2Samoela 22 - Baiboly Katolika

Salamon’i Davida

¹ Izao no tenin’ny tononkira nataon’i Davida tamin’i Iaveh tamin’ny andro namonjen’i Iaveh azy, tamin’ny tanan’ny fahavalony rehetra sy tamin’ny tanan’i Saola.

² Hoy izy: «I Iaveh no harambatoko sy trano mimandako ary Mpamonjy ahy.

³ Andriamanitra no vatolampiko izay ahitako fialofana. Izy no ampingako sy tandrom-pamonjena ahy, toerana avo fandosirako sy fialofako. Ry Mpamonjiko ô, Ianao no nahafaka ahy tamin’ny fahasiahana.

⁴ Nantsoiko Ilay mendrika hoderaina, dia i Iaveh, ka afaka tamin’ny fahavaloko aho.

⁵ Fa ny onjam-pahafatesana efa nanodidina ahy; ny riakan’i Beliala efa nampitahotra ahy;

⁶ ny fatoran’ny fonenan’ny maty efa nahasingotra ahy, ny haratom-podiamandry efa nalatsaka teo anatrehako.

⁷ Niantso an’i Iaveh tao anatin’ny fahoriako aho ary nandefa fitarainana nankany amin’ny Andriamanitro, ka reny tao an-tempoliny ny feoko tonga tao an-tsofiny ny fitarainako.

⁸ Dia nihozongozona sy nihorohoro ny tany, nihovotrovotra koa ny fanorenan’ny lanitra, ary ireo no nihozongozona dia satria tezitra i Iaveh

⁹ ka nivoa-tsetroka ny vavorony, nivoaka afo mandevona ny vavany, ary nisy vain’afo mivaivay nipitika avy ao aminy.

¹⁰ Naronany ny lanitra dia nidina Izy, ka rahona matevina no teo ambanin’ny tongony.

¹¹ Nitaingina kerobima Izy dia nanidina, ary niseho teo ambonin’ny ela-drivotra.

¹² Nahodidina azy toy ny lay ny haizina, mbamin’ny ranobe aman-drahona matevina.

¹³ Avy ao amin’ny famirapiratana nialoha Azy nisy vain’afo nipitika.

¹⁴ Nandefa kotroka avy any an-danitra i Iaveh ary nampanakoako ny feony, ny Avo indrindra.

¹⁵ Dia nandefa zana-tsipìka ka nampihahaka azy ireo Izy, nandefa ny varatra ka nampisaritaka an’ireny.

¹⁶ Niseho tamin’izay ny ambanin’ny ranomasina, nihanjahanja ny fiorenan’ny tany, tamin’ny fandrahonana nataon’i Iaveh, tamin’ny fifofofofon’ny fofon’ain’ny vavorony.

¹⁷ Naninji-tanana avy any ambony Izy, dia nandray ahy, nanintona ahy hiala amin’ny rano be.

¹⁸ Nanafaka ahy tamin’ny fahavaloko mahery, tamin’ireo nankahala ahy fony izy ireo nahery noho izaho.

¹⁹ Nosovohin’ireny aho tamin’ny andro nahitako loza, I Iaveh no nanohana ahy.

²⁰ Napetrany eo amin’ny malalaka aho, ary novonjeny, satria sitrany.

²¹ Namaly soa ahy araka ny fananako ny rariny i Iaveh, namaly ahy araka ny hadiovan’ny tanako.

²² Fa nanaraka ny lalan’i Iaveh aho, ary tsy nanao ny ratsy izay hanalavirako ny Andriamanitro.

²³ Ny fitsipiny rehetra dia teo anatrehako, ary ny lalàny tsy mba nihatahako.

²⁴ Tsy nanan-tsiny taminy aho, ary nitandrina mba hanohitra ny haratsiako.

²⁵ Namaly ahy araka ny fananako ny rariny i Iaveh, sy araka ny fahadiovako eo imasony.

