Fitomaniana 5 - Baiboly Katolika

FITOMANIANA FAHADIMY

¹ Tsarovy ny nanjò anay, ry Iaveh ô, jereo sy diniho ity fahafaham-barakanay.

² Ny lovanay, lasan’ny hafa firenena, ny tranonay, lasan’ny olon-tsy fantatra.

³ Kamboty tsy manan-dray izahay, toy ny mpitondratena ny reninay.

⁴ Mividy vola izahay vao misotro ny ranonay, mikarama vao mahazo kitay.

⁵ Ny mpanenjika anay mandodona anay avy ao aoriana; ka reraka, tsy mahita hiainana izahay.

⁶ Mananty tanana amin’i Ejipta sy amin’i Asiria izahay, hivoky mofo.

⁷ Nanota ny razanay, tsy eo intsony anefa izy, ka izahay ity no mivesatra ny helony.

⁸ Andevo no manapaka anay, tsy misy olona manafaka anay amin’ny tanan’ireo.

⁹ Manao vy very ny ainay hahazoanay hanina eo anoloan’ny sabatry ny efitra.

¹⁰ Mahamay, hoatra ny lafaoro, ny hoditray, noho ny hamafin’ny hanoanana.

¹¹ Nosavihin’izy ireo ny vehivavy tao Siôna, mbamin’ny virjiny tamin’ny tanànan’i Jodà.

¹² Misy mpanapaka nahanton’ny tanan’izy ireo, ny tavan’ny anti-panahy tsy nasiany hajany,

¹³ ny zatovo nitondra ny fikosoham-bary; ny ankizy nivembena, mivesatra hazo.

¹⁴ Ny loholona nitsahatra tsy nankeny am-bavahady intsony; ary ny zatovo tsy nitendry ny valihany intsony.

¹⁵ Nitsahatra ny fifalian’ny fonay; niova ho fisaonana ny dihinay.

¹⁶ Nianjera ny satroboninahitry ny lohany; eny, loza ho anay, fa nanota izahay!

¹⁷ Izao no antony raha marary ny fonay, izao no antony raha nihamaizina ny masonay.

¹⁸ dia satria lao ny tendrombohitra Siôna, ka ny amboadia no mikarenjy ao.

¹⁹ Ianao, ry Iaveh, dia ao amin’ny fiketrahanao mandrakizay; ny seza fiandriananao maharitra amin’ny taona mifandimby!

²⁰ Ahoana no dia hanadinoanao anay mandrakizay, dia handao anay amin’ny andro lava toy izao?

²¹ Ampivereno aminao izahay, ry Iaveh, dia hiverina, havaozy ny andronay toy ny fahiny indray.

²² Fa dia narianao tokoa va izahay, sy ho tezitra tsy an’erany aminay va Ianao?