anie Ilay avy, amin’ny Anaran’ny Tompo.› »