Josoa 12 - Baiboly Katolika

9. FAMERENANA FOHIFOHY NY TANTARA Ireo mpanjaka resy, tao atsinanan’i Jordany

¹ Ireto no mpanjakan’ny tany resin’ny zanak’i Israely, ary nalainy ny taniny any an-dafin’i Jordany any atsinanana, hatramin’ny ranon-driakan’i Arnôna ka hatramin’ny tendrombohitra Hermôna, sy ny Arabaha manontolo any atsinanan’ny ony:

² i Sehôna mpanjakan’ny Amôreana, izay nonina tao Hesebona; ny takatry ny fahefany dia hatrany Arôera, eo amin’ny ranon-driakan’i Arnôna, ary hatreo am-pamatonan’ny lohasaha amin’ny antsasak’i Galaada, ka hatramin’ny ranon-driakana Jaboaka, faritry ny tanin’ny taranak’i Amôna,

³ amin’ny Arabaha, hatrany amin’ny ranomasina Kenereta any atsinanana, sy amin’ny ranomasin’ny Arabaha dia ny Ranomasin-tSira any atsinanana, amin’ny lalana mankany Betisimota; ary amin’ny ilany atsimo dia hatrany am-pototry ny kisolosolon’i Fasgà.

⁴ Ny tanin’i Oga, mpanjakan’i Basàna, isan’ny sisan’ny Refaima nonina tao Aztarôta sy Edraia:

⁵ ny takatry ny fahefany dia ny tendrombohitra Hermôna, Salekà, Basàna rehetra, hatramin’ny faritry ny tanin’ny Gesorima sy ny Makatianina ary ny antsasak’i Galaada, faritanin’i Sehôna mpanjakan’i Hesebona.

⁶ I Môizy mpanompon’i Iaveh sy ny zanak’i Israely no nandresy an’ireo; ary ny Robenita sy ny Gadita, mbamin’ny antsasaky ny fokon’i Manase no nomen’i Môizy mpanompon’i Iaveh ny tanin’izy ireo mba ho fananany.

Ireo mpanjaka resy, tao andrefan’i Jordany

⁷ Ireto kosa ny mpanjaka resin’i Jôsoe sy ny zanak’i Israely atỳ an-dafin’i Jordany, atỳ andrefana, hatramin’i Baala-Gada, amin’ny lohasahan’i Libàna, ka hatramin’ny tendrombohitra mangadihady misondrotra mankany Seira. Nomen’i Jôsoe ny fokon’i Israely, araka ny fianakaviany avy, izany tany izany, ho fananany,

⁸ dia ny any amin’ny tendrombohitra, ny any amin’ny tany iva, ny any amin’ny havoana, ny any an’efitra ary ny any amin’i Negeba, izay tanin’ny Heteanina, ny Amôreana, ny Kananeanina, ny Ferezeanina, ny Heveanina, ary ny Jeboseanina.

⁹ Ny mpanjakan’i Jerikô, iray; ny mpanjakan’i Haia akaikin’i Betela, iray;

¹⁰ ny mpanjakan’i Jerosalema, iray; ny mpanjakan’i Hebrôna, iray;

¹¹ ny mpanjakan’i Jerimota, iray; ny mpanjakan’i Lakisa, iray;

¹² ny mpanjakan’i Eglôna, iray; ny mpanjakan’i Gazera, iray;

¹³ ny mpanjakan’i Dabira, iray; ny mpanjakan’i Gadera, iray;

¹⁴ ny mpanjakan’i Hermà, iray; ny mpanjakan’i Hedera, iray;

¹⁵ ny mpanjakan’i Lebnà, iray; ny mpanjakan’i Odolama, iray;

¹⁶ ny mpanjakan’i Makedà, iray; ny mpanjakan’i Betela, iray;

¹⁷ ny mpanjakan’i Tafnà, iray; ny mpanjakan’i Ofera, iray;

¹⁸ ny mpanjakan’i Afeka, iray; ny mpanjakan’i Lasarôna, iray;

¹⁹ ny mpanjakan’i Madôna, iray; ny mpanjakan’i Asôra, iray;

²⁰ ny mpanjakan’i Semerona, iray; ny mpanjakan’i Aksafa, iray;

²¹ ny mpanjakan’i Tanàka, iray; ny mpanjakan’i Magedao, iray;

²² ny mpanjakan’i Kadesa, iray; ny mpanjakan’i Jakanàna any Karmela, iray;

²³ ny mpanjakan’i Dôra, eo amin’ny havoanan’i Dôra, iray, ny mpanjakan’i Gôjima, ao Galgalà, iray; ny mpanjakan’i Tersà, iray;

²⁴ totaliny, mpanjaka 31.