1Tantara 9 - Baiboly Katolika

I Jerosalema tanànan’i Israely, tanàna masina

¹ Voasoratra amin’ny tetiaram-pirazanana avokoa izany i Israely rehetra, ka indreto izy voasoratra ao amin’ny bokim-panjakan’i Israely; ary nenti-ko babo tany Babilôna i Jodà, noho ny fahotany.

Nehemia 11,3-19

² Ny mponina voalohany, nonina tamin’ny taniny, tamin’ny tanànany, dia ny Israelita, ny Mpisorona, ny Levita, ary ny Natineanina.

³ Nisy nonina tao Jerosalema ny taranak’i Jodà, ny taranak’i Benjamina, ny taranak’i Efraima, sy i Manase,

⁴ ny taranak’i Faresa zanak’i Jodà: i Oteì zanak’i Amioda, zanak’i Amrỳ zanak’i Omraỳ zanak’i Bonì.

⁵ Ny tamin’ny Silônita: i Asaià, lahy matoa sy ny zanany lahy.

⁶ Ny tamin’ny taranak’i Zarà: i Jehoela sy ny rahalahiny, 690 izy.

⁷ Ny tamin’ny taranak’i Benjamina: i Salò, zanak’i Mosolama zanak’i Odoià zanak’i Asàna;

⁸ i Jobanià, zanak’i Jerôhama i Elà zanak’i Ozỳ zanak’i Mokorỳ, i Mosolama zanak’i Safatià zanak’i Rahoela zanak’i Jebanià,

⁹ ary ny rahalahin’izy ireo, araka ny taranany dia 956. Samy loham-pianakaviana, araka ny fokom-pianakaviany avy, ireo lehilahy rehetra ireo.

¹⁰ Ny tamin’ny mpisorona: i Jedaià, i Joiariba, i Jakima,

¹¹ i Azariasa zanak’i Helkiasa zanak’i Mosalama zanak’i Sadaoka zanak’i Maraiôta zanak’i Akitoba, mpanapaka ny tranon’Andriamanitra;

¹² i Adaiasa zanak’i Jerôhama zanak’i Fasora zanak’i Melkiasa; i Maasaì zanak’i Adiela zanak’i Jezrà zanak’i Mosolama zanak’i Mosolamita zanak’i Emera;

¹³ ary ny rahalahin’izy ireo, izay loham-pianakaviany avy, dia nisy lehilahy mahery 1.760 mba hanatanteraka ny fanompoana ao amin’ny tranon’Andriamanitra.

¹⁴ Ny tamin’ny Levita: i Semeià zanak’i Hasoba zanak’i Ezrikama zanak’i Hasebià, tamin’ny taranak’i Merarì;

¹⁵ i Bakbakara, i Heresa, i Galala, i Matanià, zanak’i Mikà zanak’i Zekri zanak’i Asafa;

¹⁶ i Obadià zanak’i Semeià zanak’i Galala zanak’Iditona; i Barakià zanak’i Asà zanak’i Elkanà, izay nonina tao an-tanànan’ny Netôfatianina.

¹⁷ Ary ny mpiandry varavarana: i Seloma, i Akoba, i Telmôna, i Ahimàna, mbamin’ny rahalahin’ireo; i Seloma no lehibe,

¹⁸ ary mbola ao am-bavahadin’ny mpanjaka, eo atsinanana izy mandrak’androany. Ireo no mpiandry varavarana tamin’ny tobin’ny taranak’i Levì.

¹⁹ I Seloma zanak’i Kôre zanak’i Abiasafa zanak’i Kôre, mbamin’ny Kôreita rahalahiny amin’ny fianakavian-drainy, no nanao ny raharahan’ny mpiandry ny varavaran’ny tabernakla; ny razan’izy ireo no efa niandry ny vavahadin’ny tobin’i Iaveh.

²⁰ I Finea zanak’i Eleazara, no mpanapaka azy ireo taloha, ary nomban’i Iaveh izy.

²¹ I Zakaria, zanak’i Mosolamia, no mpiandry ny varavaran’ny trano lay fihaonana.

