Joela 2:23 - Baiboly Katolika

²³ Ary ianareo, ry zanak’i Siôna, aoka hientan-kafaliana sy ho ravoravo ao amin’i Iaveh Andriamanitrareo; fa ny mpampianatra efa nomeny anareo hanoro ny marina, ny andro alatsany ho anareo, dia ny fara orana sy ny loha orana, toy ny taloha indray.

Baiboly Protestanta Malagasy 2011

²³ Ary ianareo, ry zanak’i Ziona, dia miravoravoa sy mifalia amin’NY TOMPO Andriamanitrareo; fa hanome anareo ny lohaorana amin’ny fotoanany Izy ary handatsaka ranonorana mivatravatra ho anareo, dia ny lohaorana sy ny faraorana toy ny taloha.

DIEM PROTESTANTA

²³ Ary ianareo, ry mponin’i Tsiôna, miravoravoa sy mifalia amin’ny TOMPO Andriamanitrareo, fa ny oram-pararano sahaza no omeny anareo; alatsany aminareo toy ny fahiny koa ny ranonorana mivatravatra, dia ny oran-dohataona sy ny oran-dririnina.

Dikateny Iombonana Eto Madagasikara

²³ Ary ianareo, ry mponin’i Tsiôna, miravoravoa sy mifalia amin’ny TOMPO Andriamanitrareo, fa ny oram-pararano sahaza no omeny anareo; alatsany aminareo toy ny fahiny koa ny ranonorana mivatravatra, dia ny oran-dohataona sy ny oran-dririnina.

Baiboly Protestanta Malagasy

²³ Ary hianareo, ry zanak’i Ziona, miravoravoa Sy mifalia amin’i Jehovah Andriamanitrareo; Fa hanome anareo ny loha-orana onony Izy, Dia handatsaka ranonorana mivatravatra ho anareo, Eny, ny loha orana sy ny fara-orana aloha.

Malagasy Bible

²³ Ary ianareo, ry zanak'i Ziona, miravoravoa sy mifalia amin'i Jehovah Andriamanitrareo; Fa hanome anareo ny loha-orana onony Izy, dia handatsaka ranonorana mivatravatra ho anareo, eny, ny loha-orana sy ny fara-orana aloha.

La Bible en Malgache

²³ Ary ianareo, ry zanak’i Ziona*, dia miravoravoa sy mifalia amin’NY TOMPO Andriamanitrareo; fa hanome anareo ny lohaorana amin’ny fotoanany Izy ary handatsaka ranonorana mivatravatra ho anareo, dia ny lohaorana sy ny faraorana toy ny taloha.

Joela 2:23 Rohy Ifampitohizana

1Mpanjaka 8:36

dia mihainoa azy Ianao any an-danitra ka avelao ny fahotan’ny mpanomponao sy i Israely vahoakanao sady manoroa azy ny lalana tsara tsy maintsy alehany, ary alatsaho ny ranonorana amin’ny tany nomenao ny vahoakanao ho lovany.

Joba 33:23

Raha mahita ho mpanalalana anefa izy, anjely iray amin’ny arivo izay hampahalala ny olombelona ny tsy maintsy ataony,

Joba 37:13

Ka mbetika ny mba hanasazy ny taniny, mbetika ho mariky ny fanambinany no anirahany azy ireny.

Salamo 104:34

Ho sitrany anie ny hirako, fa izaho, dia i Iaveh no nataoko fifaliako.

Salamo 147:8

Fa saronany rahona ny lanitra, ary ny tany amonònany ranonorana; mampaniry ahitra ny tendrombohitra Izy.

Salamo 149:2

Hifaly amin’ny Mpahary azy anie i Israely, hientan-karavoana amin’ny Mpanjakany anie ny zanak’i Siôna!

Salamo 28:7

I Iaveh no heriko sy ampingako; Izy no nitokian’ny foko. Efa voavonjy aho. Ka misomebin-kafaliana ny foko. Ka hidera Azy amin’ny hirako aho.

Salamo 32:11

Mifalia sy miravoravoa amin’i Iaveh ianareo olo-marina, Manaova hobin-kafaliana ianareo mahitsy fo rehetra!

Salamo 84:6

Sambatra izay olona manana ny heriny ao aminao; tsy mihevitra afa-tsy ny fiakarana masina izy.

Ohabolana 16:15

Mampiaina ny fahamiramirànan-tarehin’ny mpanjaka; ary toy ny oran-dohataona ny fanambinany.

Isaia 30:21

Ary handre sofina ny feo hilaza ao ivohonao hoe: - Ity no lalana, ka ombao io! - dia raha ianareo hivily na ho ankavanana na ho ankavia.

Isaia 30:23

Ny Tompo handefa ny ranonorany amin’ny voa nafafinao amin’ny tany, ary ny tany hahavokatra mofo, tsara tokoa sady betsaka, amin’izany andro izany ny biby fiompinareo hihinana eny amin’ny tany fiandrasana malalaka:

Isaia 41:16

Hokororohinao izy, ka hopaohin’ny rivotra, sy haelin’ny ranonoram-baratra. Fa ianao kosa hientan-kafaliana amin’i Iaveh, ary ilay Masin’i Israely no hireharehanao.

