Salamo 37 - Baiboly Katolika Baiboly Katolika
Salamo 37

¹ Nataon’i Davida. Aza tezitra noho ny amin’ny mpanao ratsy, na mitsiriritra ny toetr’izay mpanao heloka.

² Fa hojinjaina faingana tahaka ny ahitra ireny, ka halazo tahaka ny ahi-maitso.

³ Matokia an’i Iaveh, ary manaova soa; monena amin’ny tany ary manaràna fo amin’ny fahatokiany.

⁴ I Iaveh no ataovy firavoravoanao, dia omeny anao izay irin’ny fonao.

⁵ Ankino amin’i Iaveh ny anjaranao, dia matokia Azy, fa dia hanao Izy;

⁶ hataony mamirapiratra toy ny mazava ny fahamarinanao; ary tahaka ny andro mitatao vovonana ny fanananao ny rariny.

⁷ Mitoera amim-panginana, eo anatrehan’i Iaveh ary manantenà Azy; aza tezitra noho ny amin’izay ambinina amin’ny lalany, dia ny olona mahomby amin’ny tetikadiny.

⁸ Atsaharo ny hatezerana, halaviro ny havinirana; aza misafoaka foana ka hipaka amin’ny ratsy.

⁹ Fa ny ratsy fanahy hofongorana; ary izay matoky an’i Iaveh no hanana ny tany.

¹⁰ Raha afaka kelikely foana dia tsy ho eo intsony ny ratsy fanahy; mijery ny fitoerany ianao, fa efa nanjavona izy.

¹¹ Ny malemy fanahy no hanana ny tany; ka ho finaritra mankafỳ fiadanana lehibe.

¹² Ny ratsy fanahy namoron-tsain-dratsy, hamelezana ny marina, sady manidy vazana aminy.

¹³ Fa ny Tompo kosa mihomehy ny ratsy fanahy, satria hitany fa tonga ny androny.

¹⁴ Ny ratsy fanahy manatsoaka ny sabany, manenjana ny tsipìkany handavo ny ory sy ny malahelo, hamono izay mahitsy lalana.

¹⁵ Ny sabany hiditra amin’ny fony ihany; ary ny tsipìkany ho tapatapaka!

¹⁶ Aleo ny kely ananan’ny olo-marina, toy izay ny be ananan’ny olon-dratsy maro;

¹⁷ fa ny sandrin’ny mpanao ratsy, ho tapatapaka; ary ny olo-marina kosa hotohanan’i Iaveh.

¹⁸ Fantatr’i Iaveh ny andron’ny marina; ary ny lovany haharitra mandrakizay.

¹⁹ Tsy mba menatra izy amin’ny andron’ny fahoriany; ary ho voky amin’ny taona mosarena.

²⁰ Fa ny ratsy fanahy kosa ho levona; ny fahavalon’i Iaveh hanahaka ny voninahitry ny tanim-bilona; ho lasan-ko setroka ireny, dia ho levona.

²¹ Ny ratsy fanahy misambotra, nefa tsy mamerina, fa ny marina kosa be antra ka manome.

²² Izay tahin’i Iaveh hanana ny tany; izay ozoniny dia hofongorana.

²³ I Iaveh no mahamafy ny dian’ny olo-marina; ary mankasitraka ny lalany.

²⁴ Raha lavo izy tsy mba miampatra amin’ny tany; fa i Iaveh mitantana azy.

²⁵ Efa tanora ihany aho; ary indro antitra ankehitriny; fa tsy mba hitako nafoy izay olo-marina, na ny taranany nangataka hanina.

²⁶ Antra olona mandrakariva izy ka mampisambotra; ary mahazo fanambinana ny taranany.

²⁷ Halaviro ny ratsy ary manaova ny tsara, dia mitoera mandrakizay ao am-ponenanao.

²⁸ Fa tian’i Iaveh ny rariny, ary tsy foiny ny olo-miraiki-po aminy. Eo ambany fiambenany mandrakariva ireny, fa ny taranaky ny ratsy fanahy kosa hofongorana.

²⁹ Hanana ny tany ny olo-marina, dia honina eo mandrakizay.

³⁰ Milaza fahendrena ny vavan’ny marina; ary manambara ny rariny ny lelany,

³¹ ny lalàn’ny Andriamaniny dia ao am-pony, tsy mba solafaka ny diany.

³² Ny ratsy fanahy mitsikilo ny marina, ka mitady izay hahafaty azy;

³³ fa i Iaveh tsy mahafoy azy ho eo an-tanany; ary tsy manameloka azy, raha avy izay hitsarana azy.

³⁴ Miandrasa an’i Iaveh, ary araho ny lalany, dia hanandratra anao Izy, ka hanana ny tany ianao; raha avy izay hamongorana ny ratsy fanahy, dia ho hitanao izany.

³⁵ Nahita ny tsy mpivavaka efa mby eo amin’ny fanaperam-pahefana aho, nisandrahaka tahaka ny hazo maitso maniry izy.

³⁶ Nandalo aho dia tsy teo intsony izy; nitady azy aho fa tsy hita intsony izy.

³⁷ Mba diniho kosa ange ny marina, ka jereo ny mahitsy: fa manam-para mandimby ny olona tia fihavanana,

³⁸ Fa ny mpikomy kosa haringana avokoa; ny taranaky ny ratsy fanahy hofongorana.

³⁹ Avy tamin’i Iaveh no iavian’ny famonjena ny marina; mpiaro azy amin’ny andron’ny fahoriana Izy.

⁴⁰ I Iaveh no tonga manampy sy manafaka azy; manafaka amin’ny ratsy fanahy sy mamonjy azy Izy, satria Izy no nataony fototry ny fitokiany.