²² 212 no isan’ireo olom-boafidy ho mpiandry varavarana ireo. Voasoratra amin’ny vohiny avy izy, ary i Davida sy i Samoela mpahita no nanendry azy hanao io raharaha io.

²³ Izy ireo sy ny taranany no tao amin’ny varavaran’ny tranon’i Iaveh, ny tranon’ny tabernakla, mba hiandry azy.

²⁴ Nitoetra teo amin’ny lafiny efatra ny mpiandry varavarana, dia teo atsinanana sy andrefana, ary avaratra sy atsimo.

²⁵ Ny rahalahin’izy ireo, izay nonina tany amin’ny vohiny, dia tsy maintsy mankeo aminy indraindray, ka maharitra herinandro eo.

²⁶ Fa izy efa-dahy lohan’ny mpiandry varavarana, izay Levita, dia teo amin’ny raharahany hatrany, sady mbola nitandrina ny efitrano sy ny rakitra tao an-tranon’Andriamanitra.

²⁷ Nitoetra teo amin’ny manodidina ny tranon’Andriamanitra izay nambenany izy, ka tsy maintsy tandremany ny hamohana azy isa-maraina.

²⁸ Ny Levita sasany kosa, nitandrina ny fanaka momba ny fanompoana, ka navoakany sy nampidiriny ireny ny sady nisainy koa.

²⁹ Ny sasany aminy, nitandrina ny fanaka, dia ny fanaka rehetra teo amin’ny fitoerana masina, mbamin’ny lafarina tsara indrindra, ny divay, ny diloilo, ny emboka, ary ny zava-manitra.

³⁰ Nisy zanaky ny mpisorona nangaroharo ny zava-manitra tsara fofona.

³¹ Ny anankiray amin’ny Levita, dia i Matatiasa lahy matoan’i Seloma, i Kôreita, no tonian’ny mofomamy nendasina tamin’ny lapoaly.

³² Ary ny rahalahiny sasany, amin’ny taranak’i Kaata, no niadidy ny fanamboarana ho amin’ny isan-tsabata, ny mofo alahatra.

³³ Ireo no mpihira, lohan’ny fianakavian’ny Levita nitoetra tamin’ny efitrano, afaka tamin’ny raharaha hafa, satria tsy maintsy eo amin’ny raharahany andro aman’alina.

³⁴ Ireo no lohan’ny fianakavian’ny Levita, filohany araka ny taranany, ary nonina tao Jerosalema.

9. I SAOLA MPANJAKA TALOHAN’I DAVIDA Ny niandohan’i Saola

³⁵ Tao Gabaôna no nonenan’i Jehiela, rain’i Gabaôna, i Maakà no anaran’ny vadiny.

³⁶ Ary i Abdôna no zanany lahy matoa, dia i Sora, i Kisa, i Baala, i Nera, i Nadaba,

³⁷ i Gedôra, i Ahiao, i Zakaria, ary i Mekalôta.

³⁸ I Make lôta niteraka an’i Samaana. Nitoetra teo anilan’ny rahalahiny koa izy ireo tao Jerosalema niaraka tamin’ny rahalahiny.

³⁹ I Nera niteraka an’i Kisa, i Kisa niteraka an’i Saola, i Saola niteraka an’i Jonatàna, i Melkisa, i Abinadaba, ary i Esbaala.

⁴⁰ Zanaka lahin’i Jonatàna: i Meribaala niteraka an’i Mikà,

⁴¹ zanaka lahin’i Mikà: i Fitôna, i Meleka, i Taraà.

⁴² I Akaza niteraka an’i Jarà, i Jarà niteraka an’i Alamata, i Azmota ary i Zamrì; i Zamrì niteraka an’i Mosà.

⁴³ I Mosà niteraka an’i Banaà, i Rafaià zanany, i Elasà zanany, i Asela zanany.

⁴⁴ Nanan-janaka enin-dahy i Asela, ka ireto no anarany avy: Ezrikama, Bôkrao, Ismaela, Sarià, Obadià, ary Hanàna. Ireo no zanaka lahin’i Asela.