Isaia 61:10

Ho revon-kafaliana eo amin’i Iaveh aho, ary hiravoravo amin’ny Andriamanitro ny foko, satria notafiany fitafiam-pamonjena aho, ary nakanjoiny akanjom-pahamarinana, toy ny mpampakatra miravaka diadema eo an-dohany; toy ny ampakarina miraratra ny firavany sarobidy.

Jeremia 3:3

ka voasakana ny oram-pararano tsy nisy ny oran-dohataona. Nefa handrim-behivavy janga ny anao, ka tsy nety nahalala menatra ianao.

Jeremia 5:24

Fa tsy mba manao anakam-po hoe: Aoka isika hatahotra an’i Iaveh Andriamanitsika, izay mandatsaka ny ranonorana, dia ny loha orana sy ny fara orana, amin’ny fotoany avy, sady mitandrina ho antsika ireo herinandro voatendry ho fararano.

Fitomaniana 4:2

Ireo zanaka lahin’i Siôna, miendrik’andriana indrindra, voatombana an-danjam-bolamena madio, ka ahoana no natao toy ny vilany tany, asan-tanan’ny mpanefy vilany?

Ezekiela 34:26

Hataoko fitahiana izy sy ny manodidina ny havoanako; halatsako aminy fotoany ny ranonorana, dia ho ranonoram-pitahiana izany.

Hosea 6:3

Rehefa afaka indroa andro dia hataony velona indray isika; amin’ny andro fahatelo dia hatsangany isika, ka ho velona eo anatrehany. Mahalalà isika, mikeleza aina hahalala an’i Iaveh isika. Mahatoky, toy ny an’ny maraina, ny fiposahany; ary ho avy amintsika toy ny tandrifin-drahona toy ny fara orana manamando ny tany.

Levitikosy 26:4

dia halatsako amin’ny fotoany ny orana ho anareo; hahavokatra ny tany; hamoa ny hazo eny an-tsaha.

Amosa 4:7

Koa ny orana nahantoko tsy ho aminareo, raha mbola telo volana sisa vao ho fararano; tamin’ny tanàna iray nataoko avy ny orana; fa tamin’ny tanàna iray hafa kosa, tsy nalatsako ny orana; ny faritany iray tondrahan’ny orana; fa ny faritany iray hafa kosa, izay tsy nilatsahan’ny orana, dia nihamaina.

Zakaria 10:1

Mangataha amin’i Iaveh ny ranonorana amin’ny lohataona. Satria fa i Iaveh no manao ny helatra; ka homeny ranonorana be izy ireo, ary ahitra, eny an-tsahan’izy rehetra tsirairay avy.

Zakaria 10:7

Fa toy ny mpiady mahery, ry zareo Efraima, hifaly toy ny fifaliana amin’ny divay ny fony; hahita izany ireo zanany, ka hiravoravo, ary hientan-kafaliana amin’i Iaveh ny fon’izy ireo!

Zakaria 9:13

Fa henjaniko ho Ahy i Jodà, ary ataoko amin’ny tsipìka i Efraima. Hamporisika ny zanakao Aho, ry Siôna, hiady amin’ny zanakao, ry Javàna, ary hataoko toy ny sabatry ny lehilahy mahery ianao.

Zakaria 9:9

Mifalia amin’ny hafaliana lehibe, ry zanaka vavin’i Siôna! Manaova feo firavoravoana, ry zanaka vavin’i Jerosalema. Fa indro ny Mpanjakanao avy ho atỳ aminao; marina izy sady arovan’Andriamanitra; manetry tena mitaingina ampondra dia ampondra tanora, zanak’ampondravavy.

Asan’ny Apostoly 14:17

Fa na dia izany aza no tenin’izy roa lahy, dia saiky tsy nahasakana ny vahoaka tsy hanao sorona taminy izy.

Deoteronomia 11:14

dia rotsahako ranonorana ny taninareo amin’ny fotoana, na loha-orana na fara-orana, ary ianao hanangona ny varinao sy ny divainao vaovao ary ny diloilonao;

Deoteronomia 28:12

Hovohan’i Iaveh ho anao ny raki-tsoany, dia ny lanitra, handatsahany ny ranonorana amin’ny fotoany eo amin’ny taninao, sy hitahiany ny asan-tananao rehetra. Firenena maro no hampisamboranao, fa ianao kosa tsy mba hisambotra.

Deoteronomia 32:2

Aoka hirotsaka toa ranonorana ny fampianarako; ary hilatsaka tahaka ny ando ny teniko, dia tahaka ny tandrifin-drahona amin’ny zava-maitso, toy ny rano mitete amin’ny ahi-maitso.

Filipiana 3:1

Farany, ry kristianina havana, mifalia ao amin’ny Tompo. Tsy manahirana ahy ny mamerin-teny raha manoratra aminareo, sady mahasoa anareo izany.

Filipiana 3:3

Fa isika no tena voafora, dia isika izay manompo an’Andriamanitra amin’ny Fanahy, sy manao an’i Kristy Jesoa ho reharehantsika, ary tsy mitoky amin’ny nofo.

Filipiana 4:4

Mifalia mandrakariva ao amin’ny Tompo; eny averiko indray: mifalia e!