²⁶ Ny tsara, isehoanao ho tsara, ny olo-marina isehoanao ho marina,

²⁷ Ny madio isehoanao ho madio fa ny fetsy ratsy anaovanao an-kafetsena.

²⁸ Ny vahoaka manetry tena vonjenao, fa ny mpiavonavona kosa aetrinao amin’ny fanandrinanao.

²⁹ Fa ianao no faniloko, ry Iaveh ô! I Iaveh no manazava ny haizina momba ahy.

³⁰ Manana Anao aho, ka mahatsarapaka hamely ny antoko-miaramila àry fiadiana; manana an’Andriamanitra aho, ka mahatsambikina mihoatra ny manda.

³¹ Andriamanitra! ...lavorary ny lalany. Ny tenin’Andriamanitra dia fantatra ho to; ampinga izy ho an’izay rehetra matoky azy.

³² Fa iza no Andriamanitra raha tsy i Iaveh ary zovy no vatolampy afa-tsy ny Andriamanitsika?

³³ Andriamanitra no trano mimandako mahery, mitondra ny olo-marina amin’ny lalany Izy.

³⁴ Ny tongotro ampanahafiny ny an’ny serfavavy, ary ajorony aho eo amin’ny fitoerako avo.

³⁵ Mampianatra ny tanako hiady Izy ka mahahenjana tsipìka varahina ny sandriko.

³⁶ Nomenao ahy ny ampinga famonjenao, ary ny hamoram-ponao no miasa manalehibe ahy.

³⁷ Nohalalahinao ny diako teo ambaniko, ka tsy mangozohozo akory ny tongotro.

³⁸ Manenjika ny fahavaloko aho, dia mandringana Izy; ary tsy miverina raha tsy ripaka ireny.

³⁹ Ataoko levona, ataoko montsana ireny, ka tsy maharina, mifitsaka ao ambanin’ny tongotro.

⁴⁰ Sikinanao hery aho hiady; ary aforitrao ao ambaniko izay mandrafy ahy.

⁴¹ Ny fahavaloko ataonao miamboho ahy, mbamin’izay mankahala ahy koa, handringanako azy.

⁴² Miherikerika ireny fa tsy misy mamonjy! Mitaraina amin’i Iaveh fa tsy valiany akory!

⁴³ Ka torotoroiko hoatra ny vovo-tany izy; hoseko sy hitsahiko hoatra ny fotaka eny amin’ny arabe.

⁴⁴ Manafaka ahy amin’ny fikomian’ny vahoakako Ianao, ary mitahiry ahy ho filohan’ny firenen-tsamihafa, ka manaiky ho mpanompoko ny vahoaka tsy fantatro.

⁴⁵ Ny zanak’olon-kafa firenena midoka ahy; raha vao mandre dia manoa ahy izy.

⁴⁶ Reraka ambony ihany ny zanak’olon-kafa firenena, ka mivoaka amin-kovitra avy ao amin’ny trano mimandany.

⁴⁷ Ho velona anie i Iaveh ary hankalazaina anie ny Vatolampiko! Andriamanitra vatolampy fialofako, hankalazaina anie Izy!

⁴⁸ Andriamanitra izay mamaly faty noho ny amiko, sy mampitambotsotra ny firenena eo ambanin’ny tongotro,

⁴⁹ sy mampitsoaka ahy ho afaka amin’ny fahavaloko; Ianao manandratra ahy ho ambonin’izay mandrafy ahy, ary namonjy ahy tamin’ny olona mpanao an-keriny.

⁵⁰ Izany, ry Iaveh ô, no hiderako Anao eo amin’ny firenena, sy hihiràko ny voninahitry ny Anaranao.

⁵¹ Manao famonjen-dehibe ho an’ny mpanjakany Izy, ary manome famindram-po amin’ilay voahosony, dia amin’i Davida sy ny taranany mandrakizay.»